Македонија
Охридското езеро на сантиметар до рекордот од 1986 година

Нивото на Охридското езеро по вчерашните врнежи порасна и денеска изнесува 17 сантиметри над дозволената кота утврдена со билатералниот договор меѓу Македонија и Албанија. Последен пат во 1986 година биле регистрирани 18 сантиметри над дозволената кота
Нивото на Охридското езеро по вчерашните врнежи порасна и денеска изнесува 17 сантиметри над дозволената кота утврдена со билатералниот договор меѓу Македонија и Албанија.
Последен пат во 1986 година биле регистрирани 18 сантиметри над дозволената кота, а земајќи го в предвид фактот дека нивото на езерото секојдневно расте, во текот на денешниот ден или в петок може да се очекува и надминување на ова критично ниво.
Градоначалникот на Охрид, Александар Петрески во интервју за бугарската агенција Фокус, во средата предупреди дека нивото на Охридското езеро уште ќе расте.
Според хидролозите расте и нивото на реката Црн Дрим, откаде истекуваат поголеми количества вода откако во среда беа отворени сите шест порти за испуст. Во моментов испустот на вода во Црн Дрим изнесува 62 кубни метри во секунда.
Екипи на Македонија пат и Хидро централата Глобочица започнаа со распоредување механизација на бреговите на реката Црн Дрим поради опасност од излевање.
Од друга страна најкритична останува состојбата во охридската населба Пештани каде поплавени се поголем дел од куќите и другите станбени објекти а водата веќе ги зафати подрумите на куќите.
Според Пештанци постои опасност и од зарази бидејќи поради надојдената вода започнале да се излеваат и септичките јами, па водата во поплавените куќи според нив се измешала со фекалии.
Екипи на јавно здравје и Дирекцијата за заштита на храна во текот на вчерашниот ден излегоа на терен за да земат мостри од водата и истата е на испитување со што ќе се утврди нивото на заразност.
Пештанци стравуваат дека насипот што го изградија надлежните служби на регионалниот пат ќе спречи поплави само доколку езерото е мирно.
„Ако задува поголем ветер, како што дуваше пред некој ден. езерото ќе удри над насипот и ќе го земе во водата. Додека не се изгради потпорен ѕид патот не може да биде со сигурност заштитен“, вели Трајан Симоноски, член на Кризниот штаб од Пештани. /крај/охњуз/фо/вм
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За 30 дена ќе ставам крај на депониите во Гази Баба, рече кандидатот на СДСМ за градоначалник, Митовски

Кандидатот за градоначалник на Гази Баба од СДСМ, Влатко Митовски, најави дека во првите 30 дена од преземањето на функцијата ќе го реши проблемот со сметот и дивите депонии во општината.
„Нема повеќе да има диви депонии зад контејнерите, ниту општината ќе создава сопствени депонии. Отпадот ќе биде одложуван на пропишани и контролирани локации, а комуналното претпријатие повторно ќе стане функционално,“ порача Митовски.
Тој го обвини актуелното раководство дека четири години не успеало да воспостави систем за редовно собирање на отпадот, поради што комуналните служби се во целосен колапс.
Македонија
(Видео) Коњановски: Хотелот „Битола“ ќе се адаптира во Дом за стари лица – проект по иницијатива на граѓаните

Кандидатот за градоначалник на општина Битола, Тони Коњановски, порача дека секој голем проект започнува од гласот на граѓаните и дека заедничкото размислување, пишување и работа се клучот за подобро секојдневие.
„Една од најзначајните иницијативи што ја предложија граѓаните е адаптацијата на хотелот ‘Битола’ во Дом за стари лица – место кое ќе овозможи достоинствен живот, грижа и внимание за највозрасните сограѓани“, изјави Коњановски.
Меѓу останатите приоритетни предлози се: бесплатен оброк за сите ученици од 1 до 3 одделение, обезбедување униформи за децата од 1 до 5 одделение, организација на летни кампови за деца од социјално загрозени семејства, зголемување на капацитетите на градинките, како и продолжување на акцијата за отстранување на дивоградбите и гаражите, особено во Нова Битола.
„Вистински избор се проектите создадени од граѓаните, за граѓаните. Вистински избор е заедничкиот труд – кога гласот на граѓаните станува проект што го менува секојдневието“, нагласи Коњановски.
Македонија
Од утре на полноќ почнува изборниот молк

Агенцијата за аудио и аудиовизуелни медиумски услуги ги известува радиодифузерите дека изборната кампања за првиот круг од Локалните избори трае до 24:00 часот на 17 октомври 2025 година. Од 18 октомври заклучно со 19:00 часот на 19 октомври важат правилата за изборен молк.
За време на молкот, медиумите продолжуваат да известуваат за изборниот процес, но престануваат сите облици на изборно медиумско претставување, на учесниците во изборната кампања.
Според Изборниот законик, за прекршување на изборниот молк се смета емитувањето какви било информации, фотографии, аудио и аудиовизуелни материјали поврзани со или во кои учествуваат учесници во изборите, какви било облици на медиумско известување кои се отворено или прикриено во функција на нечија кампања и можат да влијаат врз одлуката на избирачите, податоци со кои се открива идентитетот на политички субјекти и/или поединци вклучени во инциденти или неправилности на денот на гласањето; како и изјави од кандидати во изборниот процес, од претставници на политички партии и од носители на функции во органите на власта.