Премиерот, Христијан Мицкоски, одговарајќи на новинарско прашање што се планира во делот на спортската инфраструктура нагласи дека 720 милиони денари се одвоени за 36 спортски објекти.

„Во моментот мислам дека само во вториот повик кој што го објави Министерството за локална самоуправа имаме повеќе од половина милијарда денари одвоено за инвестирање во спортска инфраструктура во општините. Севкупно од првиот и вториот беа околу 35- 36 објекти, а вкупната инвестициска вредност надминуваше 720 милиони денари. И ќе продолжиме во таа насока“, рече тој и додаде:

„Се завршуваат оние проекти кои што во минатото беа отпочнати па заборавени, како што беа базените итн. Така што се што било започнато, завршуваме, но и онаму каде што ќе констатираме дека е потребно да се интервенира ќе биде исто така завршено“.

Целосно е реновирано болничкото одделение на Клиниката за урологија. Премиерот Христијан Мицкоски при посетата на Клиниката во Клиничкиот центар ја истакна важноста на рекордните средства од Буџетот што се вложуваат во здравствениот сектор. Тој изрази задоволство од направените подобрувања и целосната реновираност на болничкото одделение, нагласувајќи дека условите и опремата ги доближуваат услугите до европски стандарди.

„Ова се можеби мали чекори, но големи во значење, особено оти години наназад не беше вложувано доволно. Со истата динамика ќе продолжиме и понатаму, со главен фокус на развојот на здравството“, рече Мицкоски.

Тој најави и продолжување на инвестициите во други здравствени установи, како Клиничката болница и Медицинскиот факултет во Штип, болниците во Кичево и Тетово, како и реконструкција и модернизација на здравствените услуги низ целата земја.

„Посакувам помалку пациенти и повеќе здрави луѓе, а оние што ќе имаат потреба од здравствена услуга да добијат квалитетна, европска нега“, додаде премиерот.

Директорката на Гимназијата во Демир Хисар, Маја Лозановска, денеска се јави на информативен разговор во полициската станица во Демир Хисар.

Ова се случува откако на 8 август вечерта, полицијата изврши претрес во нејзиниот дом барајќи го печатот од училиштето. Во тоа време, Лозановска беше на боледување. Полицискиот началник изјави дека ќе ја однесе на разговор дури и со носилки, иако налогот важел само за претрес, а не и за лишување од слобода. Министерството за внатрешни работи покрена дисциплинска постапка против началникот.

Градоначалникот, претходно, ја разреши Лозановска по налог на Просветниот инспекторат, поради утврдени неправилности во работењето. Од МВР соопштија дека против Лозановска имало пријава и постоеле основи за сомневање за кривично дело „одземање печат и службени документи“.