Протестниот митинг во организација на СДСМ под слоганот „Ние сме за победничка Македонија“ ќе биде поддржан и од повеќето опозициски партии.

Протестниот митинг во организација на СДСМ под слоганот „Ние сме за победничка Македонија“ ќе биде поддржан  и од повеќето опозициски партии.

Лидерот на НСДП, Тито Петковски рече дека неговата партија го поддржува овој митинг и дека ќе биде дел од него.

„НСДП не само што јавно го поддржува, туку ќе биде дел од овој митинг со наши членови, симпатизери да дадеме поддршка, а на соодветен начин ќе кажеме како ние гледаме на времето и како владее власта. Наши членови ќе дојдат на митингот со јасни пораки, со пароли, со транспаренти, затоа што сметаме дека тогаш треба да биде најсилен гласот на оние кои не ја поддржуваат оваа влада и сметаат дека е неодговорна и дека несовесно владее“, изјави Петковски.

Тој рече дека очекува на овој митинг да се соберат многу повеќе граѓани, од роденденскиот митинг на владејачката ВМРО-ДПМНЕ.

„Јас сум сигурен дека многу повеќе од дупло луѓе ќе се соберат и навистина би било многу загадочно  ако не се случи тоа,  бидејќи тоа ќе говори дека само опозицијата смета дека власта не владее добро. Овој митинг треба да даде шанса на луѓето независно од партиските бои со чинот на излегувањето да покажат дека не се согласуваат со политиката на владата“, додаде Петковски.

Нова демократија го поддржува овој митинг, но за да биде дел од него очекува покана од организаторите.

Ја поддржуваме потребата од протест, односно од реакција, но за да бидеме дел од тој митинг, треба да бидеме поканети од иницијаторите, за да видиме која ќе биде суштината. Треба да седнеме и да видиме дали ќе се внесе дел од нашето политичко дејствување“, изјави сулејман Рушити од Нова демократија.

Според него има доста незадоволство од страна на сите граѓани на Република Македонија и има мотив луѓето да излезат на протест.

Ѓорѓи Оровчанец од Нова алтернатива изјави дека ваков митинг им е потребен на граѓаните да се ослободат од стравот, за да ја исполнат целта, а тоа како што рече е победничка Република Македонија.

„Груевски на роденденот не го поддржаа ниту неговите членови тоа е само знак дека и неговото членство веќе не се согласува со неговата политика. Благодарејќи на се појасната слика која се создава во јавноста за неговото владеење и потребата за промена на неговата власт очекувам дека ќе има двојно повеќе отколку на роденденот на ВМРО-ДПМНЕ“, рече Оровчанец.

Најголемата опозициска партија СДСМ, за недела 27 јуни, најави протестен митинг „Ние сме за победничка Македонија“ на кој ќе го изразат незадоволството од политиката на актуелната власт.

Митингот всушност е одговор на роденденската забава што пред повеќе од една недела ја одржа владејачката ВМРО-ДПМНЕ во центарот на Скопје.

Грубите проценки се дека на роденденот на ДПМНЕ присуствуваа околу 100 илјади луѓе./крај/бд