Македонија
Уште една координациска средба за измените на Деловникот
Опозицијата и власта денеска повторно ќе седнат на заедничка маса и ќе се обидат да ги усогласат измените на Деловникот за работата на Собранието.
Опозицијата и власта денеска повторно ќе седнат на заедничка маса и ќе се обидат да ги усогласат измените на Деловникот за работата на Собранието.
По вчерашното договарање на персоналниот состав на Анкетната комисија која ќе го расчистува првојулскиот инцидент, координаторите ја отворија точката за Деловникот.
Засега двете страни се на различни позиции.
Од СДСМ бараат измените во Деловникот да се направат со тоа што опозицијата ќе има право да предлага на секоја седница по една точка на дневен ред и парламентарен механизам како да се трошат народните пари во владините институции.
Владејачката партија се согласува опозицијата да има право да предложи точка на дневен ред, но само еднаш во текот на месецот. За другиот предлог власта има резерва и дали воопшто воспоставувањето парламентарен механизам за контрола на трошењето буџетски средства треба да се регулира со Деловникот или со други правни прописи.
Од СДСМ велат дека нивната цел е да се дојде до договор за Деловникот, а не да опструираат.
Според ВМРО-ДПМНЕ само исполнувањето на двата, како што велат, приоритети ќе значи позитивна оценка од Брисел, а се друго ќе биде на штета на граѓаните.
Доколку не се надминат разликите за Деловникот меѓу власта и опозицијата, Македонија ризикува да добие негативен извештај за напредок од страна на Европската комисија за политичкиот дијалог.
Вчера конечно по 20 дневните средби координаторите на пратеничките групи се договорија околу Анкетната комисија.
Хајрула Мисини од ДУИ, познат како командант Шпати, го избраа да раководи со комисијата која ќе го расчистува собранискиот инцидент од 1 јули.
Со Мисини ќе работат Илија Димовски и Благородна Дулиќ од ВМРО ДПМНЕ, а од опозицијата Менде Диневски од СДСМ и Соња Мираковска од НСДП./крај/бд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
СДСМ: Ја слушнавме пораката од граѓаните и ја прифаќаме, ќе продолжиме да се бориме
„СДСМ ја слушна пораката од граѓаните и ја прифаќа. Ние ќе продолжиме да се бориме за секој граѓанин, за прогресивна и европска иднина на Македонија. Резултатот на изборите на 8 мај сè уште не е одлучен“, велат од СДСМ.
„Со десничарите може да се соочиме со мрачни сценарија од минатото, кои ќе стават крај на европските перспективи и кои водат во нова долга изолација и нови поделби во општеството.
Веќе се гледа дека ВМРО-ДПМНЕ и ДУИ играат опасна игра со мултиетничкото ткиво на нашето општество. Тензиите што се сега се прават меѓу Македонците и Албанците може да нè вратат назад во грдото минато.
Затоа е исклучително важно граѓаните да излезат и да гласаат на 8 мај, за напредна држава, држава во која ќе имаме подобар животен стандард. Нема откажување од иднината!“, соопшти СДСМ.
Македонија
ВМРО-ДПМНЕ: Над 180.000 гласови предност се обврска за ВМРО-ДПМНЕ Македонија повторно да ја врати на народот
180.000 гласа разлика во корист на Силјановска Давкова и ВМРО-ДПМНЕ пред Пендаровски и СДС е порака дека народот сака промени и крај на понижувањата, соопштија од ВМРО-ДПМНЕ.
„Народот не поддржува политика на понижување на Македонија. Граѓаните јасно кажаа дека се против криминалот на СДС и ДУИ. 7 години Македонија тоне на секое поле. На почеток на секоја учебна година немаше учебници за учениците, за болните немаше лекарства, за земјоделците немаше откуп. Народот не се чувствуваше безбеден, криминалот царуваше по улиците“, велат од ВМРО-ДПМНЕ.
Како што истакнуваат, народот не сака да живее повеќе во несигурност.
„Над 180.000 гласови предност се обврска за ВМРО-ДПМНЕ Македонија повторно да ја врати на народот. Победата во вториот круг ќе биде уште поголема, а СДС и Пендаровски, заедно со нивните газди од ДУИ никогаш повеќе нема да бидат во позиција да го понижуваат народот. Македонија повторно твоја“, завршуваат од ВМРО-ДПМНЕ.
Македонија
ЦУК: Коловозите во државата на многу места се влажни и имало ситни одрони на сите патни правци
Во Центарот за управување со кризи, имало вкупно 1 694 повици на единствениот повикувачки број за итни случаи 112.
Од нив „реални“ повици биле 49,82 отсто, а 50,18 отсто биле за други потреби на граѓаните што не биле итни. Кон полиција биле упатени 69,92 отсто и кон итната медицинска помош 28,91 отсто од реалните повици кон 112 во ЦУК.
Во последното деноноќие немало евидентирани пожари на отворено.
Од ЦУК потсетуваат дека коловозите во државата на многу места се влажни и имало ситни одрони на сите патни правци во последното деноноќие.
Екипите ги отстранувале одроните на патот и нема прекин на сообраќајот.