Наместо во истрага за криминалот, градоначалничката на Скопје, Данела Арсовска на социјалните мрежи реагира дека институциите во Македонија активно учествуваат, поддржуваат и поттикнуваат криминал.

Како што појаснува во напишаното, Општина Чаир вчера во 14.44 часот до Агенцијата за катастар на недвижнини поднеле Решение за поништување на Решението кое го издадале за криминалната легализација со фалсификувани документи што ја откривме.

„Решението го антидатирале демек е направено на 02.05.2025 за да изгледа дека постапиле пред целиот криминал да биде објавен јавно, ама не можат да покријат дека вчера им е поднесен во катастар неколку часа по нашите пријави во МВР.

Срамот да биде поголем во обидот за прикривање докази активно учествуваат Владата и Министерот за внатрешни работи кои наместо да “филозофираат”, треба да постапуваат за да ги фатат криминалците, а не да дозволат тие да ги покријат нивните криминали.

До сега требаше да сте во општината и да ги имате обезбедено сите докази а не да им дозволувате на Висар Ганиу и Изет Меџити да си ги покриваат криминалите и да уништуваат докази“, истакнува Арсовска.

Потенцира дека Јавното обвинителство мора да постапи во разоткривање на криминалот кој, како што велат, се случува пред очите на целата јавност.

Премиерот Христијан Мицкоски на денешната прес- конференција одговарајќи на новинарско прашања, кои се неговите очекувања со оглед дека се очекува во јули ЕП во најновиот извештај за напредок да вклучува признавање на македонскиот јазик и идентитет вели:

„За прв пат пред европратениците ќе се најде извештај во кој на неколку наврати се споменува многувековниот, посебен, македонски идентитет и јазик. Очекувам европратениците едногласно да го усвојат овој Извештај во кој што се потврдува посебниот, многувековен македонски идентитет и посебниот македонски јазик кој што е дел од официјалните јазици на ОН и меѓународно признаен или кодифициран 1977, иако и претходно е неговата кодификација завршена уште ви 1945та година во рамките на ОН.
За жал морам да кажам дека повторно од Исток стигаат поинакви коментари и гласови, но да видиме како целата оваа работа ќе заврши. Ги повикувам сите политички чинители во државата да се обединат и да почнат од денес да вртат на своите сестрински партии кои што имаат европратеници во Европскиот парламент.

Знам дека опозициската СДСМ е дел од едно такво семејство, ги повикувам уште денеска да почнат и да вртат до своите сестрински партии истото јас како што знам и политичката опозициска партија ЛДП. А ние денеска како политичка партија ќе имаме извршен комитет и на тој Извршен комитет ќе подготвиме стратегија како ВМРО-ДПМНЕ на лице место ќе испрати луѓе кои што ќе бидат во деновите пред нас во Брисел за да продолжат да разговараат со европратениците и потребата од носењето на оваа Резолуција.

На четврти ќе биде расправата во парламентот, 4 јуни според информациите кои што ги имам, а гласањето би требало да биде во јули. Така што уште еднаш сакам да потенцирам дека посебниот, многувековен македонски идентитет и посебниот, меѓународно кодифициран македонски јазик е факт и секој оној кој што ги негира и одбива да ја прифати оваа реалност и овој факт е анти НАТО и анти ЕУ. Така што било кој, кој што ова не го прифаќа од земјите членки и било кој европратеник кој што нема да гласа во насока на прифаќање на оваа резолуција е анти ЕУ пред се и е спротивно од европските вредности дефинирани од Аденауер, Шуман и Дегаспари многу одамна,“, нагласи Мицкоски.

Премиерот Христијан Мицкоски нема забелешки за предлогот поранешниот министер за информатичко општество и администрација Азир Алиу да биде министер за здравство на местото на досегашниот лидер на Алијанса за Албанците, Арбен Таравари кој си поднесе оставка и од владината и од партиската коалиција.

„Да, јас го добив и официјално тој предлог. Деновиве ќе го доставам до пратениците во Собранието. Со господинот Алиу се познаваме така што мислам дека добро ќе соработуваме во рамките на Владата“, рече премиерот Мицкоски денес одговарајќи на новинарски прашања во Владата.

Министерот  за животна срдина и еден од лидерите во „Вреди“, Изет Меџити, во понеделникот кажа дека ќе го предложат Алиу за министер за здравство откога тој од Алијанса за Албанците премина во „Вреди“. Иако веднаш откога го соопшти предлогот информатичар да биде министер за здравство стигнаа многу забелешки за изборот, Меџити кажа дека министерот треба да биде добар менаџер, а Алиу е најдобар предлог.

По оставката на Таравари, неофицијално, како можна министерка за здравство се спомнуваше сегашната министерка за образование Весна Јаневска, а потоа и сегашниот директор на Фондот за здравствено осигурување Сашо Клековски која кажа дека ако му предложат ќе ја прифати функцијата со соодветна замена за него во Фондот. Лицитирањето со можни министри во Здравство од ВМРО-ДПМНЕ го прекина премиерот Мицкоски кога кажа дека нема да има размена на ресори во владината коалиција и ресорот Здравство ќе остане во „Вреди“.