Македонија
Пријави за кичевскиот командир на полиција

МВР поднесе кривични пријави против командирот на кичевската полиција, против уште едно службено лице и против директорот на О.У. „Кузман Јосифовски – Питу“, за примање поткуп
Кривични пријави се поднесени против командирот на Полициската станица во Кичево, Дејан Стојкоски, против раководителот на надворешната канцеларија за криминалистички работи Благоја Т. и против директорот на ОУ „Кузман Јосифовски – Питу“ З.Г.(34), поради постоење основано сомнение за сторено кривично дело примање поткуп и помагање, соопшти МВР. Командирот и раководителот, во својство на службени лица, а потпомогнати од директорот во текот на јануари, годинава, побарале поткуп во износ од 2 милиони денари од сопственик на градежна фирма во Кичево, за да не го гонат за криминал. Еден месец подоцна бараната парична награда ја намалиле на милион денари. Оштетениот, сопственикот на градежната фирма, пред три дена го пријавил случајот во МВР, при што беа преземени соодветни мерки и активности за негово расветлување. „Во текот на вчерашниот ден, двајцата високи функционери во кичевската полиција ја примиле бараната парична награда од оштетениот, кој е основач и управител на градежна фирма од Кичево за да во рамките на своето службено овластување, не извршат службени дејствија што биле должни да ги извршат, односно да не поднесат кривична пријава по сите основи на сомнение и констатирани незаконитости за сторени кривични дела од страна на оштетениот и неговото правно лице, а при извршувањето на кривичното дело им помогнал третопријавениот“, рече Гордана Јанкуловска, министерка за внатрешни работи, на денешната прес-конференција. Пред околу една година, командирот на кичевската полиција го повикал оштетениот да се сретнат на периферијата на градот, при што му побарал пари за да му гарантира негова заштита. Откако оштетениот го одбил, командирот му се заканувал преку негови познаници дека ќе биде уапсен.Во јануари, годинава, Благоја Т. дошол во ресторанот на оштетениот и му побарал 2 милиони денари, за возврат да му биде обезбедена гаранција за заштита од кривично гонење. Оштетениот бил повикан во ПС Кичево на службен разговор, каде му била побарана документација во врска со работењето на неговата фирма, што тој ја доставил. По две недели Благоја Т. повторно од оштетениот побарал пари, но овојпат милион денари, за да не му биде поднесена кривична пријава по сите основи на сомнение. Оштетениот и оваа понуда ја одбил. Потоа, директорот на основното училиште, близок пријател на командирот, во својство на посредник, ги договарал средбите меѓу двајцата полициски службеници и оштетениот. Тој посредувал и при договарање на времето и местото, односно обложувалницата „Премиум“ во Кичево, каде оштетениот ги предал паричните средства во износ од 16.000 евра на една од вработените. Таа го известила раководителот на надворешната канцеларија за криминалистички работи, кој контактирал со таксист од Кичево, со барање парите да ги предаде во менувачница во Кичево, со напомена до вработениот во менувачницата, дека тој ќе дојде да ги подигне парите во денарска противвредност за 16.000 евра. Сето ова се случувало вчера попладне.„При извршениот претрес во менувачницата се пронајдени дел од претходно технички обработените пари, односно сума од околу 9.000 евра. Раководителот на надворешна канцеларија за криминалистички работи, пак, е затекнат во друга менувачница во Кичево каде што се обидел да замени 123.000 денари за евра, додека при личен претрес во облеката му се пронајдени уште 194.000,00 денари. При извршен претрес во домот на командирот на кичевската полиција пронајдени се парични средства во износ од 557.000,00 денари“, соопшти министерката Јанкуловска.Пријавените лица се приведени, а заради натамошна постапка се задржани во ПС Гази Баба, Скопје, и во текот на денов ќе бидат предадени на надлежен истражен судија. По приведувањето на двајцата високи функционери од кичевската полиција, до именувањето нови, функцијата ќе ја извршуваат нивните помошници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Лосон демнатира, Македонија нема да прифаќа мигранти од Британија

Британскиот амбасадор Метју Лосон на заедничка прес-конференција со премиерот Христијан Мицкоски во Владата на Република Македонија ги демантираше тврдењата дека договорот за стратешко партнерство меѓу Македонија и Обединетото Кралство подразбира прифаќање мигранти од Британија.
„Драго ми е што земјата се согласи на оваа соработка, но таа се однесува на полициската координација меѓу агенциите. Тоа го правиме и со повеќе европски земји. Не станува збор за тоа дека Македонија ќе прифаќа мигранти од Британија“, истакна Лосон.
Тој додаде дека договорот предвидува интензивна соработка во справувањето со организирани мигрантски групи, размена на доверливи информации и зајакната координација на безбедносните служби.
„Ова е широко партнерство. Има многу шпекулации во медиумите, и кај нас и овде. Но суштината на договорот е во економијата и безбедносната соработка“, појасни амбасадорот.
Премиерот Христијан Мицкоски, од своја страна, ја поздрави отвореноста на Обединетото Кралство и порача дека Северна Македонија останува посветена на меѓународната координација во борбата против нелегалната миграција и криминалот.
Македонија
Ахмети му порача на Мицкоски дека Албанците не се гости во оваа држава

На завршниот мобилизациски собир на ДУИ во Арачиново, лидерот Али Ахмети испрати остри политички пораки до премиерот Христијан Мицкоски, обвинувајќи го за обиди да се загрози соживотот и мултиетничкиот карактер на државата. Во преполна сала со граѓани, Ахмети го искористи говорот за да ја заокружи кампањата на ДУИ и да реагира на најавените промени на закони кои, според него, директно ги засегаат Албанците.
„Ние не ја носиме државата со себе – ние имаме право да ја водиме, тоа ни припаѓа! Албанците се над 30%, живеат континуирано на своите огништа и се нераскинлив дел од државноста“, изјави Ахмети, реагирајќи на стравувањата дека Албанците наводно ја „преземаат државата“.
Ахмети упати и директно прашање до Мицкоски, барајќи објаснување за измените во Законот за употреба на јазиците и за Охридскиот рамковен договор.
„Зошто го менува Законот за употреба на јазиците? Зошто го менува Охридскиот Мировен Договор? Зошто го загрозува мирот, стабилноста и безбедноста на државата?“, праша Ахмети, посочувајќи дека таквите политики водат кон опасна радикализација и поделби.
Особено ја осуди реториката за „чесни Албанци“, оценувајќи ја како враќање на идеологии од минатото.
„Знаете ли кој ја користеше филозофијата за ‘чесните Албанци’? Милошевиќ! А секој што денес ја промовира таа идеја, ја оживува логиката која Албанците ја поразија“, рече Ахмети, потенцирајќи дека Албанците денес се академски и политички оформени, со три универзитети и илјадници стручни кадри.
Според него, државата не може повеќе да се води едноетнички, а оние кои, како што кажа, „му служат на злото“, не можат да бидат партнери на Албанците.
Во завршницата, Ахмети повика на регионално помирување и европска интеграција, со јасно отфрлање на националистичките проекти:
„Ние не бараме Голема Албанија, ниту Голема Србија, ниту Голема Бугарија – туку Голема Европа без граници, како што направија Германија и Франција.“
ДУИ, со овој собир, стави крај на низата мобилизациски средби низ земјата, најавувајќи продолжување на политичката борба за еднаквост, соживот и европска иднина.
Македонија
ВМРО-ДПМНЕ: Пресудата за модуларната болница е срамна и политички мотивирана

ВМРО-ДПМНЕ остро реагираше на судската пресуда за трагедијата во модуларната болница во Тетово, во која во септември 2021 година животите ги загубија 14 лица. Од партијата ја оценија пресудата како срамна и донесена под политички притисок од страна на СДСМ и ДУИ.
Во партиското соопштение се посочува дека казната затвор од една година и шест месеци за поранешните директори на тетовската болница, како и паричната казна од околу 16 илјади евра за Клиничката болница Тетово, не ја одразуваат тежината на трагедијата.
„Оваа пресуда не е во служба на правдата, туку единствено во служба на Венко Филипче и Али Ахмети“, наведуваат од ВМРО-ДПМНЕ.
Од партијата сметаат дека правосудниот систем е под целосно влијание на владејачките партии, и побараа институциите да поведат постапка за разрешување на сите инволвирани во носењето на одлуката.
„Ги повикуваме надлежните да поведат постапка за разрешување на судиите кои донеле срамна пресуда, како и Управата за јавни приходи да го испита потеклото на имотот на судијата кој ја донесе оваа одлука“, стои во реакцијата.
Од ВМРО-ДПМНЕ исто така упатија остри зборови кон поранешниот министер за здравство Венко Филипче, за кого тврдат дека „свесно и по налог на Заев, Анѓушев и Ахмети го презел тендерот за изградба на модуларните болници од локалната самоуправа“.
Партијата истакна дека ќе поддржи секоја форма на револт и незадоволство од оваа пресуда и додаде дека „право, правна држава и одговорност мора да има“.