Македонија
Трибина: Проблемот со името – Минато или иднина

Центарот за истражување и креирање политики, во партнерство со иницијативата Платформа, одржаа трибина на тема „Проблемот со името – Минато или иднина“
На трибината говореа истакнати личности од политиката, државните институции, медиумите и разни организации. Педесетина граѓани се обидоа да земат учество во трибината, но поради недостиг на време, не успеаја во намерата. На трибината беа изнесени веќе познати идеи на сегашните и поранешните политичари. Поранешниот премиер Лубчо Георгиевски ја потсети власта и тие што ја креираат јавноста да ја напуштат фразата дека името е проблем на Грција, туку да прифатат дека тоа е проблем на Македонија. Тој оцени дека Македонија не водела преговори за името, ниту во негово време, ниту пак сега. „Ние глумевме преговори, СДСМ глумеше преговори, а на сегашната власт е време сериозно да се зафати со решавање на проблемот“, рече Георгиевски. Неговиот став, во однос на името, како што неколкупати претходно истакнал, е дека Северна Македонија е најдобриот предлог што некогаш сме го добиле од медијаторот Метју Нимиц и треба да се прифати, а натаму лесно ќе се расправа за националноста, пасошот или, пак, менување на Уставот. Љубомир Фрчкоски, кој ја отвори трибината, ги запозна присутните со најновиот предлог на посредникот Метју Нимиц, со тоа што ги истакна македонските и грчките позиции. “Тоа што Грците инсистираат во графата националност, само на кирилица да пишува македонска, или македонски јазик, е дополнителен проблем за изговарање на англиски. Тие нема да знаат како да го прочитаат, а од друга страна, нас не дефинира како Словени, а не стари Македонци“, рече Фрчкоски. Ставот на Радмила Шеќеринска е релативно познат, односно дека не треба да се бега од расправа за името во Собранието. Таа потсети дека Грција од таквата постапка имаше само корист. Како одговор на наводите на Љубчо Георгиевски, дека никој до сега вистински не водел преговори за името, Шеќеринска рече: „Се водеа преговори во 2005 година и беше одлучено привремената референца да се користи до 2008 година, кога треба да се признае уставното име, Република Македонија. Сега сме 2008 година, а имаме само сменети предлози“. Градоначалникот Трифун Костовски, откако излезе од економската замка што ја поставија неколку учесници во расправата, рече дека Грција има дефиниран став по однос на проблемот, па затоа ја добива војната на секој план. „Ние не можеме да се договориме и да излеземе едногласно пред јавноста“, рече Костовски и додаде: „Не ми е битно што 125 земји ме признале, битно ми е дали моите соседи и асоцијациите кон кои тежиме ме прифаќаат“. Ревносната Јагнула Куновска истакна дека Грција мора најпрво да ни го признае идентитетот, а потоа да се расправа за името. „Јас не прифаќам, Горна Македонија, ниту Северна, ниту Јужна… Јас сум Македонка и така сакам да ме викаат“. Од Центарот за истражување и креирање политики потсетија дека со резолуцијата од 1993 година, кога и беше прифатена привремената референца ПЈРМ, Македонија не е обврзана да преговара. Затоа, треба на секој потег на Грција бурно да се реагира и да се повикуваме на тогашните одредби. Но, исто така, дека пред нас се уште стои можноста за акционен план, за остварување на условите за влез во Европската Унија покрај проблемот со Грција за името. Присутните беа револтирани што немаа време да постават прашања или активно да се вклучат во расправата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Воведени нови летови од скопскиот аеродром до Стокхолм, Мадрид, Бари, Келн и Прага

Скопје се поврзува со уште пет нови дестинации. Од скопскиот аеродром се воведуваат летови до Стокхолм, Мадрид, Бари, Келн и Прага, објави вицепремиерот и министер за транспорт и врски, Александар Николоски.
„Утрово потпишавме Договор за 5 нови дестинации кои што ќе се оперираат од скопскиот аеродром. Пет нови авиолетови кои ќе значат повеќе туристи во Македонија, повеќе бизнис во Македонија и повеќе можности за сите граѓани на Македонија. Веќе од месец ноември почнува редовна авионска линија Стокхолм- Скопје. Исто така, веќе од месец ноември почнува редовна авионска линија Мадрид- Скопје, а од декември почнува редовна авионска линија Бари- Скопје, од декември Келн- Скопје и исто така од декември почнува и редовна авионска линија Прага -Скопје. Ова се пет нови авиолинии кои за неколку месеци ќе почнат да оперираат од скопскиот аеродром“, рече Николоски.
Тој додаде дека за една година се отворени 16 нови авиолинии.
„Со 11 нови линии кои што веќе ги отворивме и овие 5, веќе зборуваме за 16 нови авиолинии кои ги отворивме за само една година. И тоа бројките го покажуваат, само во првата половина од оваа година од скопскиот и охридскиот аеродром вкупно се превезени 1, 5 милион патници што е зголемување за 5 % од скопскиот аеродром и 11 % на охридскиот аеродром“, рече Николоски и најави дека во следниот период ќе има уште нови авиолинии.
Македонија
Зголемен број на туристи во Македонија, земјата станува сѐ поинтересна за Германците, Французите, Британците…

Анализата на туристичкиот тренд во првите пет месеци од 2025 година покажува дека Македонија бележи интензивирање на туристичкиот промет и зголемување на интересот на странските туристи од западноевропските земји, пред сè, од: Франција, Германија и Велика Британија.
Министерството за култура и туризам ги анализираше најновите податоци за движењето на странските туристи во Македонија за првите пет месеци од 2025 година, во однос на истиот период во 2024 година, при што е забележан пораст од 23,6 % кај странските туристи и раст од 18,7 % кај остварените ноќевања.
Во првите пет месеци од 2025 година, туристичкиот промет во Македонија бележи значително зголемување во однос на истиот период во 2024 година.
Посебно се издвојува Германија со раст од 219 % во бројот на туристи и 146 % во ноќевања, што укажува на видно зголемен интерес на германските туристи за посета на нашата земја. Франција бележи највисок пораст со 398 % повеќе туристи и 303 % повеќе ноќевања, со што се позиционира како нова стратешка цел на туристичките политики. Велика Британија забележува значително зголемување од 204 % во бројот на туристи и 139 % во ноќевањата. Турција, која беше водечки пазар во 2024 година, продолжува со стабилен раст од 11 % во бројот на туристи и 21 % во ноќевањата, задржувајќи ја својата прва позиција според вкупниот број на туристи и ноќевања. Овие резултати ја потврдуваат позитивната динамика и зголемениот интерес за Македонија како атрактивна туристичка дестинација на европската мапа.
„Македонија бележи растечки интерес кај странските посетители за културен туризам во месеците надвор од традиционалната сезона, што значително придонесува за анулирање на сезонскиот туризам, зголемување на вкупните туристички приходи и засилување на локалната економија. Овој тренд е од исклучително значење затоа што создава континуирана туристичка активност низ целата година, ги ангажира локалните заедници, занаетчии, водичи и угостители, и овозможува рамномерен економски развој и надвор од туристичките центри“, соопшти Министерството и најави дека ќе ги искористи овие податоци за прецизно насочување на промотивните активности, подготвување на програмата на секторот туризам, јакнење на авионските врски со новите пазари и активна поддршка на туристичките оператори.
Македонија
Обезбедени 42.3 милиони денари финансиска поддршка за ранливите потрошувачи на струја

Министерството за енергетика, рударство и минерални суровини информира дека Владата ја донесе Програмата за заштита на ранливи потрошувачи на енергија за 2025 година, a во насока на унапредување на енергетската заштита и поддршка на граѓаните кои се соочуваат со социјални и здравствени предизвици.
Со оваа Програма се обезбедуваат 42.300.000 денари од државниот буџет, наменети за директна финансиска поддршка за најзагрозените категории на граѓани,
„Програмата има за цел да обезбеди достапна и сигурна енергија за оние на кои им е најпотребна. Средствата се наменети за директна финансиска поддршка за домаќинства што живеат во енергетска сиромаштија, со особен фокус на лицата со попреченост и оние кои користат гарантирана минимална помош“, велат од Министерството.
Корисници на оваа програма се домаќинствата кои остваруваат паричен додаток заради покривање на дел од трошоците за потрошувачка на енергенси, како и домаќинства во кои живеат лица со тешка или длабока интелектуална попреченост, најтешка телесна попреченост, потполно слепи или потполно глуви лица.
За оваа втора категорија, Програмата предвидува месечна поддршка во висина од 1.000 денари, што директно ќе се одбива од фактурите за потрошена електрична енергија, почнувајќи од месецот на поднесување на барањето, во времетраење од 12 месеци.
Финансиската поддршка ќе се доделува според принципот најниски приходи, се до исцрпување на средствата и тоа:
-2. 300. 000,00 денари од вкупните средствата ќе бидат наменети за домаќинства во кое живее лице/лица со тешка или длабока интелектуална попреченост,
– 19. 000. 000,00 денари од вкупните средствата ќе бидат наменети за домаќинства во кое живее лице/лица со најтешка телесна попреченост,
– 9.000.000,00 денари од вкупните средства ќе бидат наменети за домаќинства во кое живее потполно слепо лице и
– 12. 000. 000,00 денари од вкупните средствата ќе бидат наменети за домаќинства во кое живее потполно глуво лице.
Заинтересираните граѓани ќе можат да аплицираат преку јавен оглас кој ќе биде објавен на веб-страницата на Министерството за енергетика (www.energy.gov.mk) и во два дневни весници. Огласот ќе биде со рок за пријавување од 30 дена. Образецот за пријава ќе биде достапен на интернет, како и во архивата на Министерството, а апликантите ќе треба да приложат и документи со кои ја докажуваат исполнетоста на условите за финансиска поддршка.
Распределбата на средствата ќе се врши согласно специфичните потреби на целните групи: 2,3 милиони денари се наменети за домаќинства со лица со тешка интелектуална попреченост, 19 милиони за домаќинства со најтешка телесна попреченост, 9 милиони за домаќинства со потполно слепо лице и 12 милиони денари за оние со потполно глуво лице.
Процедурата за селекција ќе ја спроведат четири комисии составени од вработени во Министерството, поделени според видот на попреченост на лицето во домаќинството. Комисиите ќе ги разгледуваат пристигнатите барања и ќе утврдат кои кандидати ги исполнуваат условите. Списокот на корисници кои ќе добијат финансиска поддршка ќе биде јавно објавен.
Програмата предвидува и дополнителни мерки за олеснување на енергетскиот пристап, вклучувајќи ослободување од трошоци за повторно приклучување, приоритет во отстранување на дефекти и мерки против исклучување поради неплатени сметки во зимскиот период.
Сите информации, јавниот оглас и образецот за пријава ќе бидат достапни на веб-страницата на Министерството: www.energy.gov.mk.
Од Министерството апелираат сите кои исполнуваат услови навремено да се информираат и да аплицираат во предвидениот рок.