Полицијата поднесе кривична пријава против поранешна директорка на средно училиште во Демир Хисар поради „одземање или уништување службен печат или спис“.

„Денеска до ОЈО Битола е поднесена  кривична пријава против М.Ј. (57) од Демир Хисар за сторено кривично дело „одземање или уништување службен печат или спис“ по член 390 од КЗ“, соопшти МВР.

Од таму велат дека пријавената во периодот од 06.08.2025 до 13.08.2025 година противправно ги криела службените печати, сопственост на СОУ „Крсте Петков Мисирков“ од Демир Хисар, со што направила службените печати да бидат неупотребливи и со нив да не може да раководи новоименуваната директорка Ј.Д. (43), назначена за в.д. директор на СОУ „Крсте Петков Мисирков“ во Демир Хисар со одлука од страна на општина Демир Хисар од 05.08.2025.

Пред неколку дена на социјалните мрежи беше објавено видео на кое началник од МВР без налог се обидува да ја приведе екс директорката и вели дека ако треба и на носилки ќе ја однесат во полициска станица. На видеото се гледаше и нејзниот син кој кажува дека мајка му е на боледување и дека кога ќе изаврши боледувањето ќесе јави во полициска станица.

Начачникот беше разрешен поради непрофесионално и неетично однесување.

Демократската обнова на Македонија (ДОМ) сака да ја разјасни својата позиција во однос на повторените јавни поврзувања на Лилјана Поповска со нашата партија. Иако ја цениме нејзината досегашна улога во политичкиот живот, сметаме дека е важно да се направи јасна разлика меѓу минатото и сегашната насока на ДОМ, велат од партијата.

„Партијата денес се води од принципите на транспарентност, инклузивност и колективна одговорност преку модел со четворица копретседател(к)и. Овој систем ја поттикнува рамноправноста и спречува каква било концентрација на моќ, што претставува значаен исчекор од претходните модели на управување. Свесни сме дека Лилјана Поповска е ангажирана во нови иницијативи, како што е ‘Зелен хуман град’ и веруваме дека нејзиниот фокус треба да остане таму. Во таа насока, ДОМ охрабрува почитување на разните политички патеки и избегнување мешање, кое може да создаде недоразбирања или да ја наруши довербата на граѓан(к)ите“, се наведува во соопштението.

Од таму велат дека тие остануваат посветени на градењето зелена, инклузивна и европска Македонија преку „Коалицијата за зелена иднина“.

11 часа по објавувањето на мојата кандидатура за градоначалничка на општина Центар, полицајци затропаа на мојата врата, објави поранешната претседателка на Државната комисија за спречување на корупцијата (ДКСК) и актуелна независна кандидатка за градоначалник на општина Центар, Билјана Ивановска.

Таа објави дека синоќа полицајци ја побарале дома за да ѝ врачат кривична пријава, но таа не била дома.

„Синоќа, во 20.30 ч двајца полицајци ме побарале да ми врачат кривична пријава, но јас не бев дома. Утринава, веднаш појдов да ја подигнам поканата од ОЈО Скопје за да видам за што станува збор. Ме повикуваат на разговор на 19 август. Јас немам што да кријам, имам чиста совест и не се плашам од никакви закани и ниски удари и притисоци. Мојата цел е достоинствен живот во Центар и нашата битка заедно со ‘Независни заедно’ е отпор против воспоставените антивредности на коруцпија и клиентелизам, кои нè доведоа до оваа ситуација. Ние со вашата поддршка ќе ја вратиме моќта кај граѓаните и нивното достоинство затоа што институциите треба да ни служам нам, а не на центрите чиј интерес е профитот. Јас навреме ќе ве информирам за ситуацијата во врска со оваа кривична пријава, но, секако, адреса на информирање е и Обвнителството како е надлежна институција“, напиша Ивановска.

Во врска со пријавата против Ивановска, Обвинителството соопшти:

„Јавен обвинител од Основното јавно обвинителство Скопје постапува по приватна кривична пријава поднесена на 18.2.2025 година и презема дејства за да ги провери наводите. Како едно од дејствата е испитување на наведеното лице, кое во периодот на кој се однесува пријавата била претседателка на ДКСК. Поканата за испитување од Обвинителството е испратена на 25.7.2025 година и на ниеден начин не може да се доведе во релација со политичките активности на поканетата“.