Македонија и Грција имаат различни позиции, но има основа за да се дојде до решение, изјави денеска Метју Нимиц по средбата со грчкиот алтернативен министер за надворешни работи Димитрис Друцас и преговарачот Адаматиос Василакис.

Откако го слушна ставот на македонската влада медијаторот денеска се запозна со позициите на Грција. „Позициите во Скопје и позициите овде во Атина, очигледно е дека се различни. Луѓето имаат различен национален интерес. Но,верувам дека постои основа за изнаоѓање на решение“, изјави Нимиц Тој смета дека според резолуцијата на ОН потребно е да се дојде до решение за името на земјата која во моментот го користи привременото Поранешна Југословенска Република Македонија.„Целта од секогаш била да се најде име за државата. Другите доаѓаат другите прашања што се појавија во изминатите години“, вели Метју Нимиц. И од грчкото МНР велат дека прво треба да се реши името на земјата. Оттаму велат дека идентитетот и јазикот се алатки на премиерот Груевски за да избегне да преговара за името на земјата.,,Позитивната порака што ја праќа Грција почнува да се разбира. Се надеваме дека позитивните промени ќе бидат пренесени и на преговарачката маса“, изјави портпаролот на грчкото МНР Грегори Делавекурас.Грчката страна е задоволна од средбата со Нимиц. Во позитивниот и искрен дијалог Нимиц, ги известил за средбите во Скопје и рекол дека процесот би можел да се придвижи кон конечно решение. По посетите на Скопје и Атина, медијаторот се уште не одлучил кој ќе биде неговиот следен чекор. Дали ќе ги свика преговарачите на заедничка средба во Њујорк или повторно ќе ги посети двете земји.