Трите најголеми политички групи во Европскиот парламент го поддржаа предлогот да се отстранат термините „македонски идентитет“ и „македонски јазик“ од извештајот за Северна Македонија, потврдува бугарскиот европратеник, Андреј Ковачев по пишувањата на бугарските медиуми.

Тој рече дека на барање на групата на Европската народна партија (ЕНП), трите најголеми политички сили во Европскиот парламент – ЕНП, Социјалдемократите (С&Д) и Обнови ја Европа (Либералите) – синоќа се согласиле да ги отстранат сите референци на „македонски идентитет“ и „македонски јазик“ од нацрт-извештајот за напредокот на Северна Македонија.

Очекувањата се дека на пленарната седница следната недела мнозинството во Европскиот парламент ќе го поддржи овој амандман.

Ковачев истакна дека за темите за идентитетот и јазикот нема место во извештај за напредокот на земја-кандидат за членство во Европската Унија, бидејќи тие само водат кон поделби и отворање на „Пандорината кутија“.

Тој додаде дека целта на власта во Скопје е, пред локалните избори, да прикажат некаква „неверојатна триумфална победа“ над „источниот сосед“.

Ковачев рече дека Република Северна Македонија треба да го почитува потпишаниот договор со Бугарија и да ја деблокира работата на историската комисија, бидејќи тоа е местото каде треба да се дискутира за заедничката историја, како што е утврдено во договорот.

Тој изрази благодарност до сите колеги од сите политички групи во Европскиот парламент, особено до бугарските, за единствената позиција по ова прашање.

Премиерот Христијан Мицкоски, претходно денес го опиша бришењето на термините „македонски јазик“ и „македонски идентитет“, подеднакво лошо како и обидите да се стави придавката „модерен“ пред јазикот и идентитетот.

Рече и дека уште еднаш се покажало и се докажало на јавната сцена оти не се работи за само неколку стотини Бугари во Уставот, туку е многу, многу подлабоко. Тој побара да се извинат сите што досега убедуваа дека ако само се смени Уставот, нема да имаме проблеми.

Мицкоски рече и дека бришењето на македонскиот јазик и на идентитетот од извештајот е направено на талибански начин.

Извештајот треба да се гласа на пленарната седница на Европскиот парламент на 8 јули, а бугарските европратеници очекуваат поддршка од мнозинството за овој амандман.

Владата во мај годинава како голема победа на македонската дипломатија го претстави спомнувањето на македонскиот јазик и на идентитетот на четири места во извештајот за напредокот на земјата. Уште една победа нашата Влада прогласи кога нацрт-извештајот помина на комисија без измени и покрај барањето на бугарските европратеници пред македонскиот идентитет и пред јазикот да стои зборот „сегашен“.

Целосното исклучување на Албанците од 32 нови вработувања во Централниот регистар е јасен доказ за институционална дискриминација и исклучувачките политики на оваа влада, реагираат од ДУИ.

„Ова веќе не е статистика, ова е аларм. Се инсталира систем кој ги избрише Албанците од јавните институции. Тоа се случува секој ден, во секој сектор, и веќе не може да се толерира“.

ДУИ бара итна реакција од сите домашни и меѓународни институции. Тоа, како што велат, не е прашање на вработување, туку е прашање на еднаквост, мир и опстанок на мултиетничката држава.

Ваквата неправда, како што најавуваат, нема да помине во тишина.

ТАВ Македонија и Визер, на дојдовниот лет од Дортмунд, заеднички го пречекаа 15 милионитиот патник на оваа нискобуџетна авиокомпанија во земјава, од нивниот влез на пазарот во 2011 година досега.

Во знак на благодарност за лојалноста на патничката, ТАВ Македонија и подари патнички реквизити, а Визер и додели вредносен ваучер за авиобилети за дестинација која таа самата ќе ја избере.

„Во годината кога ја одбележуваме нашата 15 годишнина на пазарот, денеска го наградивме 15-милионитиот патник на Виз ер и со тоа ја прославивме нашата 14 годишна плодна партнерска соработка со овој авиопревозник, кој лета до вкупно 30 дестинации и 12 земји од Меѓународниот Аеродром Скопје и Аеродромот Свети Апостол Павле Охрид. Заедно со нив и со Владата, продолжуваме заеднички да работиме на проширување на мрежата на авиолинии од двата македонски аеродроми, правејќи ја Европа и светот поблиски како за македонските граѓани, така и за граѓаните од околните земји”, изјави Неџат Курт, генерален директор на ТАВ Македонија.

ТАВ Македонија, подружница на ТАВ Аеродроми, која е членка на француската групација АДП (Aeroports de Paris), партнерството со нискобуџетната унгарска авиокомпанија, Виз ер, го почна во јуни 2011 година, со првиот лет од Меѓународниот Аеродром Скопје до аеродромот Лутон-Лондон.

Во јули 2015 година, Виз ер почна со летови и од охридскиот аеродром, со летот од Охрид кон Базел.

Виз ер денес има база од пет авиони на Меѓународниот Аеродром Скопје и опслужува 30 дестинации до 12 земји до и од нашата земја, со пазарен удел од над 46%, со што е најголемиот авиопревозник на македонскиот пазар.

„Достигнувањето на 15 милиони патници во Северна Македонија е извонреден успех и доказ за нашата силна врска со ТАВ Македонија и нашите патници тука. Како лидери на пазарот, нудејќи летови до 30 дестинации од оваа земја, горди сме што играме клучна улога во поддршката на економскиот раст, како и во отворањето врати за деловни можности и охрабрувањето на посетителите да ја истражат богатата култура и прекрасните пејзажи на Северна Македонија. Возбудени сме што денес го прославуваме овој пресврт со среќниот патник и остануваме посветени на обезбедување ниски цени, сигурна услуга и повозбудливи можности за патување за сите во оваа земја.“ – изјави Андраш Радо, раководител за комуникации во Виз Ер.

Во 2024 година Визер превезе 1,8 милиони патници преку двата македонски аеродрома, Меѓународниот Аеродром Скопје и Аеродромот Свети Апостол Павле Охрид, а според бројот на патници, најфрекфентни рути на Виз ер се авиолиниите од Скопје до Милуз, Дортмунд, Мемингем и Берлин.

ТАВ Македонија и Виз ер и натаму продолжуваат партнерски да работат, со развивање на мрежата на авиолинии од скопскиот и охридскиот аеродром, зголемување на бројот и понудата на дестинации според барањата на патниците, со цел поголема достапност кон Европа и светот за македонските граѓани, како и за граѓаните на соседните држави.