Со воведувањето на новите концепции за средното стручно образование, целосно се заокружува реформата на средното образование, заклучи денеска Министерот за образование и наука, Никола Тодоров

„Целосно се заокружува реформата на средното образование, имаме образование за стручно оспособување – до двегодишното средно образование, имаме тригодишно стручно образование и стручно образование кое е четиригодишно, а првпат се воведува и концептот на пост средно образование,“ изјави Тодоров кој додаде дека сите овие концепции и сите овие нивоа на образование се познати, признати и се користат во поголемиот дел на европските образовни системи.„На овој начин и Македонија се приклучува во семејството на реформирани европски образовни системи особено во делот на средното стручно образование,“ рече Тодоров.Министерот информираше дека од вкупно 21 илјади ученици, околу 8.500 ученици се запишуваат во гимназиското образование, околу 13 илјад се запишуваат во средното стручно образование а само 1.700 ученици се запишуваат во тригодишното средно стручно образование, и практично истиот овој процент можеби и помал, ќе биде на оние кои ќе се запишуваат во додвегодишното образование. „Ова се однесува на оние кои испаѓаат од системот. Кога ќе испадне некој од системот на четиригодишното или од тригодишното образование ќе може да биде вклучен на двегодишно или едногодишно образование,“ рече Тодоров. Тој смета дека има определена категорија на ученици кои имаат проблеми во проодноста во основното образование и нивното вклучување во тригодишното или четиригодишното образование само го обременува системот, и го прави целиот процес на образование потежок за целата околина и затоа овие ученици најчесто ќе се одлучуваат за двегодишно или едногодишно стручно оспособување.Се очекува новите концепции во образованието да започнат од следната учебна година.Стручното оспособување е наменето за учениците кои по завршувањето на основното училиште, нема да ја продолжат својата едукација во гимназиско или во некој друг вид и ниво на стручно образование четиригодишно или тригодишно. Од министерството велат дека на овој начин се продолжува задолжителното образование по завршувањето на основното образование односно се задоволува принципот за задолжително средно образование и стекнување на образование за прво занимање. Наставните планови ќе овозможат проодност кон повисоки нивоа на образование. Со оваа концепција се предвидува зголемен фонд на практична настава за сметка на теоретска настава, што е и една европска ориентација на стручното образование, сметаат од МОН.Стручното образование за занимања – тригодишно средно образование, на младите и возрасните им дава можност да се стекнат со стручни квалификации односно релевантни компетенции неопходни за вработување и работа во определено подрачје на струката. Оваа концепција ги содржи сите образовни компоненти и соодветствува на потребите на пазарот на трудот и дава можност за проодност кон техничко, пост средно и високо образование, велат од МОН. Предвидува зголемување на фондот на часови за практична настава на 50 отсто од вкупниот фонд на часови.Пост средното образование овозможува стекнување на квалификации кои се наоѓаат во просторот меѓу средното стручно и високото образование.„Оваа концепција дава продлабочени знаења и компетенции релевантни за пазарот на трудот и обезбедување на можности за напредување во натамошно образование особено во високото стручно образование,“ рече Тодоров кој додаде дека оваа концепција се воведува бидејќи постојната програмска структура на постсредното образование не одговараат на потребите на пазарот на трудот и на современите тенденции.