Народот масовно излезе на улица и побара избори. Груевски има една единствена опција. Да го прифати тоа што го бара народот и да биде поразен на предвремени избори, рече денеска потпретседателот на СДСМ Гордан Георгиев.

Според опозициската СДСМ на протестниот марш имало над 50 илјади луѓе, кои како што рече Георгиев излегле масовно на улица за да се спротивстават на режимот на Груевски.

„Колку и да се трудеше ВМРО ДПМНЕ преку негативна и мизерна кампања, прес конференции, мрачни сценарија, приземни графити и флаери да ги одврати и заплаши граѓаните од протестниот марш, во тоа не успеа. Вчера на режимот на Груевски и ВМРО-ДПМНЕ му се случи народ“, рече Георгиев.

Тој информираше дека вчера во Собранието влегле единствено пратениците на СДСМ и опозициониот фронт.

„Предложивме конкретни  пакет решенија за соборување на ненародниот и криминален режим на Никола Груевски на предвремени парламентарни избори. Тоа е вистинскиот глас на народот“, рече потпретседателот на СДСМ.

Партиите кои се дел од владејачкото мнозинство велат дека се подготвени за предвремени избори, но според нив тоа не е решение и нема да помогне за излез од кризата.„Ќе ја разгледаме иницијативата за распуштање на Парламентот, како политичка партија сме подготвени во секое време да одиме на избори па, ако треба и на предвремени. Сметаме дека ова е период во кој што во земјата сите политички фактори треба да се обединат и да ја надминат блокадата која што ја предизвикана од нерешениот спор за името“, изјави Ермира Мехмети од ДУИ.

Според неа предвремени избори нема да има, доколку нема решение за името, а како што рече опозицијата нема понудено конкретно решение.

Претседателот на Демократскиот сојуз Павле Трајанов смета дека не е време за предвремени избори, иако се целосно подготвени да се соочат со народот.

„Демократскиот сојуз смета дека не е време за предвремени избори но, исто така сме подготвени да се соочиме со граѓаните бидејќи рејтинзите ни се познати. СДСМ повторно ќе се соочи со пораз. Предвремените избори не се решение за излез од кризата“, рече Трајанов.

Од албанската опозициска партија, Нова Демократија велат дека оваа Влада треба да се детронизира, затоа што оваа како што посочуваат тие е влада на изолација, на дестабилизирање на меѓуетничките односи, антиалбанска влада, влада на коалиција на лични интереси./крај/бд