Комитетот за надворешна политика на Европскиот Парламент ја започна дискусија по нацрт-резолуцијата подготвена од страна на словенечкиот европратеник Зоран Талер, базирана на минатогодишниот извештај на Европската Комисија за напредокот на земјата.Талер во резолуцијата бара одредување на датум за старт на пристапните преговори на Македонија со Европската Унија. Во својата денешна дискусија ги посочи областите набројани и во нацрт-резолуцијата, на кои Македонија треба да работи во следниот период – состојбата во медиумите, реформата на јавната администрација и состојбата во медиумите.Холандскиот пратеник, Јоханес Корнелис ван Бален упати критики до Талер, забележувајќи му дека резолуцијата ја напишал со политичка диоптрија на социјалдемократ.Британецот Чарл Тенок, пак, упати забелешка на Талер за пофалните зборови што ги упатил до евроамбасадорот Ерван Фуере, посочувајќи дека еден дипломат не треба да се меша во внатрешните работи на една земја. Германскиот и словачкиот пратеник, Елмар Брок и Едуард Кукан во дебатата упатија повик до опозицијата за нејзино враќање во македонското Собрание. Словенецот Јелко Кацин, пак, ги повика македонските политички лидери да го потпомогнат процесот на проширување со испраќање на позитивни сигнали до Брисел и ги повика самите да се запрашаат зошто земјата не добива датум за преговори веќе шестта година по ред.Грчката пратеничка, Елени Марија Копа, застанувајќи во одбрана на својата земја, ја обвини Македонија дека нема намера да попушти во спорот со името. Во нејзината дискусија таа посочила дека земјата не ги исполнува Копенхашките критериуми за членство во однос на медиумите и судството. Дебатата во комитетот се одвива паралелно со формирањето на неформалната група „Пријатели на Македонија“ во Европскиот Парламент, чија основна цел ќе биде поддршка на европската интеграција на Македонија. /крај/со/ач