Грција побара Меѓународниот суд на правдата во Хаг да се прогласи за ненадлежен по тужбата на Македонија против неа, а доколку пак одлучува по неа, да ја прогласи за неоснована.

Ова е финалното барање искажано од застапникот Јоргос Савидес, со што заврши усната расправа од судскиот процес.Савидес остана на тврдењето дека тужбата не е одвоена од спорот со името и поради тоа судот не треба по неа да одлучува. Посочи дека немало приговор од грчка страна на македонското членство во НАТО.„Грција покажа, доколку се чита правилно, дека дејствијата што и се препишуваат од страна на подносителот (Македонија) не претставуваат приговор. Ова не затоа што Грција требало да го поддржи членството на подносителот во НАТО во 2008-ма година, туку поради причини коишто се добро наведени, земајќи ги предвид критериумите на НАТО за членство, подносителот не беше поканет да се зачлени во НАТО и затоа што процедурата во НАТО е заснована на консензус“, рече Савидес.Претходно, застапниците на Грција тврдеа дека Македонија со Времената спогодба и со резолуцијата 817 на Советот за безбедност на Обединетите Нации се обврзала да не го користи уставното име.„Грција се обврзала себе си да го ословува подносителот само според привремената референца. Треба да веруваме дека оваа обврска се однесува и на подносителот (Македонија). Подносителот се обврза и истото го потпиша да не користи друго име. Во спротивно, втората страна од став 1 од членот 11 е неважна“, рече професорот Алан Пелет.Грчката страна остана на тврдењето дека со ова Македонија ја поткопува привремената спогодба.„Она што се случува од 1995-та, или она што спроведува подносителот (Македонија) од 1995-та година се прекршувања, инсистирајќи на употребата на уставното име во меѓународните организации, прекршувајќи ја обврската која ја има при приемот во тие организации, спроведувајќи една стратегија која што е точно објаснета од претседателот на подносителот во своето обраќање пред парламентот. Со тоа се покажува целосен недостаток на волја за суштински преговори и тоа значи спроведување на една имплицинтна стратегија со која се поткопуваат преговорите“, рече професорот Џорџ Аби-Сааб.Со денешниот настап на грчкиот правен тим, финишираше усната расправа по тужбата на Македонија против Грција пред МСП во Хаг. По ова, судот се повлекува се до донесувањето на конечната одлука. Се очекува таа да биде соопштена најдоцна наесен. Целта на тужбеното барање е судот да утврди дека Грција на самитот на НАТО во Букурешт во 2008-ма година го прекршила членот 11 од привремената спогодба од 1995 година, односно дека приговорила на членството на земјата во Алијансата под привремената референца „Поранешна Југословенска Република Македонија“. Од судот, исто така, се бара на Грција да и наложи понатаму да не ја прекршува спогодбата. Тужбата се образложува и со фактот што во заклучокот од самитот посветен на земјата, се вели дека Македонија ги исполнила критериумите за членство во НАТО, но и дека не е постигната согласност поради тоа што една-земја членка се повикала на спорот со името. Тужбата беше поднесена во ноември 2008-ма година.