Судскиот совет ја одложи расправата за случајот со поранешниот претседател на Апелациониот суд во Скопје, Јордан Митриновски, за кој е побарано разрешување

Причина за презакажувањето на седницата е лошата здравствена состојба на поранешниот пртседател на Апелацискиот суд Скопје, Јордан Митриновски. Неговиот адвокат Ефто Спировски пред петчлениот совет појасни и даде документација дека Митриновски има ангина пекторис, проблеми со срцето и со рамнотежата со психата. Според адвокатот ваквата здравствена состојба на судијата Митриновски е по настаните околу случајот кога тој одлучи, а Врховниот суд му ја преиначи одлуката – босот на цигарите Бајруш Сејдии да биде пуштен од притвор. Поради таа одлука Претседателот на Врховниот суд, Јово Вангеловски, поднесе барање до Судскиот совет да се разгледа работата на Митриновски да се одлучи дали тој ќе биде разрешен од судија.  Седницата траеше половина час за кое време членовите на советот одлучуваа дали да ја одложат седницата на која и самиот Митриновски сака да присуствува и да ја каже вистината за предметот со Бајруш. Советот реши да ја одложи седницата со напомена дека следно одложување нема да има и седницата ќе се одржи и без Митриновски бидејќи неговото присуство не е задолжително, а веќе една седница била одложена на која тој не споменал дека има здравствени проблеми. На ова жестоко реагираше неговиот адвокат кој ги обвини членовите на советот дека се сомневаат во здравјето на нивни колега кој доколку му се влоши уште повеќе здравствена состојба може да се случи и најлошото. Адвокатот пред медиумите изјави дека оставката од претседателското место Митриновски ја дал под силен притисок и закани за неговото семејство од високи судски структури. “Aко неколкупати се сугерира Митриновски да даде оставка , може да се заклучи дека одлуката е донесена. За да комисијата си ја покрие работата иако е на мислење дека нема потреба од разрешување, тогаш најлесно е да си даде оставка. Потешко би им било без оставка да го разрешат на очигледно законска работа”, изјави адвокатот Спировски. Тој најави дека Митриновски на судскиот совет ќе му достави десетина слични одлуки кои се законски за кои никој не повел постапка. „Постапката е законска, а за какви и да се притисоци и закани не сум информиран. Доколку ги има како и за сите така би постапиле и за Митриновски”, изјави подносителот на пријавата претседателот на Врховниот суд Јово Вангеловски.