Градоначалникот на општина Гази Баба, Тони Трајковски го одби повикот за јавна дебата на пратеникот и лидер на ПЕИ, Фијат Цаноски. Тој не гледа причина од јавни дебати, кога Цаноски ги одбегнувал сите форми

Градоначалникот на општина Гази Баба, Тони Трајковски го одби повикот за јавна дебата на пратеникот и лидер на ПЕИ, Фијат Цаноски. Тој не гледа причина од јавни дебати, кога Цаноски ги одбегнувал сите форми на институционален дијалог.

„Не гледам рационална причина за дебата која ќе се одвива надвор од институциите, затоа што таква форма на комуникација ќе го симне нивото на општествена дебата и освен непотребни драматуршки ефекти не носи ништо продуктивно, напротив таа однапред е беспредметна затоа што нема институционална поткрепа ниту ефект“ се вели во реакцијата од општина Гази Баба

Цаноски, чиј комплекс „Космос“ од минатата недела се руши, претходно го повика градоначалникот на општина Гази Баба, Тони Трајковски, јавно на било кој медиум да ги соочат фактите во врска со изградбата на „Космос“, за кои Цаноски тврди дека е законска, а Трајковски дека е незаконска.

„Доколку не се осмелите и не сакате јавно и отворено да ги чуете нашите ставови и да ја видите реално целата документација која е правен доказ за законитоста на целиот проект, на јавноста ќе и станат јасни Вашите намери. Г-дине Трајковски, со Вашите невистинити тврдења дали се обидувате повторно да ја одработите кампањата за следните локални избори? Сепак, желбите и намерите се една работа, а реалноста друга, бидејќи во Р.Македонија постојат закони и Устав кои ни Вие не можете да ги избегнете“ се вели во отвореното писмо на Цаноски до медиумите.

Комплексот “Космос“ почна да се руши минатата недела бидејќи целиот објект, според општина Гази Баба, бил надвор од рамките на проектот што го добил одобрението за градба што го издале службите на Општина Гази Баба./крај/фф