Над 130 закони и законски измени се усвоени во последните 10 години како последица на потпишувањето на Охридскиот рамковен договор, покажува публикацијата „Студии на случај“, промовирана денеска од страна на Македонскиот Центар за меѓународна соработка.

Над 130 закони и законски измени се усвоени во последните 10 години како последица на потпишувањето на Охридскиот рамковен договор, покажува публикацијата „Студии на случај“, промовирана денеска од страна на Македонскиот Центар за меѓународна соработка.Во неа, преку 19 студии на случај, се обработуваат одредени аспекти од спроведувањето на Охридскиот рамковен договор, во пресрет на 10-годишнината од неговото потпишување.Во една од студиите се констатира дека во најголем дел е заокружена законската рамка предвидена со договорот. Најголемиот дел се однесуваат на закони за недискриминација и правична застапеност. Се констатира и носењето закони повеќе од предвиденото.„Во многу случаи, се донесени и повеќе од потребните закони, во области каде што не беше предвидено донесување закони. Секако, ова е направено врз основа на поглавјето 10 од Охридскиот рамковен договор, кој има општ став дека треба да се донесат и други закони со цел да се докомплетира и да се спроведе целосно Охридскиот рамковен договор“, изјави Фисник Шабани, автор на студијата „Правна рамка: Сеопфатен преглед на закони за спроведување на ОРД“.Во однос на финансирањето на општините, се забележува зголемување на приходите на општините. Меѓутоа, се констатира дека единиците на локалната самоуправа во голема мера се зависни од трансферите од централната власт, особено во однос на распределбата на ДДВ.„И покрај тоа што се забележува вакво зголемување на сопствените приходи, исто така, се забележува повисоки планирани споредено со реализирани приходи, што значи дека општините не остваруваат доволна наплата. Она што го добиваат од централната власта и за општините најзначајни се трансферите од ДДВ. Во периодот на истражување, општините успеале да обезбедат повисок процент на ДДВ што ќе им се доделува нив“, изјави Благородна Ампова, автор на студијата „Финансиската децентрализација од 2005 година до мај 2011 година“. Во однос на употребата на јазиците на помалите етнички заедници на локално ниво, во дел од општините се забележува употреба на јазици на заедници што се со застапеност под 20 отсто.Таков е случајот со Гостивар, каде покрај македонскиот и албанскиот се користи и турскиот јазик и општина Куманово, каде се употребуваат и српскиот и ромскиот јазик. „Постои еден вид непрецизираност во законската рамка и студијата тоа го сфати како една позитивна околност, бидејќи тоа им дозволува на општините да скројат еден модел на јазична политика кој ќе биде соодветен за нив“, изјави Јован Близнаковски, автор на студијата „ Локална јазична политика за заедниците под 20 отсто, случаите на Гостивар и Куманово“.Публикацијата презентирана денеска е дел од пошироко истражување на МЦМС посветено на јубилејот 10 години од потпишувањето на рамковниот договор. /крај/ач