„Црвената фурија“ со многу помал напор дојде до триумф во денешното финале против Франција (98-85) отколку што и’ требаше за да ја совлада Македонија во завчерашното полуфинале

Кошаркарската репрезентација на Македонија можеби е четвртопласирана на Европското првенство (ЕП) во Литванија, но може да се пофали дека му дала најсилен отпор на новиот шампион Шпанија, која во вечерашното големо финале без апсолутно никакви проблеми ја надигра Франција (98-85).

Нашите жолто-црвени цели 35 минути беа рамноправен противник против „црвената фурија“ во завчерашниот полуфинален дуел во Литванија, додека француските кошаркари го положија оружјето пред моќните Шпанци уште на крајот од првата четвртина. Резултатска неизвесност воопшто немаше во финалната пресметка, а единствена непознаница беше со колку разлика ќе заврши натпреварот во корист на големата Шпанија.

За четата на селекторот Серџо Скариоло ова е втор триумф на едно ЕП по ред, со што уште еднаш ја потврди доминацијата на стариот континент и епитетот на најдобра светска кошаркарска велесила по САД.

Доказ за тоа колку добро одигра „фуријата“ е фактот што имаше дури пет кошаркари во таборот на оваа селекција со двоцифрен поентерски учинок. Крвникот на Македонија, Хуан-Карлос Наваро, и овој пат беше прва ѕвезда во тимот на шампионот со постигнати 27 поени (12/12 од слободните фрлања). Пау Гасол и Хозе Калдерон реализираа по 17 поени, Руди Фернандез имаше 14 поени, додека Марк Гасол мечот го заврши со 11 поени. Тони Паркер со 26 поени беше прва фигура во таборот на Франција.