Владата размислува за дополнителни даноци за немажени и неженети, соопшти премиерот Христијан Мицкоски, говорејќи дека е време за држава каде што ќе се раѓаат повеќе деца, младите ќе стапуваат во брак, а отселените ќе се вратат.

Неговото обраќање, посветено на прашањето за падот на наталитетот, стареењето на населението и иселувањето, ја стави во фокусот демографската рецесија, која ја нарече тивка, долготрајна, системска и глобална криза.

Тој нагласи дека ова не е проблем само на Македонија, туку предизвик со кој се соочуваат и држави како Германија, Италија, Бугарија, Јапонија и Јужна Кореја, каде што се раѓаат се помалку деца, населението старее, а младите се сè почесто во потрага по подобар живот надвор од границите.

„И ние не сме исклучок. Но, нашата состојба е посебна. Затоа што додека некои држави ја забележуваат оваа појава како тренд, кај нас таа е аларм“, оцени Мицкоски.

Факти што, според Мицкоски, не смеат да се игнорираат:

-Во 2024 година, се родија 16.061 дете, а починаа 20.201 лице. Тоа е природен пад од 4.140 луѓе за само една година;

-Во последните 4 години, изгубивме повеќе од 33.000 жители- како да исчезна еден град од големина на Кавадарци или Кичево;

-Стапката на наталитет падна од 12,5 проценти во 2010 година на само 8,8 отсто во 2024;

-Во многу општини и села веќе нема ниту прво одделение;

-Сè повеќе луѓе живеат сами. Сè помалку се женат, сè помалку деца се раѓаат.

„Ова не се само бројки. Ова е тишина што се шири“, додаде премиерот.

„Оваа Влада не го премолчува проблемот“

Мицкоски рече дека оваа Влада го именува проблемот, го признава и се бори со него.

„Тоа не е борба со едно министерство. Тоа е борба на сите нас. Борба што се води во градинките, во училиштата, во родилиштата, во домовите, во иселеничките клубови, на граничните премини каде се простуваат мајки и синови.“

Се размислува за дополнителни даноци за немажени и неженети

Главните цели, според Мицкоски, се: да се направи животот овде вреден; мајчинството да биде благослов, а не товар; да им се даде причина на младите да останат; да се изградат институции што ќе ја негуваат младоста; да се изгради држава „во која надежта е поважна од пасошот.

„И тука сериозно размислуваме, рече премиерот, за дополнителни даноци за немажени и неженети“, додаде тој.

Премиерот порача дека „нема ништо потажно од тоа што денес нашата држава тивко се празни. Но исто така – нема ништо похрабро од народ што се буди.“

„Време е за  држава во која ќе се раѓаат повеќе деца“

„Време е. Време е за држава – каде што ќе се раѓаат повеќе деца, тоа ни е главниот императив, повеќе млади да стапуваат во брак и да се раѓаат повеќе деца, а оние кои што се отселени да се вратат. Затоа што само така ќе се живее со повеќе срце.“

На крајот го цитираше филозофот Едгар Морен: „Демографијата не е судбина – туку огледало. Прашањето е: што ќе видиме во него и дали ќе имаме храброст да дејствуваме.“

По повод една година од формирањето на Владата, министерот за локална самоуправа Златко Перински нагласи дека Министерството ја потврдило својата улога како двигател на рамномерен развој и партнер на секоја општина и секој граѓанин.

„Направивме реална проценка на состојбите на терен и увидовме дека на општините им е потребен енергетски поттик за да се заживее локалната економија и да се подобри инфраструктурата“, истакна Перински.

Рекордна распределба на јавни средства

Преку Потпрограмата АА за инфраструктурни проекти во општините, беа аплицирани околу 1200 капитални проекти, со вкупна инвестиција од 20 милијарди денари. Во рамки на првиот јавен повик за 2024 година се финансирани 288 проекти, а на вториот повик се одобрени 829 проекти во вредност од речиси 14 милијарди денари.

Поддршка за рамномерен развој

Во 2024 и 2025 година, преку Програмата за рамномерен регионален развој, се поддржани 176 проекти насочени кон подобрување на состојбите во планските региони, селата и урбаните средини. Дополнително, преку Програмата за намалување на регионалните диспаритети, одобрени се 38 проекти во вредност од над 87 милиони денари.

Во партнерство со Швајцарската агенција за развој и соработка, завршени се 10 регионални проекти, меѓу кои реконструкција на болници, домови за стари лица и превенција од пожари.

Дигитализација и ЕУ-поддршка

Министерството активно работи на дигитализација на општинските услуги, во координација со Министерството за дигитална трансформација. Паралелно, во соработка со Делегацијата на ЕУ, се спроведуваат осум проекти во финална фаза со вкупна вредност од над 336 милиони денари – меѓу нив: „Чист Аеродром“, „Зелена Општина Охрид“ и „Паметен велосипедски град Струмица“.

Законски измени и нови иницијативи

Завршена е постапката за измена на Законот за локална самоуправа, со акцент на локалната демократија и можноста за отповикување на градоначалник, во согласност со препораките на Венецијанската комисија.

Покрај тоа, Министерството работи на формирање Ресурсен центар за поддршка на општините, со фокус на административна обука, проектен менаџмент и дигитална трансформација. За оваа намена се предвидени 5 милиони денари.

Преку ИПА 3 – проекти со соседите

Активни се програми за прекугранична соработка со пет соседни земји – Грција, Бугарија, Србија, Албанија и Косово. Како стратешки важни, Перински ги издвои проектите за граничните премини Клепало и Маркова Нога, со потенцијал за економски развој и поттикнување на туризмот.

„Сѐ што спроведовме оваа година е насочено кон унапредување на квалитетот на живот на сите граѓани. Ќе продолжиме посветено да одговараме на нивните реални потреби и очекувања“, порача министерот Перински.

Министерството за здравство ја информира јавноста дека во согласност со прогнозите од УХМР и врз основа на акцискиот план за превенирање на последиците од топлотни бранови врз здравјето на населението 2025 – 2030 година, почнувајќи од денеска (петок, 4 јули), се активира фаза 3, што ќе трае до 8 јули, вторник.

На предлог на Министерството, Владата ги донесе следните препораки:

– Ослободување од работни обврски бремени жени и лица постари од 60 години. Оваа препорака не се однесува на вработени во критичната инфраструктура (здравство, полиција, армија, транспорт, енергетика, јавни комунални претпријатија);

– Одложување на работниот процес во критичните часови (11 – 17 часот) за работници изложени на директна топлина;

– Работа од далечина, флексибилно или двократно работно време, каде што е изводливо;

– Работодавците да обезбедат микроклиматски услови за работа во согласност со акцискиот план: простории со температура до 25°C, освен таму каде што природата на работниот процес налага поинаку;

– Активирање планови за вонредни услови, сите здравствени установи, установи за згрижување стари лица и образовни институции да постапат во согласност со интерните протоколи за кризна состојба.

Извор: УХРМ

До вторник ќе се задржи многу топло време со дневна температура насекаде над 30°C, а наместа ќе надминува 40°C. Во недела во попладневните и вечерните часови ќе има услови за локална нестабилна облачност со пороен дожд и грмежи.

Во среда и четврток ќе дува засилен северен ветер, кој ќе предизвика значително опаѓање на дневната температура.