Нови 54 лекови, со третата ревизија, се тргнати од листата лекови со доплата, со што се стигнува до бројка од 382 лека за кои не треба доплата, информира директорката на ФЗОМ, Маја Парнарџиева Змејкова.

Со оваа нова одлука се намалува бројот на лекови со доплата до 50 денари.

Фондот за здравствено осигурување на Македонија утврди нови референтни цени за лекови од Листата на лекови кои паѓаат на товар на Фондот, усогласени со цените на лековите во регионот и новите единствени одобрени цени на лекови во Македонија и без доплата од осигурениците.

Новите референтни цени на лекови треба да почнат да се применуваат од 1 јули, односно по добивање согласност од министерот за здравство.

Лекови без доплата и лек на доплата од нула до 50 денари, во Македонија има околу 700 лека од вкупно 900 кои или немаат доплата или имаат доплата од еден до 50 денари.

„Дваесет лека помалку имаат доплата од 50 до 100 денари, од 100 до 500 денари сто лека имаат намалена доплата, намалување за 11 лека за доплата има од 500 до 1.000 денари, а намалување за 13 лека за доплата од 1.000 до 2.000 денари. Остануваат само четири лека со ваква доплата. Нема лекови со доплата од две до три илјади денари, а порано имаше. Еден лек останува, а претходно биле 13 кои имале доплата над 3.000 денари“, објасни Парнарџиева Змејкова.

Според неа намерата е да има се повеќе лекови без доплата, а оние со доплата значително да се намалуваат, и тоа не како бројка туку и како скали на доплата.

„Бројни производители кога видоа како нивните конкурентни ги намалиле цените на лековите, ни најавија дека сега веќе комуницираат со своите централи и ги прават анализите и тие уште да ги намалат цените. Тоа значи дека овој бран ќе предизвика уште неколку подобрување во некои сегменти во некои генерики“, рече Парнарџиева Змејкова.

Овие цени на лековите се намалени од аспект на Фондот, а не од аспект на осигурениците./крај/мф