По неколкуте несрeќи што се случија во Охридското Езеро деновиве, кога пливачи настрадаа од скутери, министерот за транспорт и врски Миле Јанакиески најави дека може рокот за забрана за возење да се помести за среда јули, наместо 20 јули.

„Денеска на седница на Влада ќе го отворам ова прашање за порано воведување на мерката за скутерите. Оваа година имаме потопла сезона, затоа луѓето порано ги возат скутерите, но денеска имаме седница на влада, доколку Владата одлучи да се помести границата, односно место 20 да биде со денешен датум, благовремено ќе ве информираме“, рече Јанакиески, на прес-конференција.

Тој најави дека во четврток, Министерството за транспорт и врски во соработка со повеќе релевантни институции од локално и од државно ниво ќе вршат контрола на плажите и на охридското и на струшкото крајбрежје.

„Бидејќи Општина Струга ги презеде надлежностите за градежното земјиште, апелирам до градоначалникот на Струга, Рамиз Мерко да ги зајакне контролите на струшките плажи“, рече Јанакиески.

По обвинувањата дека во летната сезона власта не назначува капетан во Капетанијата во Охрид, Јанакиески повика да не се политизира ова прашање.

„Капетанијата функционира без застој, бидејќи во меѓувреме јас овластив повеќе лица за различни работи кои ги обавува капетанијата. Да не се користи за политички цели капетанијата, затоа што функционира со целиот свој капацитет, а наскоро кога ќе завршат сите процедури, ќе се назначи и капетан“, додаде Јанакиески.

Инаку, претходните денови, од скутер беше повреден турист од тетовско кој се сончал на педалинка, а во друг случај девојче од тетовско беше повредено додека пливало во водите на Охридското Езеро.

Инаку, забрана за скутери на целата површина на Охридски, Преспанско и Дојранско езеро, важи од 20 јули до 20 август во периодот од 11.00 до 16.00 часот секој ден.

Со неа се предвидува забрана за пловење на пловни објекти кои се со јачина поголема од 45 киловати и кои можат да превезуваат максимум 3 лица./крај/мф/бб