Македонија
Џафери: Македонија подготвена да го сподели своето знаење и искуство со БиХ

Република Македонија безрезервно ја поддржува Босна и Херцеговина и изразува подготвеност за пренесување на сите искуства и научени лекции, е пораката што министерот за одбрана Талат Џафери ја упати за време на престојот во средата во Сараево.
Во текот на посетата министерот Џафери оствари средба со министерот за одбрана на Босна и Херцеговина, Зекеријах Осмиќ на која стана збор за одличните односи и плодната соработка помеѓу двете земји, особено во областа на одбраната. Воедно, министерот Џафери истакна дека Македонија е подготвена да ги сподели научените лекции и искуства во процесот на реформирање и приближување кон полноправно членство во Северноатлантската алијанса.
При престојот во Босна и Херцеговина, министерот Џафери, го посети и кампот „Бутмир” каде се сретна со македонските мировници кои се дел од операцијата ЕУФОР-АЛТЕА, на кои им честита за прикажаните вештини и професионалност во извршувањето на задачите, оцена која ја споделуваат и раководните структури на ЕУФОР-АЛТЕА и им посака успешна работа и во иднина.
Истовремено, на средба со шефот на штаб, бригадниот генерал Јозеф Спишјак, во командата на ЕУФОР, министерот Џафери истакна дека Македонија во релативно краток период од корисник прерасна во сериозен контрибутор кон етаблирањето на мирот и демократијата во глобални рамки и дека нашата држава и во иднина ќе продолжи да придонесува кон истото. Министерот Џафери го посочи и придонесот на Македонија во заедничката безбедносна и одбранбена политика на Европската Унија, како дел од севкупните евроинтегративни напори на нашата држава, додавајќи притоа дека интегрирањето на регионот во ЕУ и во НАТО е клучен предуслов за стабилност и економски просперитет.
При посетата, делегацијата од Министерството положи и венец со свежо цвеќе на споменикот на загинатите припадници на АРМ во хеликоптерската несреќа кај Катлановско Блаце на 12.01.2008 година, при враќањето од мисијата АЛТЕА.
Во рамките на операцијата ЕУФОР-АЛТЕА, Македонија придонесува со вкупно 11 лица – медицински тим РОЛЕ-1, медицинска поддршка во кампот во Бутмир во Сараево, и со помошник правен советник во Командата на ЕУФОР. Македонија и Босна и Херцеговина својата билатерална соработка ја базираат на годишните Планови за билатерална соработка кои вклучуваат поголем број активности во областа на образованието и едукацијата, меѓу кои и школувањето на тројца питомци на Воената академија „Генерал Михаило Апостолски” – Скопје. /крај/мф/ач
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Мицевски: Кандидатите на СДС се истите од претходните избори, избрани по волја на Заев

Пратеникот и член на Централниот комитет на ВМРО-ДПМНЕ, Јане Мицевски, на прес-конференција одржана на 5 јули, изјави дека кандидатите на СДСМ за претстојните локални избори се истите кои се појавиле и во претходните два изборни циклуси.
Според него, тоа претставува доказ дека, како што рече, „Зоран Заев ги одбира кандидатите, а Венко Филипче ги потврдува“.
Мицевски ги посочи примерите на неколку актуелни кандидати, меѓу кои и кандидатот за градоначалник на општина Јегуновце, Дарко Блажевски, кој повторно е предложен од СДСМ. Тој го обвини Блажевски за неисполнети проекти и за, како што рече, „лична корист од ветените јавни проекти“.
„Во Јегуновце беше ветен културен дом, а на крајот стариот објект премина во негова сопственост“, рече Мицевски, додавајќи дека и во другите населени места, како Јанчиште и Жилче, дел од ветените проекти не биле реализирани додека Блажевски бил на функција.
Во своето обраќање, Мицевски оцени дека СДСМ се соочува со недостиг на нови и квалитетни кадри и затоа повторно ги кандидира истите лица. Тој додаде дека граѓаните, според ВМРО-ДПМНЕ, даваат поголема поддршка на нивните кандидати.
Македонија
(Видео) СДСМ Куманово: Димитриевски влезе во коалиција со Мицкоски за да се спаси од судски прогон

Соња Тодоровска од СДСМ Куманово, се осврна на одлуката на Обвинителството да се откаже од постапката против Максим Димитриевски.
Според Тодоровска, повлекувањето на Обвинителството го открило, како што рече, вистинскиот договор меѓу Димитриевски и Христијан Мицкоски. Таа обвини дека Димитриевски добил заштита од актуелната власт, а неговото коалицирање со ВМРО-ДПМНЕ го оцени како обид да избегне одговорност.
„Максим Димитриевски не е коалициски партнер, туку тој е декор, инструмент, политичка маска“, рече Тодоровска, додавајќи дека, според СДСМ, неговиот ангажман е воден од бизнис интереси и внатрепартиски договори.
Во изјавата беше нагласено дека, според СДСМ Куманово, граѓаните веќе го препознале политичкиот профил на Димитриевски и дека „на Куманово и на Македонија ѝ се потребни чесни луѓе со став и интегритет“.
Тодоровска порача дека „правдата може да биде одложена, но нема да биде избегната“ и најави дека ќе има одговорност.
Македонија
Стефковски со порака до Водовод: Пуштете вода веднаш или излегуваме на улица

Градоначалникот на општина Гази Баба Бобан Стефковски преку својот профил на социјалните мрежи се обрати до граѓаните по однос на проблемот со недостатокот на вода за пиење.
Како што пишува Стефковски, населените места Црешево, Смилковци, Маџари, Железара, Автокоманда и Ченто се оставени без вода за пиење поради недостаток на колични на вода.
„Во услови на екстермно високи температури, ваквата состојба е не само недозволива, туку и срамна. Ги потсетувам Град Скопје и ЈП Водовод и канализација дека не постојат сами за себе, туку за граѓаните. Како градоначалник избран од народот им порачувам: проблемите на граѓаните се и мои проблеми“, напиша Стефковски.
Тој упати апел за итно постапување, интервенција и изнаоѓање решение, а во спротивно најави дека ќе ги поддржи граѓаните во превземањето на сите демократски методи и најави можна организација на протести.
„Затоа денес, јавно и јасно упатувам апел за ИТНО постапување. Бараме итна интервенција и решение! Доколку оваа состојба не се реши веднаш, ќе го поддржам народот во превземањето на сите демократски методи. Ќе излеземе на улица!
Институциите кои молчат ќе се соочат со гневот и незадоволството на граѓаните. Нема да дозволам никој да биде оставен без вода во 21 век, во главниот град на Македонија!
Ова не е политичко прашање – ова е прашање на живот. Граѓаните заслужуваат почит, а не игноранција“, заклучи Стефковски.