Македонија
31-годишниот скопјанец починал по распад на белите дробови, единствен ризик фактор била дебелината

31-годишниот пациент кој претпладнево починал на Инфективната клиника во Скопје е најмладиот починат пациент во Македонија од коронавирус. Бил примен во болница пред шест дена, а единствен ризик фактор кај него била дебелината.
Министерот за здравство вели дека ја имал најтешката форма која е досега опишана во медицинската литература за компликации од коронавирус.
„Кај помладиот починат пациент имаше нагло влошување на состојбата. Веднаш е поставен на респиратор меѓутоа неговата клиничка слика е со крвавење и практично распад на белите дробови. Еден ризик фактор кај него е обезноста што ја имал. Обезноста во вакви случаи е ризик фактор“, рече министерот Филипче.
Тој е од Скопје, а како се заразил со коронавирус министерот најави дека дополнително ќе информира откако ќе се провери неговата епидемиолошка анкета. 31 – годишниот пациент бил примен на Инфективната клиника на 23 март.
Почнатиот 31- годишен скопјанец министерот Филипче вели дека треба да ги убеди сите досега неубедени во сериозноста на вирусот.
„ Денес имаме и еден млад човек којшто почина. Тоа е доказ дека вирусот не штеди никого, никој не е имун, ниту е заштитен. Стануваше збор за најтешката можна форма на клиничка манифестација на оваа болест. Сите кои досега не беа убедени за сериозноста на вирусот, сега верувам дека им е јасно дека ова е многу сериозна закана. Дека мораме сериозно да се однесуваме. Нема да биде лесно, апелирам сите да ги почитуваат препораките, да не се шири паника, да се однесуваме одговорно. Оваа борба зависи од секој еден од нас“, рече министерот Филипче.
Тој потсети дека помина нешто повеќе од еден месец откако беше регистриран првиот случај на заразен од коронавирус кај нас. Кривата на болеста се искачува линеарно, не експоненцијално и сите пријавени случаи може да се згрижат без пренатрупаност во болниците, но според Филипче ни претстои најтешкиот период.
„ Пред нас е најтешкиот период, бројот на зболени во светот расте, ќе расте и кај нас. Ни претстои за жал период во кој ќе расте и бројот на починати, за ова сите мораме да бидеме свесни. Ние сме се уште во еден вид на војна со вирусот Ковид – 19. Сакам да уапатам јасна порака дека влегуваме во вториот месец од оваа пандемија која целосно го промени животот, донесе страв, донесе несигурност“, рече министерот Филипче.
Покрај 31-годишниот пациент, Филипче денес извести и за починат 91- годишен пациент, исто така од Скопје, со што сега вкупно шестмина починаа од коронавирусот во Македонија.
По прес-конференцијата на министерот, Министерството за здравство информираше за уште двајца новозаразени од коронавирус со кои вкупната бројка се искачи на 259 пациенти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: 4 години локална власт, се градеше и реконструираше патна и подземна инфраструктура, училишта и градинки, спортски центри и терени, градски пазари, пречистителни станици

„Во изминатите четири години локална власт, градоначалниците на ВМРО-ДПМНЕ, посветено работеа да реализираат проекти кои го подобруваат целокупното живеење на граѓаните. Не беше лесно да се водат општини преземени од претходната локална власт, заглавени во долгови, со блокирани сметки, без никакви проекти“, велат од ВМРО-ДПМНЕ.
„Исто така, не беше лесно работењето со претходната централна власт, која не само што немаше партнерски однос кон градоначалниците, туку и ги опструираше во извршувањето на нивните активности и реализирањето на проектите.
И покрај тоа, за четири години се вложуваше и се направи многу.
Се изградија и реконструираа улици и патишта во вкупна должина од над 770 километри и вредност од околу 100 милиони евра, 46.840 метри нови водоводи, додека канализации во должина од над 91 илјади метри.
Изградени или во завршна фаза на градба се 7 пазари од затворен тип, меѓу кои во Штип е целосно изграден новиот полузатворен градски пазар на површина од 1200 м2 и обезбедени паркинг места, исто како и во Велес каде новиот покриен пазар е завршен после долги години, додека во Радовиш е во завршна фаза на изградба и истиот ќе има простории за трговија, катна гаража и канцеларии.
Изградени или во завршна фаза на градење се 12 пречистителни станици, меѓу кои целосно завршена е пречистителната станица за отпадни води во село Видовиште, во вкупна вредност од 1,9 милиони денари.
Посебно внимание се посвети на младите и образованието, при што реконструирани и модернизирани се над 400 училишта, каде во некои се прошируваа капацитетите, создавајќи услови за едносменска настава, а завршени или во завршна фаза се 274 спортски игралишта и детски рекреативни терени.
Се вложуваше и се градеше низ цела држава, така во општина Охрид изградени и реконструирани се 20-тина повеќенаменски спортски и детски игралишта, во Демир Хисар две игралишта за кошарка и тенис, во Илинден беше пуштен во употреба нов фудбалски терен, како и спортски центри во Стајковци, Хиподром, Инџиково и Идризово, Гази Баба.
На голем број училишта поставени се фотоволтаици, а во голем број на општини обезбедена е бесплатна храна за децата од 1 до 5 одделение и бесплатно летување за децата од социјално загрозените семејства.
Згрижувањето на децата во градинките беше еден од главните приоритети на градоначалниците на ВМРО-ДПМНЕ и за таа цел се инвестирани над милијарда денари за реконструкција и модернизација на над 70 детски градинки и изградба на неколку целосно нови.
И се ова не се само бројки, туку конкретни проекти кои се видливи и мерливи и кои го подобруваат квалитетот на живот на граѓаните“, соопшти ВМРО-ДПМНЕ.
Македонија
Активен е еден пожар на територијата на Македонија, два се под контрола, извести ЦУК

Во текот на изминатото деноноќие, на територијата на Македонија имало вкупно 27 пожари на отворен простор, од кои еден е активен, два се под контрола, а изгаснати се 24 пожари, соопшти Центарот за управување со кризи.
ЦУК извести дека е активен пожарот во општина Долнени, село Долгаец, каде што гори мешана шума.
Под контрола се два пожари, во општина Македонски Брод: Повеќенаменско подрачје Јасен (мешана шума) и во општина Гевгелија, на планината Кожуф (висока шума).
Како што информираше ЦУК, изгаснати се 24 пожари.
Македонија
„Влен“: Бујар Османи го вети автопатот Скопјe-Блаце, но донесе само лаги

„Поминаа 5 години, 7 месеци и 8 дена од свеченото потпишување на договорот за „првите 2 километри“ на автопатот Скопје – Блаце, а ветувањето на Бујар Османи со кое се фотографираше и политички се фалеше остана нереализирано“, велат од „Влен“.
„ФБ сесии, фотографи, изјави, скапи видеа, но резултати нула. Тоа е Бујар Османи. Ветуваа автопати, оставија само албуми со слики. Ветуваа нови болници, оставија семејни трагедии. Ветуваа водоводи, оставија пустош.
Бујар Османи беше министер во владата на Груевски, вицепремиер за европски прашања и министер за надворешни работи кај Заев и Ковачевски, вкупно повеќе од една деценија на највисоки државни функции. За тоа време немаше резултати за овој проект, ниту за албанските општини за кои најмногу ветуваше. Имаше Фејсбук сесии, снимени видеа и лажни ветувања, а резултати нула.
Доста беше со промотивни настани на лажни големи ветувања. Бујар Османи нема што да покаже како резултат зад себе, нема реализирани проекти, нема изградено ништо, нема помогнато никому.
Бујар Османи е политичар кариерист, без резултати. Неговите ветувања денес за Чаир се исти како ветувањето за автопатот кон Блаце пред пет и половина години. Празни“, се наведува во соопштението на „Влен“.