Македонија
Британска донација за подобрување на на јазичните вештини на АРМ

Голем број учебници, софистицирана информатичка опрема за интерактивно учење и модерен софтвер е предмет на донацијата на Обединетото кралство за Центарот за странски јазици во Армијата на Република Македонија.
Донацијата во петок свечено беше предадена во касарната „Илинден“.
„Целта на обезбедената донација е подобрување на јазичните вештини на целокупниот персонал кој соработува со НАТО силите и учествува во НАТО операциите, вежбите и обуките“ рече министерот за одбрана на Република Македонија, Талат Џафери, истовремено истакнувајќи дека со неа несомнено се продлабочува и билатералната соработка која е веќе поставена врз база на пријателство и меѓусебно почитување.
Познавањето на англискиот јазик беше првиот чекор кон достигнувањето на интероперабилноста на НАТО, и оваа донација претставува импулс и мотив за освојување нови височини во знаењата на англискиот јазик, посочи началникот на Генералштабот на АРМ, генерал-мајор Горанчо Котески за време на церемонијата.
Тој укажа и на фактот дека со процесот на декларирање на единици на АРМ, и нивното учество во мисии предводени од ООН, НАТО и ЕУ, Центарот за странски јазици, како дел од Командата за обука и доктрини се етаблираше како клучен чинител во подготовката на македонските мировници.
Кристофер Ивон, амбасадор на Обединетото Кралство во Република Македонија, се осврна на одличната соработка помеѓу двете земји, како и на тоа дека Обединетото Кралство е еден од најголемите и најблиските поддржувачи на Република Македонија на патот на евроатлантското интегрирање, истовремено додавајќи дека така ќе остане и во иднина.
„Поради големиот импакт во светски рамки, не потценувајќи ги останатите јазици, англискиот јазик е ефикасна алатка за комуникација во оперативните средини, со што значително се влијае на интероперабилноста“, рече амбасадорот Ивон во своето обраќање пред присутните високи гости од МО и АРМ и военото аташе на Обединетото Кралство во Република Македонија.
Оваа донација во вредност од околу 10.000 фунти, ќе им овозможи на припадниците на АРМ да следат современа јазична настава од учебници кои се дел од престижни универзитети во Обединетото Кралство, како Оксфорд и Кембриџ. Новите техники на вршење на наставата се овозможени со помош на т.н. „паметна табла“, која ќе придонесе кон уште поголема интерактивност и аналогно на тоа, поголеми резултати во изучувањето на англискиот јазик.
Центарот за странски јазици денес располага со 20 опремени училници, седум аудио лаборатории и една компјутерска лабораторија, во кои секојдневно следат настава над 100 припадници на АРМ. Во изминатите 10 години, обука во Центарот успешно завршиле над 300 припадници на АРМ. /крај/со/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Во потрага по храна, мечка се качи на тераса од семејна куќа во Тетовско

Мечка се качила на тераса од семејна куќа во тетовското село Отуње.
Членовите на семејството биле во внатрешноста на куќата, па со мобилен телефон ја снимиле мечката качена на маса каде имало оставено храна, пишува „Тетово инфо“.
Според објавеното и во другите блиски села како Сетоле и Једоарце летово биле забележани слични примери на камери за видеонадзор.
„Мечките во потрага по храна, се движат низ селото, уништуваат сандаци со пчели и слично“.
Македонија
ОЈО со детали за големата акција: 13 лица под истрага за даночно затајување, перење пари и даночна измама, тргувале со горива

Денешната акција спроведена на повеќе локации низ државата е резултат на двегодишна предистражна постапка што ја водеше Основното јавно обвинителство за гонење на организиран криминал и корупција во тесна соработка со Управата за финансиска полиција, соопшти обвинителството.
Постапувајќи по кривичната пријава, надлежен обвинител од ОЈО ГОКК донел Наредба за спроведување на истражна постапка против 13 лица, меѓу кои се и четворица косовски државјани и една државјанка на Република Хрватска.
Осомничените се товарaт дека од 2014 до 2023 година организирале и учествувале во криминална група со цел стекнување противправна имотна корист преку даночно затајување, даночна измама и перење пари со што осомничените го оштетиле Буџетот на државата во големи размери. Групата креирала мрежа од правни субјекти преку кои се вршела продажба и фиктивна трговија со нафтени деривати, се изготвувале фактури со невистинита содржина, со цел да се избегне плаќањето на даночни обврски и да се оствари незаконски поврат на ДДВ. Преку правни лица што не поседуваат дозволи за трговија со нафтени деривати се вршела набавка, транспорт и продажба на Еуросупер, Еуродизел и Екстралесно гориво, со намера да избегнат целосно или делумно плаќање на законски предвидените даночни обврски. Продажбата во поголем број случаи се одвивала без издавање на фискални сметки и фактури, а средствата прибрани во готово не биле евидентирани во сметководствената документација. Осомничените странски државјани, кои формално биле назначени за одговорни лица во повеќе осомничени правни субјекти, немале регулиран престој во земјава, што организаторите на групата го користеле како начин за прикривање на нивната поврзаност со криминалното дејствување.
Воедно, организаторите на групата, од продадените нафтени деривати во готово пуштиле во оптек, примиле пари и извршиле пренос на паричните средства со намера да го прикријат нивното движење, со што се стекнале со противправна имотна корист во големи размери, а за која знаеле дека е прибавена со кривичното дело Даночно затајување, при што сториле и кривично дело Перење пари и други приноси од казниво дело.
Јавниот обвинител ценејќи дека се исполнети условите до судијата на претходна постапка при Основниот кривичен суд Скопје достави предлог за определување на мерка притвор за сите осомничени. До сега се обезбедени седум лица за кои е прифатен предлогот на обвинителството и судот со Решение им определи мерка притвор во траење од 30 дена, за останатите – петмината странски државјани и еден македонски државјанин мерката притвор ќе биде определена во отсуство.
Македонија
Муцунски-Јан Копман: разменети мислења за спроведувањето на реформската агенда, во фокусот и иницијативата „Роаминг како дома со ЕУ“

Министерот за надворешни работи и надворешна трговија, Тимчо Муцунски, денес и утре престојува во работна посета на Брисел, Кралството Белгија. Во рамки на посетата, денеска оствари средба со генералниот директор на Директоратот на Европската комисија за проширување и источно соседство, Герт Јан Копман.
На средбата беа разменети мислења за спроведувањето на реформската агенда, посветеноста на Владата да испорачува видливи резултати од реформските процеси, како и за Планот за раст како дел од пошироката европска поддршка за регионот. Муцунски нагласи дека Владата во изминатата година демонстрираше сериозна посветеност во исполнувањето на обврските од реформската агенда, постигнувајќи значителен напредок, особено во областите на дигитализацијата, владеењето на правото и борбата против корупцијата, при што истакна дека овие приоритети остануваат во фокусот на Владата и во наредниот период.
Се разговараше и за регионалната соработка, при што беше нагласена активната улога и придонесот на Република Северна Македонија во рамките на регионалните иницијативи, како и кон стабилноста и безбедноста на целиот регион.
Соговорниците се осврнаа и на актуелните геополитички и безбедносни предизвици во Европа. Во таа насока беше потенцирана важноста од продолжување на поддршката за Украина и потребата од заеднички, координиран пристап во справувањето со последиците од руската агресија.
Во фокусот на разговорот беше и иницијативата „Роаминг како дома со ЕУ“, насочена кон постепено укинување на трошоците за роаминг помеѓу земјите од Западен Балкан и Европската Унија. Одлуката за оваа иницијатива се очекува да биде донесена на почетокот на следната година.
Муцунски уште еднаш ја потврди цврстата посветеност на Република Северна Македонија кон процесот на европска интеграција како еден од стратешките приоритети во надворешната политика. Тој ја истакна и целосната усогласеност на државата со Заедничката надворешна и безбедносна политика на ЕУ, како и значењето на стратешкото партнерство со Европската Унија во областа на безбедноста и одбраната.