Министерот за правда, Блерим Беџети, бил човекот кој пред неколку дена беше фатен со оружје, за кое немал дозвола, а најверојатно и со непознатата прашкаста материја свиткана во 500 денарка, при акцијата на полицијата, УЈП и инспекциите на летната дискотека „Шери“, обвини Беким Фазлиу од ДПА на седницата за пратенички прашања.

Тој праша, како може министер за правда, да биде фрлен на земја и срамно влечен од полицијата, а сепак и покрај тоа што било најдено кај него, сé уште да е министер во владата.

„Ова е скандалозно. Како е дозволено еден министер да се фрли на земја да се влече од полиција, и што е уште пострашно тој е уште министер, но ДУИ се соединиле со срамот“, рече Фазлиу.

Побара сите функционери во државните институции да бидат проверени дали се корисници на наркотични средства, па ако користи да не може да извршува јавна функција, исто како што се прави со лустрацијата со кодошите.

Министерската за внатрешни работи, Гордана Јанкулоска, рече дека тоа било обемна сеопфатна акција во летниот клуб „Шери“, во градски парк извршена на 21-ви јуни во раните утрински часови во координирана акција на МВР, Управата за јавни приходи и трудова и пазарна инспекција.

„Вршени се прегледи, легитимирања, на лица вработени во клубот, на вработените на обезбедување, како и на гостите. Полициските службеници затекнале четири лица на обезбедување, од кои едно лице немало никаков документ, а две без лична карта, малолетници пиеле, а едно лице од Скопје со туркање ги попречувал да извршат контрола. Пронајдена е непозната прашкаста материја завиткана во 500 денарка, при што лицето е приведено и предадено во полициската станица во Кисела Вода, а најдено е и огнено оружје, кај друго лице и тој е приведен во Кисела Вода. УЈП изрече мерка за затворање на објектот за неиздавање фискални сметки, одредена е глоба од 3.000 евра за непоседување лиценца за летен клуб, за обезбедување и издавање алкохол на малолетници“, рече Јанкулоска.

Не сакаше да ги коментира „сите други шпекулации и обвинувања по политичка основа“, затоа што биле надвор од надлежноста на МВР./крај/мф/бб