Долгот на ЕСМ кон ЕЛЕМ е утврден од консултантот за приватизација Мајнл Капитал Адвајзорс и е потврден од тогашното Министерство за Економија

Долгот на ЕСМ кон ЕЛЕМ е утврден од консултантот за приватизација Мајнл Капитал Адвајзорс и е потврден од страна на тогашното Министерство за Економија како наплатив долг.

Ова се наведува во денешното соопштение на АД ЕЛЕМ, како одговор на вчерашната реакција на ЕВН Македонија на судската одлука, со која ЕВН на ЕЛЕМ треба да му исплати 93 милиони евра, плус камати за периодот од 1995 до 2004 година.

Според ЕЛЕМ, долгот бил дел од документација доставена до сите потенцијални кандидати за приватизација на АД ЕСМ – соодветно и на АД ЕВН АГ од Австрија.

„Со самото купување на АД ЕСМ, по автоматизам овој долг кој го имаше АД ЕСМ кон АД ЕЛЕМ станува долг и обврска на неговиот купувач, АД ЕВН АГ, Австрија, односно на новоформираната компанија АД ЕСМ ЕВН кон АД ЕЛЕМ“, стои во соопштението.

ЕЛЕМ потсетува дека цената која ЕВН ја плати за купување на 90% од акциите на ЕСМ беше 225 милиони евра или речиси идентична со моменталните побарувања кои ги имаше ЕСМ.

„Обидите да се дефокусира процесот и од чисто трговски односи да се прикажат за политички мотивирани целосно ги отфрламе и ги оценуваме како своевиден притисок врз Владата и врз работата на независните судски органи“, се вели во соопштението. .

ЕВН вчера најави покренување процес на меѓународна арбитража во Вашингтон, против Република Македонија, оценувајќи дека се водат непријателски активности кон странски инвеститор. /крај/со/ап/