По последните случувања во Република Албанија, убиството на 14-годишното момче и следствено на тоа, воведената рестрикција на Тик Ток, Либерално-демократската партија потсетува на предлогот за забрана на содржини кои поттикнуваат насилство на мрежата Тик Ток и регулирање на содржините на другите социјалните мрежи кои ги користат малолетници.

ЛДП уште еднаш потсетува на предлогот кој минатата година го достави до МОН непосредно по немилите настани во соседна Србија, со кој се бара контрола на содржината која се емитува на социјалните мрежи, како и забрана на содржини кои поттикнуваат насилство.

„Апелираме до сите вклучени страни за започнување на итна постапка за регулација и контрола на содржината на социјалните мрежи, со цел спречување и избегнување на идни вакви немили настани и несакани состојби, особено кога се работи за здравјето и добросостојбата на нашите деца. Не смееме да дозволиме уште деца да бидат жртви на злоупотребата на Тик Ток и останатите социјални мрежи. Република Албанија е првата земја во регионот која го забранува Тик Ток, откако премиерот Еди Рама директно ги обвини социјалните мрежи за споделување и поттикнување на насилство меѓу децата во и надвор од училиштата, а кулминираше со смртта на 14-годишно момче во ноември. Франција, Германија, Белгија и други земји веќе имаат воведено рестриктивни мерки на сила за регулирање на употребата на социјалните мрежи од страна на малолетниците“, дпоплнуваат од ЛДП и додаваат:

„Кај нас, Тик Ток беше актуелен неодамна, откако повеќе деца беа повредени додека го изведуваа предизвикот „Супермен“, каде најмладиот од повредените има само 10 години, а најстариот 17 години. Децата стануваат жртви на опасни игри кои се пласираат преку социјалните мрежи. Тие содржини, под маската на „забава“, претставуваат сериозна закана за нивното физичко и ментално здравје, а ние како општество мора да преземеме одговорност и да ги спречиме ваквите несреќи. Немањето соодветна контрола врз содржините кои се достапни на социјалните мрежи овозможува ваквите „игри“ да стигнат до најранливите корисници. Како општество имаме обврска да направиме сѐ што е во наша моќ за да ги заштитиме од штетните влијанија на социјалните мрежи и да им овозможиме среќно и безгрижно детство“,

Забрането е движење на товарни моторни возила на патните правци Охрид-Кичево (Пресека) и Кичево-Гостивар, информираа од АМСМ.

Забраната е воведена во 12.15 часот.

Битола денеска беше домаќин на првата консултативна средба за најавените измени и дополнувања на Законот за локалната самоуправа, организирана од страна на Министерството за локална самоуправа, а поддржана од проектот „Зајакнување на општинските совети“, финансиран од владата на Швајцарија и од Министерството за локална самоуправа, кофинансиран и имплементиран од Програмата за развој на Обединетите нации – УНДП, во соработка со други национални институции и ЕЛС.

„Како што најавивме, до изменет, подобрен и модернизиран закон за локална самоуправа, приспособен на потребите на нашите граѓани и општини, ќе дојдеме преку широки, отворени и јавни дебати. Токму денешниот настан е првиот од низата планирани во процесот во кој безрезервна поддршка и партнерство добиваме од владата на Швајцарија и Програмата за развој на Обединетите нации – УНДП. Вашето учество и конструктивни мислења ќе бидат од големо значење бидејќи токму во оваа фаза на консултации ги обликуваме неопходните чекори за изменување и дополнување на законот“, истакна министерот Златко Перински на отварањето на настанот, на кој учествуваа градоначалници од Полошкиот и Југозападниот Регион, домаќинот, градоначалникот на Битола, Тони Коњановски, дел од експертскиот тим вклучен во процесот за измените на законот, проф. д-р Александар Спасеновски, проф. д-р Гордан Георгиев и проф. д-р Мемет Мемети, како и претставници од граѓанскиот и невладиниот сектор.

Според министерот Перински, причините поради кои ќе се менува, односно дополнува Законот за локалната самоуправа, се идентификуваните слабости по неговата дваесетгодишната примена. Клучните аспекти на планираните измени, посочи Перински, вклучуваат зголемена транспарентност и отчетност, унапредување на учеството на граѓаните, воведување комунални редарски служби и развој на недоволно развиени подрачја.

Министерот истакна дека главната иницијација за отворање на законот е можноста за отповикување градоначалник, со што ќе се зголемат транспарентноста и отчетноста во секојдневното работење на локалните самоуправи, како и воведување комунален надзор под ингеренции на локалната самоуправа.

„Тоа треба да се доуреди со Законот за комуналните дејности бидејќи таму е опишана целата материја, но како обврска во иднина градоначалниците мора да ја имаат и затоа сакаме да ја имплементираме во ова ново законско решение со што ќе превенираме девијатните промени. Комуналните редари ќе бидат облигаторна работа за градоначалниците“, дополни министерот.

„Токму овие планирани измени ќе бидат од голема полза за граѓаните и општините“, истакна градоначалникот на Битола, Тони Коњановски, кој изрази задоволство што министерот Перински одлучил подобрувањето на законската рамка да се врши транспарентно преку јавни и широки дебати, кои почнуваат токму од Битола.

Во процесот на подготвка на подобрената законска рамка е вклучена и експертска група, ангажирана од страна на УНДП и швајцарската влада, а еден од нив е и проф. д-р Александар Спасеновски, кој истакна дека сега имаме добро принципиелно законско решение, кое го изржало тестот на времето.

„Сепак, како резултат на неговата дводецениска примена природно се појавуваат одредени слабости, кои се настојува да се надминат. Ние како експерти ангажирани од УНДП, како дел од овој процес, имаме цел преку анализа на најдобрите компаративни европски практики, како и сугестиите на општините, да дизајнираме измени што ќе го рефлектираат најширокиот консензус во општеството и во Собранието“, посочи Спасеновски.

Дел од експертскиот тим е и проф. д-р Гордан Георгиев, кој изрази благодарност до министерот Перински и УНДП за одлучноста да го отворат овој сложен процес.

„Волјата е силна, намерата е добра и искрена. Ние како експерти сакаме да докажеме дека станува збор за добра намера, која верувам дека ќе вроди со плод“, рече Георгиев.

„Станува збор за отворен и инклузивен консултативен процес, кој сака да адресира слабости што ќе бидат прифатени од сите граѓани“, додаде проф. д-р Мемет Мемети, дел од експертската група.

На консултативната средба беше појаснето дека процесот на работа на експертската група се состои од четири клучни методолошки чекори, односно ќе се врши темелна анализа на постојната рамка, ќе следува консултативен процес, кој ќе резултира со изработка на нацрт-измени, кои финално ќе се презентират и достават на усвојување.