Грчкиот министер за внатрешни работи, Прокопис Павлопулос, не ја прифати иницијативата на неговата колешка, Гордана Јанкуловска, за формирање мешовит

Грчкиот министер за внатрешни работи, Прокопис Павлопулос, не ја прифати иницијативата на неговата колешка, Гордана Јанкуловска, за формирање мешовит македонско-грчки Комитет за решавање и превенција на инцидентите.

Ова се наведува во возвратното писмо на Павлопулос испратено на крајот на минатата недела со кое тој одговара на предлогот на Јанкуловска од 18 март годинава за формирање меѓудржавно експертско тело со задача заеднички и во блиска соработка да врши превенција и да ги разрешува инцидентите на териториите на двете земји во кои се инволвирани македонски и грчки државјани.

Предлогот на македонските власти од пред речиси два и пол месеци дојде како резултат на зачестените напади и понижувачкиот третман кон превозниците од Македонија на грчките патишта, но и по инцидентот во Охрид кога беа оштетени неколку автобуси на туристи од Грција.

Павлопулос во писмото, до кое дојде новинската агенција Макфакс, смета дека ваква форма на соработка се уште не е потребна.

„Грција сака да работи заедно со вас во областите од заеднички интерес, за доброто на нашите народи, со неопходните предуслови историјата да биде взаемно почитувана според принципите на добрососедските односи. Во таа смисла, пред надлежните служби во моето министерство уште еднаш ќе ја повторам нашата долгорочна политика на унапредување и продлабочување на билатералната соработка меѓу нашите држави, вклучувајќи го тука и создавањето на трајни механизми на експертско ниво (комитети, контакт групи итн.), кога тоа ќе биде потребно (на пример, во областа на полициска соработка) со цел заеднички да ги решаваме сегашните и идните предизвици“, се наведува во писмото.

„Според моите сознанија, Царината, која е под надлежност на Министерството за економија и финансии, и Царинската контролна управа, која е под надлежност на Министерството за одбрана, веќе одржуваат регуларни билатерални средби со претставниците од Поранешната југословенска Република Македонија“ – нагласува Павлопулос во одговорот до Јанкуловска.

Покрај одбивањето на иницијативата, грчкиот министер во писмото ги карактеризира македонските граѓани како негостопримливи, отфрлајќи ги поплаките на транспортерите за непријатностите што ги доживеале на територијата на Република Грција.

„Што се однесува до нападот врз грчките туристи во Охрид, за жал е само доказ за непријателството кое е инсталирано во умот и срцата на вашиот народ кон Грција. Овој инцидент, како и бројните сериозни проблеми со кои се соочуваат грчките компании во вашата држава и континуираното малтретирање на грчки државјани при нивното поминување на границата, според нивната тежина, не се споредливи со изолираните инциденти и неоснованите поплаки на транспортерите од Поранешната југословенска Република Македонија за наводно различниот третман од страна на грчките државни органи“, смета Павлопулос.

„Ме плаши дека ваквото однесување кое е охрабрено од општата клима на нетрпеливост спрема Грција, систематски се развива во ПЈРМ, како резултат на политиката на пропаганда демонстрирана од ваша страна, особено во однос на официјалното име на вашата држава“ се вели во писмото на Павлопулос, како одговор на иницијативата на македонската министерка за внатрешни работа за заедничка соработка во превенцијата и решавањето на инцидентите.

Copyright 2009 makfax. Сите права се задржани. Текстов не смее да се печати или емитува, во целина или во делови, без договор со makfax.