Праведно би било Европската унија да определи разумна временска рамка за почетокот и текот на претпристапните преговори за Македонија

Праведно би било Европската унија да определи разумна временска рамка за почетокот и текот на претпристапните преговори за Македонија.

Ова во среда во Брисел го изјави европратеникот и известувач за Македонија во Европскиот парламент Зоран Талер, по објавувањето на извештајот на Европската комисија, која на Македонија и препорача започнување на преговори за полноправно членство.

Според Талер, Македонија беше прва од државите од Западен Балкан, кој уште во јули ги имаше исполнето сите услови за укинување на визите за влез во ЕУ.

Тоа е исклучително достигнување и истовремено поттик за продолжување на реформите во исполнување на пристапните критериуми за влез во ЕУ, рече Талер.

Тој изрази очекување дека сите страни ќе ја искористат можноста, што се понуди по неодамнешните избори во Грција.

„Верувам дека солунската агенда, што во 2003 година ја диригираше тогашниот и сегашниот грчки премиер Јоргос Папандреу, ќе добие нов поттик“, рече Талер и го поздрави говорот на претседателот на македонската влада Никола Груевски, дадена на државниот празник 11 октомври дека заедно со премиерот на Грција имаа должност да бараат решение за проблемите меѓу двете земји со името.

Значајно е влезот во ЕУ да остане главен приоритет и национална цел на Македонија, кој и натаму мора да ги поттикнува реформските процеси во јавната администрација, судството и другите клучни потсистеми на општеството, нагласи известувачот за Македонија во Европскиот парламент Зоран Талер./крај/ста/мп