Македонија
Бугарија најпосетена, Италија најпосакувана за македонските студенти

Над 78 отсто од студентите би заминале на патување во земјите на Европската Унија по падот на Шенгенскиот ѕид, а 82 отсто од нив би се вратиле во Македонија.
Над 78 отсто од студентите би заминале на патување во земјите на Европската Унија по падот на Шенгенскиот ѕид, а 82 отсто од нив би се вратиле во Македонија. Ова го покажа анкетата спроведена меѓу 340 студенти на Економскиот факултет во Скопје, во периодот од 14 до 16 декември. Најголемиот дел од нив биле само во Бугарија, Грција или Унгарија, а меѓу најпосакуваните дестинации се Италија, Франција и Шпанија. Резултатите од анкетата беа презентирани во петок, во присуство на повеќе претставници од политичкиот, стопанскиот и наставниот живот, на која беа разменети мислења и ставови околу политичката и економската ситуација во Македонија. „Визната либерализација е еден од најголемите успеси што Република Македонија ги постигнала од својата независност. Тоа е историски успех за сите граѓани на Република Македонија и е еден од оние успеси што ќе биде највидлив и најпочуствуван од граѓаните на нашата држава. Продолжуваме со работа и со исполнување и подобрување на сите оние области кој што беа забележани во извештајот на Европската Комисија и со целосна посветеност и професионализам планираме овие препораки да ги исполниме во најкус можен рок“, изјави Васко Наумовски, заменик – претседател на Владата задолжен за Европски прашања. „Овој реформски маратон сеуште не е завршен. Треба да се заврши уште многу работа што ќе осигура дека земјата може да постигне напредок во сите области“, изјави Ерван Фуере, шеф на мисијата на ЕУ во Македонија. Според претставниците на бизнис секторот, потребно е подобро функционирање на администрацијата, соодветна законска рамка за прилагодување кон европските норми, но и создавање на услови за поголем пристап до европските фондови со цел, посигурен бизнис во рамките на државата. „Потребно е, како следен чекор во нашето европско интегрирање, реформата на администрацијата да добие приоритетно место“, смета Бранко Азески, претседател на Стопанската комора на Македонија. Дел од дискутантите побараа реална оценка за спроведувањето на реформите, потребни за пристапување кон Европската Унија. „Во овие 20 години покажавме дека може да издржиме, може да опстоиме, дека успеавме да издржиме две не принципиелни блокади и од југот и од северот, успеавме да издржиме и ембарга, успеавме да ги издржиме и Букурешт и Брисел, успеавме да издржиме безбедносна криза, успеавме да ги интегрираме сите структури во општеството на начин на кој никој во Европа не е интегриран. Сега треба да и помогнеме на Европа да се однесува европски кон нас“, вели Љубомир Кекеновски, Декан на Економскиот факултет во Скопје. Денешната трибина, организирана од Тренинг центарот за европска интеграција, се одржа по повод укинувањето на шенгенскиот визен режим, што стапува на сила на полноќ. /крај/ач
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Милевски: Виница 4 години назадува, катастрофално владеење на Петков и ВМРО-ДПМНЕ

Така наречениот отчет на градоначалникот Миле Петков и ДПМНЕ е најдобар доказ за четири години катастрофално и досега невидено лошо владеење на една локална власт во Виница, изјави кандидатот на СДСМ за градоначалник на Виница, Гоце Милевски.
Наместо вистински отчет, додаде тој, видовме обид за замачкување на очите на јавноста и бегање од одговорност за неисполнетите ветувања.
„Затоа таканаречениот отчет беше во скап хотел а не на улиците, во градот и селата во Виница. Затоа што реалноста е разочарувачка. Ниту еден од капиталните проекти од програмата на Петков и ДПМНЕ за Виница не се реализирани“, рече Милевски.
Според Милевски, Петков се фалел со наследени проекти од претходната власт на СДСМ и неколку асфалтирани улици.
„Но фактите говорат: сегашната власт нема реализирано ниту 20 километри улици, наспроти 45 километри изградени во времето на СДСМ. Виница денес изгледа како мала депонија од не собереното ѓубре и смет, собирен центар за кучиња скитници, со небезбедни кратери од вода и хаос од неправилно паркираните возила, со запуштени зелени површини и ниту едно ново засадено дрво. Тоа сликата за Виница после 4 години неспособна локална власт на ВМРО-ДПМНЕ. Да не дозволиме оваа казна да продолжи уште четири години! Локалните избори се шанса за промени во Виница“, рече Милевски.
Македонија
Голема акција на Финансиската полиција: уапсени седум лица за даночни измами и перење пари, го оштетиле буџетот за 430 милиони денари

По двегодишна опсежна предистражна постапка, во текот на денешниот ден Управата за финансиска полиција спроведе акција во која беа извршени претреси на повеќе локации на подрачјето на општина Липково, Куманово и Желино.
Се работи за сложена предистрага, која опфаќа повеќе правни и физички лица, а целта е целосно разоткривање на криминална група, која дејстувала подолг временски период и имала цел вршење на кривичните дела злосторничко здружување, даночно затајување, даночна измама и перење пари и други приноси од казниво дело, со намера организаторите и припадниците на групата да стекнат противправна имотна корист во висина од над четиристотини триесет милиони денари, со што е предизвикана огромна штета на буџетот на Република Македонија.
По налог на јавен обвинител од Основно јавно обвинителство за гонење организиран криминал и корупција, во акцијата со асистенција на САЕ „Тигар“ од слобода се лишени седум лица и тие се изведени пред судија на претходна постапка при Основниот кривичен суд, а едно лице не е достапно на органите на прогонот.
Македонија
Утре сончево време, со температура до 34 степени

Времето утре ќе биде сончево со мала до умерена облачност. Попладне во источните делови ќе има услови за локален краткотраен дожд. Ќе дува слаб до умерен ветер претежно од јужен правец, информира УХМР.
Минималната температура ќе биде во интервал од 9 до 18, а максималната ќе достигне од 27 до 34 степени.
Во Скопје сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 14, а максималната ќе достигне до 32 степена.
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец.
За време на викендот времето ќе биде променливо облачно и нестабилно со локален пороен дожд и грмежи. В сабота ќе дува умерен до засилен југозападен, а в недела ветерот ќе го смени правецот во северен.