Македонија
Уставен суд ја одложи одлуката за Законот за внатрешни работи

Уставниот суд привремено го одложи одлучувањето по членот 162 од Законот за внатрешни работи, со кој се стопира пензионирањето на сите овластени службени лица што наполниле 40 години работен стаж.
Уставниот суд привремено го одложи одлучувањето по членот 162 од Законот за внатрешни работи, со кој се стопира пензионирањето на сите овластени службени лица што наполниле 40 години работен стаж.
Судот ќе чека да се произнесат надлежните комисии во Собранието закажани за во петок и да го чујат нивното мислење во врска со овој закон.
На денешната седница, Уставниот суд за првпат донесе одлука која се однесува на правата и слободите на поединец. Уставните судии го поништија актот на општинската изборна комисија во општина Зајас, со која на Џавид Рушами му беше одбиена кандидатурата за градоначалник на Зајас на локалните избори во март лани.
Општинската изборна комисија побарала документ од МВР дека кандидатот не е осудуван. МВР издале документ дека кандидатот бил осудуван, а тој имал документ од Апелациониот суд и од Основниот суд во Кичево дека не бил осудуван.
Судот смета дека општинската изборна комисија ги помешала ингеренциите на институциите и наместо да побара документ од судот, побарала од МВР.
Според Уставниот суд изборната комисија му го оневозможила правото на политичко организирање и дејствување на Рушами со тоа што и покрај тоа што тој приложил доказ дека не е осудуван, сепак не му била прифатена кандидатурата. /крај/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За 30 дена ќе ставам крај на депониите во Гази Баба, рече кандидатот на СДСМ за градоначалник, Митовски

Кандидатот за градоначалник на Гази Баба од СДСМ, Влатко Митовски, најави дека во првите 30 дена од преземањето на функцијата ќе го реши проблемот со сметот и дивите депонии во општината.
„Нема повеќе да има диви депонии зад контејнерите, ниту општината ќе создава сопствени депонии. Отпадот ќе биде одложуван на пропишани и контролирани локации, а комуналното претпријатие повторно ќе стане функционално,“ порача Митовски.
Тој го обвини актуелното раководство дека четири години не успеало да воспостави систем за редовно собирање на отпадот, поради што комуналните служби се во целосен колапс.
Македонија
(Видео) Коњановски: Хотелот „Битола“ ќе се адаптира во Дом за стари лица – проект по иницијатива на граѓаните

Кандидатот за градоначалник на општина Битола, Тони Коњановски, порача дека секој голем проект започнува од гласот на граѓаните и дека заедничкото размислување, пишување и работа се клучот за подобро секојдневие.
„Една од најзначајните иницијативи што ја предложија граѓаните е адаптацијата на хотелот ‘Битола’ во Дом за стари лица – место кое ќе овозможи достоинствен живот, грижа и внимание за највозрасните сограѓани“, изјави Коњановски.
Меѓу останатите приоритетни предлози се: бесплатен оброк за сите ученици од 1 до 3 одделение, обезбедување униформи за децата од 1 до 5 одделение, организација на летни кампови за деца од социјално загрозени семејства, зголемување на капацитетите на градинките, како и продолжување на акцијата за отстранување на дивоградбите и гаражите, особено во Нова Битола.
„Вистински избор се проектите создадени од граѓаните, за граѓаните. Вистински избор е заедничкиот труд – кога гласот на граѓаните станува проект што го менува секојдневието“, нагласи Коњановски.
Македонија
Од утре на полноќ почнува изборниот молк

Агенцијата за аудио и аудиовизуелни медиумски услуги ги известува радиодифузерите дека изборната кампања за првиот круг од Локалните избори трае до 24:00 часот на 17 октомври 2025 година. Од 18 октомври заклучно со 19:00 часот на 19 октомври важат правилата за изборен молк.
За време на молкот, медиумите продолжуваат да известуваат за изборниот процес, но престануваат сите облици на изборно медиумско претставување, на учесниците во изборната кампања.
Според Изборниот законик, за прекршување на изборниот молк се смета емитувањето какви било информации, фотографии, аудио и аудиовизуелни материјали поврзани со или во кои учествуваат учесници во изборите, какви било облици на медиумско известување кои се отворено или прикриено во функција на нечија кампања и можат да влијаат врз одлуката на избирачите, податоци со кои се открива идентитетот на политички субјекти и/или поединци вклучени во инциденти или неправилности на денот на гласањето; како и изјави од кандидати во изборниот процес, од претставници на политички партии и од носители на функции во органите на власта.