Македонија
Бранителите од ЗРВО прашуваат: Кои се критериумите за доделување на Третоноемвриските награди?
Здружението на резервни воени обврзници (ЗРВО) од настаните 2001/2002, реагира на доделувањето на наградите во чест на 3-ти Ноември, Денот на ослободувањето на Прилеп.
Од Прилеп, Зоран Милошески
Од четирите прилепски здруженија на бранители, три од нив „Прилепски бранители“, „Карпалак“ и „Резервни воени старешини“, беа наградени со плакети „3-ти Ноември“. Единствените кои останаа без признание се членовите на најстарото здружение со 14-годишно постоење, ЗРВО 2001/2002.
„Ниту еден човек кој има барем малку свест и совест не му доликува да го направи она што го направија прилепската локална власт на чело со градоначалникот Марјан Ристески. Немаме други зборови освен да кажеме дека нивната постапка е арогантна и мизерна. Не само што не добивме признание за нашата работа, туку како здружение кое постои 14 години и кое има безброј заслуги во борбата за остварување на правата на бранителите, не бевме ниту поканети да присуствуваме на доделувањето на наградите. Прашуваме, кој е критериумот за доделување на едно вакво признание? Ако ЗРВО за 14 години не заслужи да добие било какво признание, тогаш со што го заслужија тоа наградените здруженија?“, прашува членот на ЗРВО 2001/2002, Јордан Трајкоски.
Претседателот на ЗРВО Рубин Секулоски смета дека со оглед на тоа што во образложението на наградата стои дека истото се доделува „за храброста во одбраната на македонскиот суверенитет и интегритет“, испаѓа дека само тие здруженија се заслужни за одбраната на државата за време на воениот конфликт.
„Наградите им се доделени заради нивното редовно учество на сите настани организирани од партијата на власт: предавање во употреба на патишта и улици, искажување поддршка за уништениот Закон за бранители, одмолчување на именувањето на Талат Џафери за министер за одбрана, премолченото одобрување на Законот за амнестија, пуштање на фабрики кои никогаш не проработија…Зошто не кажуваат колку бранители се вработени, дали државните институции распишале макар еден оглас за вработување во кои им се дава предност на бранителите? Бранителите се соочуваат со големи проблеми, имаме инвалиди, болни луѓе на кои им е потребна помош. Дали наградените здруженија можеби побарале бесплатно школство во вистинската смисла на зборот, право за бесплатно сместување во студентските домови на нашите деца? Во секој случај, срамна и недостоинствена одлука на прилепската локална власт“, вели Секулоски.
И покрај неправдата која со години им се нанесува, од ЗРВО 2001/2002 нагласуваат дека тие и натаму ќе работат во насока на подобрување на статусот на бранителите и решавање на нивните проблеми. Во тој контекст е и Меморандумот за соработка кој здружението во 2011 година го потпиша со Зоран Заев, односно со СДСМ.
„За прв пат некоја политичка партија, поточно СДСМ, го внесе Законот за бранители во својата програма. Меморандумот ги опфаќа основите барања и потреби на бранителите: решавање на проблемот со здравственото осигурување, вработувањето, образованието на нашите деца, станбено згрижување, олеснителни околности при пензионирањето, деновите поминати на терен да се впишат како бенефициран стаж, воведување „бранителски додаток“ при одењето во пензија. Проблемот може да биде решен само со соодветно законско решение, а не со злоупотреба на бранителите и нивно ставање во функција на правење кворум на настаните организирани од партијата на власт“, потенцира претседателот на ЗРВО 2001/2002 Рубин Секулоски. /крај/мф/зм
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Герасимовски: Обезбедуваме 200 канти за отпад од домашни миленици со бесплатни кесички
Кандидатот за градоначалник на Општина Центар од редовите на СДСМ, Горан Герасимовски, денеска најави дека покрај обезбедувањето на нови канти за смет, се воведува и новина, 200 специјални канти за отпад од домашни миленици на територија на Центар.
„Покрај новите канти за смет, воведуваме и новина, специјални канти за отпад од домашни миленици, слични на овој модел што како прототип го изработивме во општината. Во нив ќе има и бесплатни кесички за сопствениците. Ова е одлично решение Едноставно, урбано и еколошки одговорно. Планираме да поставиме 200 вакви канти низ сите населби и паркови, за да обезбедиме чист и уреден јавен простор, каков што доликува на општина каква што е Центар“, рече Герасимовски.
Тој, информираше дека во следниот мандат се оди чекор понатаму, со вакцинација и микрочипирање на уличните кучиња и домашните миленици, со што хумано и системски се решава овој сериозен проблем создавајќи безбедна и здрава средина.
Македонија
Единствена Македонија ќе ги поддржи кандидатите на ВМРО-ДПМНЕ во вториот круг од локалните избори
Членот на Извршниот комитет на Единствена Македонија, Вилијам Михајловски, на денешната прес-конференција најави дека партијата ќе ги поддржи кандидатите на ВМРО-ДПМНЕ во вториот круг од локалните избори, што ќе се одржат во недела, на 2 ноември.
„Со големо задоволство соопштувам дека Единствена Македонија одлучи во недела, во вториот круг, да ги поддржи кандидатите за градоначалници на ВМРО-ДПМНЕ. А што може да се очекува од една национална и патриотска партија како што е Единствена Македонија, која секогаш е на првата линија во одбрана на македонските национални интереси“, изјави Михајловски.
Тој истакна дека оваа одлука доаѓа по, како што рече, целосна медиумска блокада и исклучување на нивната партија од државното финансирање во првиот круг, но и дека Единствена Македонија не може да стои на страна во моментите кога, според него, се решава иднината на државата. Потсети дека партијата настапила самостојно со 29 кандидатски листи, но резултатот во првиот круг не бил на нивото што го посакувале.
Во обраќањето, Михајловски се повика на потребата од национално помирување и обединување, нагласувајќи дека изборите не се борба за поединци и партии, туку за државата.
Македонија
Почна поставувањето семафори на крстосницата кај „Васко Карангелевски“ во Аеродром
Денес екипи на ЈП „Улици и патишта“ – Скопје започнаа со градежните активности од првата фаза за поставување на светлосна сигнализација на крстосницата од улиците „Васко Карангелевски“ и „Ангел Димовски“ во населбата Аеродром.
„Работните активности се изведуваат по налог на Град Скопје, односно согласно основен сообраќаен проект за воведување на светлосни сигнали на оваа крстосница донесен од Град Скопје и според долгоочекуваната согласност од Министерството за внатрешни работи“, велат од „Улици и патишта“.
Во оваа фаза се врши рачен и машински ископ на земјан материјал за поставување темели на семафорски столбови и ископи за спроведување на електричната инсталација. По завршувањето на градежните работи, ќе следува монтажа на семафорската опрема и сигнализација.
Со поставувањето на новата семафоризирана крстосница, ќе се подобри проточноста на сообраќајот и значително ќе се зголеми безбедноста на учесниците во сообраќајот во овој дел од градот.

