Македонија
ДИК за сабота го одложи разгледувањето на последниот приговор на СДСМ

Државната изборна комисија (ДИК) во петокот вечерта ја прекина седницата и за последниот осми приговор на опозицискиот СДСМ ќе решава во сабота, на седница чијшто почеток е закажан за 11 часот, а во меѓувреме ќе се работи на изготвување на веќе донесените одлуки.
Претседателот на ДИК, Александар Чичаковски, соопшти дека Комисијата за петок ја завршува работата за да се овозможи да се подготват сите донесени одлуки за тие да можат да бидат доставени до подносителите и другите учесници на предвремените парламентарни избори кои се одржаа на 11-ти декември.
Досега ДИК одби пет од осумте приговори на СДСМ, чии претставници претходно во петокот самите повлекоа два од приговорите за неправилности во текот на гласањето. Претходните денови беа разгледувани и исто така одбиени седум од осумте приговори на Движењето БЕСА.
На денешната седницата ДИК го одби приговорот од Коалицијата предводена од СДСМ за гласањето во избирачкото место 1978 во Тетово. Потоа следуваше подолга расправа и за гласањето во избирачкото место 2016 во Теарце. По првичната расправа мнозинството членови на ДИК одлучија да се пристапи кон увид во целокупниот избирачки материјал за ова избирачко место. При разгледувањето на овој приговор по барање на ДИК на седницата присуствуваа сите членови на Избирачкиот одбор од избирачкото место 2016 со цел да го потврдат избирачкиот записник.
Во сабота ДИК треба да соопшти и дали ќе се повтори гласањето на избирачкото место 0396/1 во Гостивар во Изборната единица 6 и донесоа одлука да се поништи гласањето на тоа избирачко место. Доколку се покаже дека гласовите на ова избирачко место може да влијаат врз вкупниот изборен резултат во изборната единици, може да биде донесена одлука за прегласување.
Опозицијата смета дека со прегласувањето на ова избирачко место може да се влијае врз изборниот резултат односно да ѝ одземе на ВМРО-ДПМНЕ еден пратенички мандат, за колку што е предноста во оваа изборна единица на владејачката партија пред СДСМ.
Во Изборната единица 6, победи ДУИ со 40.599 гласови кои му обезбедија 6 пратеници, а втора беше ВМРО-ДПМНЕ со 26.135 гласови кои носат 4 пратеници од оваа изборна единица, додека СДСМ доби 25.828 гласови и 3 пратеника. Но БЕСА, која е блиска опозициска партија со социјалдемократите освои 25.054 гласови, и исто така, 3 пратеника. По два мандата од „шестката“ освоија Алијансата за Албанците и ДПА.
Според прелиминарните конечни резултати кои ги соопшти ДИК, владејачката ВМРО-ДПМНЕ освоила 51 мандат, СДСМ – 49, ДУИ – 10, БЕСА – 5, Алијансата за Албанците – 3 а ДПА два пратенички мандати.
И во петокот од раните попладневни часови, како и претходните денови, пред седиштето на ДИК во централното скопско подрачје, се собра мноштво членови на ВМРО-ДПМНЕ и поддржувачи на Коалицијата за подобра Македонија, кои протестираат и бараат од ДИК, како што велат, „да стане соучесник на СДСМ и да овозможи изборна кражба на регуларната победа на ВМРО-ДПМНЕ“./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Манасиевски: Владата на СДС тврдеше дека нема да има нови блокади кон ЕУ за билатерални прашања, сега се демантирани и од ЕУ

Димитар Ковачевски како премиер и претседател на СДС тврдеше дека уставните измени се последна пречка за влез на Македонија во ЕУ. СДС водеше кампања со која не убедуваше дека само што не сме влегле во ЕУ, а пречка за тоа се уставните измени, после кои се ќе се смени, вели Валентин Манасиевски, член на ЦК на ВМРО-ДПМНЕ.
ВМРО-ДПМНЕ, додава тој, уште тогаш кажа дека СДС, Ковачевски, Маричиќ, Зечевиќ и Османи лажат. И дека уставните измени се само почеток на бугарските барања.
„Тоа што ВМРО-ДПМНЕ го зборуваше, сега го кажаа и од ЕУ, односно еврокомесарката Марта Кос, потврди дека нема гаранции дека ова се последните бугарски барања.
Еврокомесарката Кос кажа дека не може да потврди дека нема да има нови блокади заради билатерални прашања.
Каде се СДС сега? Каде се сокрија?“, праша Манасиевски. Според него, откако ја доведоа државата во безизлезна ситуација тие се кријат и молчат.
Македонија
Културните работници на протест: Се надеваме дека платата за март ќе ја добиеме барем пред првомајските празници, стигнаа нови насоки

Голем број вработени во институциите од културата денес точно напладне излегоа на протест пред Министерството за култура кое ги принуди велигденските празници место со 10 отсто поголеми плати, да ги минат без плата. Со централен транспарент „ ‘Извини’ Зоки, ‘морално’ (ли) беше“, културните работници си ја побараа платата која согласно колективниот договор треба да биде 10 отсто повисока поради зголемените животни трошоци. Додека тие пред Министерството за култура кажуваа дека неисплатената плата не е само административна измама туку правно и морално предавство и обвинија дека оваа власт само ја продолжува традицијата од претходните власти поради што тие мора секој април да протестираат, Министерството за култура подготви нов начин за пресметка на платите.

„Сега има нови насоки, на поинаков начин се пресметуваат тие 10 % од општиот колективен договор“, рече Вера Атанасовска, претседателка на СКРМ
„Добивме известување од сметководствените служби дека од страна на Министерството се доставени нови насоки за пресметка на плата, дека досегашните каде што беше пресметана плата согласно Колективниот и другите договори, не важат. Сега има нови насоки, на поинаков начин се пресметуваат тие 10 % од општиот колективен договор. Во моментов институциите не постапуваат по новите насоки бидејќи на никого не му е јасно што во моментов треба да се направи. Се надеваме дека ќе добијат подетални насоки и се надеваме дека платат за март ќе ја добиеме барем пред првомајските празници“, рече Вера Атанасовска, претседателка на Синдикатот за култура на Република Македонија (СКРМ).
Вработените во институциите од културата кои се уште немаат плата за март добија безрезервна поддршка од Сојузот на синдикати на Македонија (ССМ). Претседателот на ССМ Слободан Трендафилов и на сегашниот министер за култура, исто како и на претходната министерка, му порача дека со протестот културните, дошле кај некултурните во Влада. „Жал ми е што до вчера министерот седеше рамо до рамо со вас, но како министер со 79 % зголемена плата се бори против вашите плати предвидени со колективните договори што лично сметам дека е срамно“, рече претседателот на ССМ, Трендафилов.

„Лично сметам дека е срамно што министерот со 79 % зголемена плата се бори против вашите плати“, рече претседателот на ССМ, Слободан Трендафилов
Тој ги повика вработените во културните институции на Први мај да се придружат на протестот на ССМ.
„Дојдовме 300 луѓе пред три недели на протест – се исплашија. Денеска сме 3000 – уште повеќе се плашат и им кажавме дека ќе дојдеме и 30 илјади. Нѐ бројат, наместо да ни платат плати. Почитуван министер, луѓето очекуваат платата да им се исплати уште денес согласно Колективниот договор, доколку не, како што ѝ порачавме на претходната министерка, ќе ви порачаме и вас – ако не го направите вие тоа, ќе го направи некој следен министер“, рече Трендафилов.
Со скандирање „Правда, правда“ и интонирање на државната химна заврши денешниот протест на културните работници кои кажаа дека излегуваат на улица оти Министерството не ги слуша кога се обраќаат преку институциите.
Македонија
Инспекторатот на Општина Карпош проверил 50 градби и изрекол 26 казни

Во текот на изминатата недела, од страна на градежен и комунален инспектор, како и со активно присуство на комуналните редари, биле спроведени над 50 контроли на терен, информираат од Општина Карпош.
Како резултат на овие контроли, изречени биле вкупно 26 казни и 17 опомени, со целосна примена на законските надлежности и прописи.
Градежниот инспектор, согласно својата надлежност, како што појаснуваат од општината, изрекол четири казни во висина од 500 до 3.000 евра, на правни и одговорни лица.
Комуналниот инспектор изрекол пет казни по 300 евра за одговорни лица, како и пет казни по 1.500 евра за правни лица.
„Воедно, беа изречени и пет опомени, при што недостатоците беа коригирани веднаш на лице место.
Дополнително, казни беа изречени и за повеќе правни субјекти, како резултат на утврдени прекршувања. Истовремено, кај дел од градежните компании беше постапено по издадени опомени, со целосно почитување на наложените мерки.
Комуналните редари во истиот период изрекоа 12 казни во висина од 40 евра, како и 12 опомени. Доколку во наредниот период не се извршат потребните корекции кај овие градби, во постапката ќе се вклучи и комуналниот инспектор, чии казни, согласно законот, се со значително повисоки износи“, нагласуваат од оваа општина.
Општина Карпош апелира до сите инвеститори и градежни компании кои работат на територија на општината, да ги почитуваат законските прописи, како и да водат сметка за околината, особено при работа во зони со индивидуално домување.
Потенцираат дека нема компромис со незаконското градење.
„Општина Карпош продолжува со засилен инспекциски надзор врз сите градилишта на своја територија, со цел да се обезбеди законска, безбедна и одговорна урбана изградба“, се нагласува во информацијата.