Македонија
До март отворен повикот за купување дрва преку „Македонски шуми“ за 2017

Објавен е повикот за купување огревно и техничко дрво за следната година преку Јавното претпријатие „Македонски шуми“.
Цената на дрвата во складовите на претпријатието останува иста, 2.370 денари за метар кубен буково огревно дрво, а 2.450 денари за дабово.
Физичките лица кои сакаат самостојно да набават дрва треба да аплицираат електронски најдоцна до 31 март следната година. Обрасците со барања се достапни на страницата www.mkdsumi.com.mk.
„Имаат можност за склучување договор за купување во готово или на шест рати. Испораката на огревното дрво до домаќинствата ќе се врши исклучиво согласно датумот за целосната уплата на договирената количина“, информира на прес-конференција Жарко Караџовски, директор на ЈП „Македонски шуми“.
Попуст од десет проценти доколку дрвата ги купат во готово и следната година ќе имаат ранливите категории (социјални случаи, лица со попреченост во развој, деца без родители, самохрани родители и стечајни работници), како и семејствата на бранителите и на работници кои останале инвалиди на труд или загинале на работа. Тие имаат опција и за купување на осум рати. За тие категории превозот на дрвата е бесплатен. Tреба да го докажат статусот со потврда од надлежна институција.
Рокот за аплицирање за купување дрва преку здруженија на пензионери, инвалиди на трудот и синдикати на правни лица е до 31 јануари следната година, а склучувањето на договорите почнува од 1 февруари.
ЈП Македонски шуми“ со повикот нуди можност и за продажба на техничко дрво по пат на рамковни договори до пет години, за што правните лица може да аплицираат до 15 јануари следниот месец, како и годишни договори, за што пријавувањето е до крај на јануари следната година. По пат на јавно наддавање ќе се продава и оштетената дрвна маса по разни основи.
Лани „Македонски шуми“ продаделе и испорачале 485 илјади метри кубни дрва. На 10 до 15 од граѓаните кои годинава склучиле договори им се вратени парите затоа што испораката не била извршена навреме.
„Тоа е заради доцнење на некој рок, којшто најчесто се случува во Скопје, заради големата побарувачка, а малото произвдоство во скопската подружница,сме принудени да носиме дрва од внатрешноста и некогаш се случува и да се доцни. Кај оние граѓани кои не може да чекаат од оправдани или неоправдани причини стоиме на располагање и така и го склучуваме договорот, да ги вратиме парите и да исплатиме отштета“, рече Караџовски, информирајќи и дека ЈП „Македонски шуми“, ги репрограмирало долговите кон Управата за јавни приходи./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
15 милионитиот патник на „Визер“ во Македонија доби ваучер за лет по избор

ТАВ Македонија и Визер, на дојдовниот лет од Дортмунд, заеднички го пречекаа 15 милионитиот патник на оваа нискобуџетна авиокомпанија во земјава, од нивниот влез на пазарот во 2011 година досега.
Во знак на благодарност за лојалноста на патничката, ТАВ Македонија и подари патнички реквизити, а Визер и додели вредносен ваучер за авиобилети за дестинација која таа самата ќе ја избере.
„Во годината кога ја одбележуваме нашата 15 годишнина на пазарот, денеска го наградивме 15-милионитиот патник на Виз ер и со тоа ја прославивме нашата 14 годишна плодна партнерска соработка со овој авиопревозник, кој лета до вкупно 30 дестинации и 12 земји од Меѓународниот Аеродром Скопје и Аеродромот Свети Апостол Павле Охрид. Заедно со нив и со Владата, продолжуваме заеднички да работиме на проширување на мрежата на авиолинии од двата македонски аеродроми, правејќи ја Европа и светот поблиски како за македонските граѓани, така и за граѓаните од околните земји”, изјави Неџат Курт, генерален директор на ТАВ Македонија.
ТАВ Македонија, подружница на ТАВ Аеродроми, која е членка на француската групација АДП (Aeroports de Paris), партнерството со нискобуџетната унгарска авиокомпанија, Виз ер, го почна во јуни 2011 година, со првиот лет од Меѓународниот Аеродром Скопје до аеродромот Лутон-Лондон.
Во јули 2015 година, Виз ер почна со летови и од охридскиот аеродром, со летот од Охрид кон Базел.
Виз ер денес има база од пет авиони на Меѓународниот Аеродром Скопје и опслужува 30 дестинации до 12 земји до и од нашата земја, со пазарен удел од над 46%, со што е најголемиот авиопревозник на македонскиот пазар.
„Достигнувањето на 15 милиони патници во Северна Македонија е извонреден успех и доказ за нашата силна врска со ТАВ Македонија и нашите патници тука. Како лидери на пазарот, нудејќи летови до 30 дестинации од оваа земја, горди сме што играме клучна улога во поддршката на економскиот раст, како и во отворањето врати за деловни можности и охрабрувањето на посетителите да ја истражат богатата култура и прекрасните пејзажи на Северна Македонија. Возбудени сме што денес го прославуваме овој пресврт со среќниот патник и остануваме посветени на обезбедување ниски цени, сигурна услуга и повозбудливи можности за патување за сите во оваа земја.“ – изјави Андраш Радо, раководител за комуникации во Виз Ер.
Во 2024 година Визер превезе 1,8 милиони патници преку двата македонски аеродрома, Меѓународниот Аеродром Скопје и Аеродромот Свети Апостол Павле Охрид, а според бројот на патници, најфрекфентни рути на Виз ер се авиолиниите од Скопје до Милуз, Дортмунд, Мемингем и Берлин.
ТАВ Македонија и Виз ер и натаму продолжуваат партнерски да работат, со развивање на мрежата на авиолинии од скопскиот и охридскиот аеродром, зголемување на бројот и понудата на дестинации според барањата на патниците, со цел поголема достапност кон Европа и светот за македонските граѓани, како и за граѓаните на соседните држави.
Македонија
Влен: ДУИ ја продаде еднаквоста за Соравија

Влен реагира дека ДУИ ја загубила довербата на Албанците, откако две децении ја уништувала застапеноста на Албанците во државните институции, користејќи ја оваа тема за политичка трговија.
Според Влен, само за една година Владата направила историски чекор со законот за правична застапеност што ја регулира правичната и соодветна застапеност на Албанците во институциите, унапредувајќи ги на одговорни позиции, не со привилегии, туку со заслуги.
„ДУИ се спротивставува на овој закон затоа што повеќе не може да го користи како алатка за политичка трговија, тие ја продадоа еднаквоста за Соравија“, посочуваат од Влен.
Тие додаваат дека промената започнала и дека Албанците повеќе нема да бидат само фигури во администрацијата, туку вистински носители на одлуки, еднакви во законот и во животот.
Македонија
„Бгнес“: Се очекува Европскиот парламент да ги отстрани „македонскиот идентитет и македонскиот јазик“ од извештајот за Северна Македонија

Следната недела на пленарната седница во Стразбур се очекува мнозинството во Европскиот парламент да ги поддржи амандманите што предвидуваат отстранување на термините „македонски идентитет“ и „македонски јазик“ од нацрт-извештајот за напредокот на Северна Македонија, пишува бугарската новинска агенција „Бгнес“.
Според медиумот, трите најголеми политички групации – Европската народна партија (ЕНП), Социјалистите и демократите (С&Д) и Обнови ја Европа – постигнале согласност за измените.
Нацрт-резолуцијата, базирана на извештајот на Томас Вајц, според „Бгнес“, ја критикувала геополитичката стратегија наречена „Српски свет“ и имала цел промена на границите на Балканот, вклучувајќи ги Република Српска, Црна Гора, Косово и Северна Македонија.
Покрај тоа, како што се додава, извештајот ја нагласува потребата за отворање на архивите на југословенските тајни служби (УДБА и КОС) и нивно регионално истражување за надминување на тоталитарното минато и зајакнување на демократијата во Западен Балкан.
„Бгнес“ пишува и дека во документот е истакнато и присуството на странски влијанија во Северна Македонија вклучувајќи антиевропски наративи преку медиуми на српски јазик со врски кон Кремљ, како и континуирани активности на руски тајни мрежи, што било потврдено со протерување 13 руски дипломати помеѓу 2018 и 2023 година.
Се нагласува дека земјите од Западен Балкан, вклучително и Северна Македонија, се изложени на хибридни закани, дезинформациски кампањи, стратешка корупција од Русија и од Кина.
Посебна загриженост, како што пишува агенцијата повикувајќи се на извештајот, предизвикуваат улогите на Унгарија и на Србија во поддршка на геополитичките цели на Кина и на Русија, како и ризикот од економска зависност преку нерамноправни кредитни договори.