Шест куќи и голема површина на земјиште со несобрана пченка се зафатени од вчерашните поплави во Раотинце. Со цел да ја види сликата на самото место во четвртокот навечер во посета на селото беше носителот на кандидатската листа на СДСМ во шестата изборна единица Петре Шилегов. Според него, проектот за трајно решение на проблемот со регулирање на коритото на реката е доставен до Владата, но истиот е одбиен.

„Постои конкретен проект кој беше доставен до Владата и во претходниот парламентарен состав на пратеничката група на тогашниот носител Стојко Пауновски, но истиот беше одбиен од владеачкото мнозинство. Чини 6,5 милиони евра и е целосно разработен, предвидува регулирање на коритото на реката Вардар на начин што нема да може да ги поплавува домовите на нашите граѓани, односно целото сливно подрачје околу ова село. Поплавите се случуваат два пати годишно, и таа вода треба да добие природен тек а не да тече по куќите на луѓето, по нивните имоти и ниви“, рече Шилегов.

Жителите на селото стравуваат од нови поплави ако се исполнат временските прогнози. Апелираат до надлежните за трајно решение на проблемот наместо досегашните предизборни ветувања.

„На претходното гласање тука беа дојдени 12 пратеника, сега нема ниту еден од нив. Реката Вардар е целосно излеана од левата страна и таму нема пристап. Денес вртев на неколку институции и никаде не добив одговор. Апелирам до надлежните да ја отворат фиоката и да кажат дека има конкретен проект за овој проблем“, вели Зоран Мартиноски, жител на селото.

Одбиениот проект на пратеничката група на СДСМ за регулација на речното корито на Вардар во Раотинце зборува за тоа колку актуелната власт е несовесна кон реалните проекти и потреби на секојдневниот човек, смета Шилегов.

„Можеа да најдат повеќе од 650 милиони евра за да го уништат центарот на Скопје и да го изградат со стиропори и барок, не можеа да најдат 6,5 милиони евра да овозможат пристоен живот на нашите сограѓани во село Раотинце“, рече носителот на кандидатската листа на СДСМ во шестата изборна единица Петре Шилегов.

Освен во Раотинце, Шилегов ги посети Гостивар, село Градец и Теарце. /крај/мф/сс