Кривичниот суд треба да донесе одлука дали ќе му го одземе пасошот на поранешниот директор на Управата за безбедност и контраразузнавање, Сашо Мијалков кој во четврток два часа беше на распит во судот кај судија на претходна постапка како еден од осомничените во случајот „Трезор“ што го отвори Специјалното јавно обвинителство (СЈО).

Мијалков влезе во судот со своите адвокати од службениот влез од каде влегуваат вработените и излезе од истата врата два часа подоцна. Со него беше адвокатот Никола Додовски, кој инаку е адвокат на сите функционери од ВМРО-ДПМНЕ кои се осомничени во случаите на СЈО. Мијалков се појави во судот по вторпат за мерките на претпазливост на СЈО, и овојпат во ист ден кога беше закажано судење за случајот „Дива населба“, кога судот е под силно полициско обезбедување. И покрај огромниот број на специјалци кои беа околу судот, двајца од нив стоеја пред влезот од каде што влезе Мијалков и си заминаа кога си замина и тој.Првиот пат новинарските екипи не успеаја да го снимат и да го видат Мијалков на Судот, но денеска новинарските екипи го видоа и како влегува и како излегува од судот. Според неофицијални информации, во Судот сé уште трае распитот за другите осомничени за овој случај за кои се бараат мерки за претпазливост, поранешниот шеф на Кабинет на Мијалков, Тони Јакимовски, и за поранешниот помошник министер за информатика во МВР, Небојша Стајковиќ кој му е брат на поранешниот директор на спорната фирма „Финзи“, Владислав Стајковиќ, којашто се споменува за проневера на парите при набавката на телекомуникациската опрема од Британија. Од Основниот суд Скопје 1 велат дека не знаат кога ќе биде одлучено дали ќе им биде одземен пасошот на осомничените. За оваа одлука нема рок и може да не биде донесена во текот на денов бидејќи не бара итно одлучување како кога се бара притвор за осомничен.Во овој случај осомничен е и поранешниот шеф на Петтата управа, Горан Грујевски, за кого СЈО бараше да му биде одреден притвор, но Судот го одби барањето на СЈО.Мијалков се појавува вторпат на распит во Судот, бидејќи Специјалното јавно обвинителство бараше да биде изземена судијката на претходна постапка.Според СЈО, судијката требало да биде изземена, бидејќи нејзиниот девер бил во бизнис релации со фирмата „Финзи“. Но, Претседателот на Основниот суд Скопје 1, Владимир Панчевски го одби барањето на СЈО и Мијалков беше на распит кај истата судијка.Случајот „Трезор“ кој го отвори СЈО откри дека Управата за безбедност и контраразузнавање набавувала опрема со посредник, поскапо за вкупно околу 862.000 евра, и плаќа непотребно за нејзино одржување, иако таа е со истечена лиценца и не е во функција.Со новата истрага осомничени за злоупотреба на службена положба се тројца поранешни вработени во УБК и еден во МВР, кои преку фирмата „Финзи ДООЕЛ“, чиј директор извесен период бил и сведокот, сега починатиот Коста Крпач, од Велика Британија нарачува електронска и комуникациска опрема, со цена повисока за околу 862.000 евра. За оваа сума, преку повеќе договори и анекси на договори е оштетен Буџетот на Република Македонија, а со цел лично богатење и прибавување имотна корист.По отворањето на истрагата блокирана е сметката фирмата „Финзи“. Мијалков во изјава за медиумите, рече дека обвинувањата за него се неточни, дека не го оштетил буџетот и не прибавил никаква материјална корист и го обвини СЈО дека е продолжена рака на СДСМ. /крај/мф/ффс