Надворешна политика
Почнува најголемиот самит во историјата на НАТО
Претстојниот дводневен самит на НАТО, кој ќе се одржи во неделата и понеделникот во Чикаго, ќе биде можност државите членки да го дефинираат долгорочниот однос со Авганистан, а Македонија очекува дали ќе биде спомнато нејзиното членство во Алијансата, иако шансите за тоа се мали.
Како што најавуваат светските медиуми повикувајќи се на дипломатски извори, во прв план членките на НАТО ќе се обидат да го дефинираат долгорочниот однос со Авганистан во текот на транзицијата, предавањето на овластувањата за безбедноста на локалните безбедносни сили, повлекувањето на меѓународните контигенти и односот по тоа, да го претстават концептот на ткн паметна одбрана и да ја засилат мрежата на партнерства низ целиот свет.
Според најавите, самитот во Чикаго ќе биде најголемиот во историјата на Алијансата, а на него ќе учествуваат околу 60 земји и организации.
Како што рече генералниот секретар на НАТО, Андерс Фог Расмусен, самитот во Чикаго јасно ќе ја покаже определбата на Сојузот за довршување на транзицијата во Авганистан до крајот на 2014 година, но ќе се разговара и за помошта на авганистанските безбедносни сили по тој датум, што ќе биде новата улога на Алијансата.
„Ќе се концентрираме на придвижување од борбените дејствија и ќе се усредоточиме на обуката, советувањето и давањето помош“, изјави Расмусен пред самитот.
Што се донесува до концептот на таканаречената паметна одбрана, во Чикаго ќе бидат претставани повеќе мултинационални проекти планирани за НАТО да остане најсилниот военополитички сојуз во светот.
Станува збор за програмите како што се антиракетниот штит, сојузничкиот надзор од земјата со беспилотни летала, популарниот AGS, како и заедничкото разузнавање, набљудувањето и извидувањето.
Самитот во Чикаго, исто така според најавите, ќе биде и можност сојузниците да ги продлабочат постојните и да создадат нови мрежи на партнерства, со акцент на нивната интегрирана улога во мировните операции на НАТО и операциите за менаџирање на кризите.
Шефовите на државите и влади ќе разменат ставови и за ангажирањето на други органзиации во решавањето на глобалните предизвици.
НАТО во моментов брои 28 членки, а држави оснивачки се Белгија, Данска, Исланд, Луксембург, Норвешка, Велика Британија, Канада, Франција, Италија, Холандија, Португалија и САД – 12-те земји коишто на 4-ти април 1949 година во американскиот главен град Вашингтон го потпишаа Северноатлантскиот договор.
Чикаго кој е познат и како Градот на ветровите (Windy City), почна со подготовките за самитот на почетокот од мај., Самитот ќе се одржува во центарот „McCormick Place“, четири километри од самиот центар на градот, во близина на езерото Мичиген.
Чикаго е трет по големината град во САД, со бројни припадници на дијаспорите на земјите членки на НАТО, како што, се според големината на заедниците – Грција, Италија, Полска, Португалија, Романија, Хрватска и Турција, од кои турската, хрватската и полската заедница поднесоа повици до американскиот претседател Барка Обама за зачленување на Македонија во Алијансата.
Како што се најавува, Чикаго нема да биде самит на проширување на НАТО, бидејќи Алијанската е пред сѐ свртена „кон повеќето неопходни значајни реформи во земјите коишто тежнеат кон придружувањето“, но ќе биде потврдена политиката на отворени врати.
Македонија не е на дневен ред на овој самит, кој целосно ќе биде посветен на Авганистан.
Македонската делегација на самитот на НАТО ќе ја предводи претседателот Ѓорге Иванов кој во саботата доцна навечер по македонско време се сретна со турскиот колега Абдула Ѓул, по што заедно присуствуваа на гала вечерата, пред официјалното отворање на самитот.
Она што македонската страна го очекува е пријателите на Република Македонија да го стават прашањето за македонското членство пред сојузниците, иако Грција најави дека како и во Букуршет пред неколку години ќе стави вето.
Во саботата македонските почесни конзули во САД упатија заеднички повик за прием на Република Македонија во НАТО. „Отворете ја вратата на НАТО за Македонија“, гласеше заглавието на пораката на петтемина македонски почесни конзули, објавена на влијателната политичка интернет страница Дејли Колер. Лу Влашо, Славчо Маџиров, Дана Клајн, Енди Пејков и Џејсон Мико бараат исправување на неправдата и прием на земјата во Алијансата.
„Македонија направи големи напори во изминатите дваесет години, и од потрошувач стана извозник на стабилност. Македонија ги дели демократските вредности на НАТО, спроведе исклучително тешки економски и политички реформи и придонесува кон мисиите на НАТО во југоисточна Европа, Ирак и Авганистан. Македонските војници дури и го чуваат седиштето на НАТО и ИСАФ во Авганистан. Но, притоа не можат да влезат низ вратата на НАТО како полноправни членки на Алијансата што е болна иронија за Македонците“, пишува во заедничкиот авторски текст.
Македонските конзули потсетуваат дека од формирање на НАТО преовладува ставот дека вратите треба да бидат отворени за европските држави кои ги исполниле критериумите, а дека Македонија ги исполнила, што беше потврдено и на самитот во Букурешт.
„Самитот во Чикаго е можност за САД и претседателот Обама да се исправи оваа неправда. Прашањето е дали членките на НАТО имаат политичка волја да ја натераат Грција да седне на преговарачка маса“, пишуваат почесните конзули.
Во силна дипломатска офанзива во Чикаго, е Обединетата македонска дијаспора (ОМД) којашто минатата вечер им додели посебни признанија на словенечкиот премиер Јанез Јанша и на турскиот министер за надворешни Ахмет Давутоглу.
На гала вечерата присуствуваа околу 250 гости од САД, Канада и Европа, вклучувајќи и официјални американски претставници./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.