Спорот за името меѓу Македонија и Грција ќе биде еден од главните предизвици за новиот еврокомесар за соседство и пристапни преговори, Јоханес Хан, и според него неминовно е да се најде решение за овој проблем, по што земјата ќе може да ги продолжи своите евроинтеграции.

„Ова прашање е познато и ќе биде еден од главните предизвици со кое ќе морам да се соочам. Земјата е кандидат од 2005 година и не успеа да ги започне преговорите, а ова има влијание и врз тамошното население. Можеби апетитот за реформи се намали поради овие несакани случувања, но мораме да најдеме решение, тоа нема да биде лесно, но е потребно“, изјави австрискиот еврокомесар во вторникот, за време на своето сослушување пред членовите на Комитетот за надворешни работи на Европскиот парламент (АФЕТ).

Во поглед на процесот на проширувањето на Унијата, Хан порача дека Унијата нема да добие нови земји членки во следните пет години, но дека овој процес нема да застане, а новото мото ќе биде „квалитет пред брзина“.

Осврнувајќи се на земјите од западен Балкан, Хан порача дека неговата улога во претстојниот период ќе биде да ги подготви овие земји најдобро што може за она што ги очекува кога ќе станат земји членки на Унијата, иако во догледно време ова нема да се случи.

„ Реално, ниедна земја партнер нема да биде подготвена за пет години да стане членка, но тоа не значи дека нема да има придвижување. Мојата улога ќе биде да ги подготвам потенцијалните земји членки. Владеењето на правото, економскиот раст и функционалната демократија се главните три проблеми во процесот на проширувањето, а моето мото ќе биде „квалитет пред брзина“ во овој процес. Дискриминацијата нема место во оние општества кои сакаат да станат дел од ЕУ, исто така сакам да ги разгледам економските прашања кај оние земји кои сакаат да станат дел од Унијата и да им помогнеме на овие земји во остварувањето на реформите. Ќе ја поддржам регионалната политика и реформите во овие сектори. Од фер избори до слободни медиуми и транспарентно владеење, ова се потребните реформи, нема да има застој и мора да направиме се што можеме за да ја промовираме регионалната политика и да се решат билатералните прашања. Земјите од западен Балкан треба да бидат подобро поврзани, меѓу себе и со Унијата. Овој регион не треба да биде празно место на мапите за инфраструкрна и енергетска поврзаност. Заедничките цели можат да ги надминат постоечките политички несогласувања“, изјави Хан во своето во своето обраќање пред членовите на АФЕТ.

Австрискиот еврокомесар додаде дека Унијата ќе има индивидуален пристап кон секоја земја, а ќе покаже и флексибилност и волја да се најдат вистинските инструменти за оние инструменти каде што треба да се посвети внимание. Според Хан, Унијата ќе стои на она што го ветила, но доколку земјите кандидати не го исполнат тоа што тие ќе и го ветат на Унијата, тогаш ЕУ ќе мора да остане на своите вредности и принципи.

„Јасно е дека мораме да се фокусираме на преговарачкиот процес, се работи за квалитет,  но не за брзина во овој процес, треба добро да ги подготвиме потенцијалните земји членки и ќе работам на ова. На почетокот на својот мандат ќе ги посетам овие земји за да дадам до знаење дека продолжуваме со овој процес и да ја постигнеме нашата  цел, а тоа е целосна интеграција на западниот Балкан“, порача Австриецот.

Хан додаде дека напредокот кај земјите од регионот е евидентен, пред се преку започнувањето на пристапните преговори со Србија, а претходно и со Црна Гора, а според очекуваното времетраење на процесот на преговорите, јасно е дека тоа е долг процес и дека најпрво ќе мора да се направат реформи во клучните области, како што се човековите права и независното судство./крај/мф/бс