Високиот комесар на Обединетите нации за човекови права Зеид Рајад ал-Хусеин ја повика во петокот Македонија да ја прекине „систематската политика на протерување и заточување“ на мигрантите, истакнувајќи дека околу 180 мигранти, од кои 80 биле деца, со месеци живеат во „несигурност“.

„Барам од владата да го прекине таквото постапување, со коишто го крши меѓународното право“, навел во соопштение високиот комесар за човекови права на ОН, Зеид Рајад ал-Хусеин.

Критиката следува откако неодамна, на почетокот од септември, во земјата престојувале негови соработници. Зеид напишал дека е „изразено загрижен“ од состојбата на 180 мигранти кои живеат „во несигурност“ во центрите кај Табановце, кон границата со Србија, и кај Гевгелија кон границата со Грција, откако во март годинава беше затворена македонско-грчката граница, откако претходно таквата одлука ја донесоа неколку земји од Европската унија а ја следеа другите земји од ткн Балканска рута, кои се главните дестинации на мигрантите.

„Овие лица влегле во Македонија пред март, и останале блокирани во земјата. Живеат во два центра од кои едниот е речиси затвор. Тие се во состојба на голем стрес. Децата не им одат на училиште… “, рекла портпаролката на Високиот комесаријат Сесил Пуили, пренесува AFP и оценила дека речиси немаат никакви шанси да го регулираат статусот по неодманешниот амандман на Законот за азил..

Според податоците на ОН, од околу 600 баратели на азил во 2015 година, само 5 лица добиел статус на бегалци на прва истанца, но не се појаснува дали станува збор за лица од земји кои се прогласени за „сигурни“,

Високиот комесаријат предупредува и на наводното „административно заточени без законска контрола“ и во „изразено несоодветни услови“, за мигрантите во центрите . Од македонските власти, исто така, се бара „повнимателно да ја следат состојбата“ во двете села Лојане и Ваксинце, поради сомневања дека станале „центри за трговија со раширени злоставувања“.Во текот на мигрантската криза во 20-15 година по ткн Балканска рута низ Македонија мина илјадници лица кои бегаа од земјите на Блискиот и на Далечниот исток. Од март таа рута е затворена, по што беше затворена и границата меѓу Македонија и Грција.

Мали групи мигранти главно од Авганистан, Ирак и Сирија, сé уште се обидуваат да минат низ Македонија до западна Европа, според министерството за внатрешни работи, кои веднаш ѝ се предаваат на Грција.

Претходно во четвртокот македонскиот претседател Ѓорге Иванов во својот говор на 71-то Генерално собрание на ОН, говорејќи за мигрантската и бегалска криза изјави дека е горд што како Врховен Командант, со субјектите на кризниот менаџмент, со навремена реакција се успеало да се заштити националната безбедност на Република Македонија.

„Првиот мигрантски бран ги еродираше европските институции, механизми и политики. Спречувајќи ја илегалната миграција, Република Македонија успеа во голема мера да придонесе за безбедноста на Европа. Европа веќе се соочува со вториот, помасовен бран. Повеќе од 20 милиони мигранти и бегалци од Азија и од Африка се наоѓаат во близина на надворешните граници на Европа. Во наредните години и децении милиони мигранти ќе се обидуваат да дојдат на европскиот континент. Република Македонија ја спречува илегалната миграција која доаѓа од територијата на ЕУ. Унијата мора да изнајде начини и механизми да ги заштити границите, да ги обезбеди коридорите, а оние мигранти и бегалци кои ќе ги прими, да ги интегрира, без притоа да ги асимилира“, рече меѓу другото претседателот Иванов./крај/мф/бс

Извор: Макфакс