Македонскиот јазик и македонскиот идентитет не се на маса за преговори, вели премиерот Зоран Заев одговарајќи на новинарски прашања поврзани со неговото вчерашно интервју за бугарски медиум.

„Никаде во светот не се преговара за идентитет и за својот мајчин јазик“, додава тој.

Во однос на окупацијата од страна на фашизмот вели дека била присутна насекаде во Европа и светот.

„Таа е окупација, но не е причина да кажете дека цел еден народ, без разлика дали е македонскиот, албанскиот, бугарскиот, српскиот, е окупатор. Затоа велам администрација. Затоа што тогашното раководство на Бугарија, царска Бугарија, се приклучува и донела одлука да му се приклучи на третиот пакт, како што знаеме сите, и тоа е факт. Но, денес да зборувате за фашистичка Бугарија, фашистичка Германија, да зборувате за цела една нација, да зборувате за денешните генерации како резултат на одреден дел предци што тоа го направиле. Тоа не е поглед кон иднината“, смета премиерот.

Според него, прашањето е дали ги употребуваме вистинските зборови за да градиме пријателство или не.

„Треба да ги прифатиме историските факти, треба да ги признаеме грешките, да не заборавиме на минатото, но, секако да си простиме, да си подадеме рака и да одиме заедно заради тоа што тоа е најмалку што нашите деца го очекуваат од нас“, вели Заев.

Тој нагласува дека постојат факти што може да ги потврдат сите, а тоа е дека царска Бугарија во 1941 година застанува на страната на тројниот пакт, на фашизмот, но, како што вели, во тие моменти никој не ги прашал Бугарите на референдум за нивната определба за да можеме денеска цела Бугарија да ја квалификуваме како фашистичка.

„Тоа не е пријателство, тоа не е европски. Зарем заборавивме дека и во нашата Македонија и тогашна Југославија имаше соработници на окупаторите, на фашистите, домашни предавници. Тоа не ги прави фашисти ниту денешните Германци, Италијанци, Бугари, Јапонци или слично. Европа ги реши прашањата на европски начин, треба и Балканот да ги реши прашањата на европски начин  ако сака да продолжи кон Европа“, вели македонскиот премиер.

Тој посочи дека ги разбира реакциите од јавноста, но додава дека лидерите треба да ја водат државата.

„Јас целосно ги разбирам поривот на чувствата на одредени сограѓани. Антифашистичката борба е дел и од моето семејство, дел од градот во кој живеам. Дел од мојата татковина. Но, тоа историско минато не треба да нè ограничува во трасирањето на патот на нашата европска иднина. Дури 85 % од граѓаните се за интеграција во ЕУ и ако не гледаме низ призмата на простувањето, низ призмата на пријателството, низ призмата на подавањето рака, треба да знаеме дека тоа не е начин за исполнување на целта на патот по кој тргнавме“, истакна премиерот Заев.

Идејата на договорот за добрососедство беше историјата да им се остави на историчарите за ние да се занимаваме со сегашноста и иднината, порача на социјалните мрежи вицепремиерот за европски прашања, Никола Димитров, во однос на преговорите со источниот сосед.

Тој повикува билатералните прашања да се решаваат без тие да бидат пречка на патот кон ЕУ.

„Македонскиот јазик и самоопределување, државотворноста и идентитетот, ниту може да бидат пречка за интеграција со Унија, која почитува културни и јазични различности како темелна вредност, ниту може да бидат пречка за вистинско пријателство бидејќи тоа секогаш се базира на заемна почит“, нагласува Димитров во својата објава.

Според него, ова е битка не само за македонската суштина, туку и за сржта на европските вредности, од кои, како што вели, нема отстапување.

„Ова е бесмртниот вирус на идеали против кој залудно се бара вакцина“, порачува вицепремиерот.

Премиерот Зоран Заев изрази жалење што неговото интервју за „Бгнес“ предизвика толку негативни емоции, кои вели дека ги разбира.

„Никој не ги прашал Бугарите на референдум за да можеме денеска цела Бугарија да ја квалификуваме како фашистичка“, рече Заев образложувајќи ги своите ставови од вчерашното интервју.

Тој наведе дека и во Македонија имало соработници на окупаторите.

„Во исто време имам обрска кон македонските граѓани да поттикнам придвижување кон решение. Треба да се соочиме со тие прашања од историјата и да развиеме капацитет за простување. Европските народи се договорија да не заборават, но да си простат“, рече Заев.

Тој вели дека во 1948 се заладиле односите во тогашна Југославија и Бугарија и постоела железна завеса. Премиерот заедничката историја со Бугарија ја гледа во тоа што, според него, во историјата имало луѓе што истовремено се чувствувале и како Македонци и како Бугари.

Заев за отсранувањето на спомен-плочите на кои пишува „бугарски фашистички окупатор“ вели дека тоа е во согласност со договорот за пријателство со Бугарија.

„На некои од плочите каде што пишувало бугарска фашистичка рака и бугарски фашистички куршум е оставено фашистички куршум, фашистичка рака, затоа велиме да не заборавиме, но преку простувањето да внимаваме. Тоа е направено на целата територија на државата, на многу места, најголем дел надлежни се самите општини“, рече Заев.

„Дајте да живееме денес, време е денес да создаваме историја, историја што обезбедува иднина за младите генерации“, повика Заев.

„Не знам дали ќе помогне интервјуто, сакам да му помогнам на мојот македонски народ“, одговори Заев на прашањето дали интервјуто ќе помогне или одмогне во прговорите со Бугарија.