Надворешна политика
Жбогар: Назадувања во многу области, но препораката сепак останува
Во најновиот извештај на Европската комисија (ЕК) за напредокот на Македонија се нотирани назадувања во многу области, но, сепак, она што е позитивно е што препораката за почеток на пристапните преговори останува, но под услов изборите да бидат кредибилни и Пржинскиот договор да биде целосно имплементиран, порача во средата по објавувањето на Извештајот, евроамбасадорот во Скопје Самуел Жбогар.
Најголем дел од назадувањата се однесуваат на областите на судството, борбата против корупцијата и медиумите, потенцираше Жбогар.
„Немаше напредок во судството во однос на минатогодишниот извештај и препораките, како и прашањата кои беа содржани во итните реформски приоритети. Корупцијата, исто така, преовладува во многу области и останува сериозен проблем, тука немаше напредок во однос на минатогодишните препораки. Капацитетите за ефективно справување со корупцијата не се доволни и постои политичко мешање во соодветните тела. Немаше ниту напредок во поглед на борбата против организираниот криминал, потребна е подобра ефикасност во борбата против перењето на пари и повеќе финансиски истраги, како и при конфискувањето на имот. Слободата на медиумите останува сериозен предизвик во политичката клима, и покрај неодамнешните охрабрувачки знаци, недостигаше балансирано известување, а немаше ниту целосна транспарентност во владиното рекламирање. Заплашувањето и нападите против новинарите мора да престанат“ изјави Жбогар.
Како позитивни моменти кои се случија минатата година, евроамбасадарот ги издвои постигнувањето на политичкиот договор и одредувањето на датум за изборите, со што сега постои и реална шанса за излез од двегодишната политичка криза.
„Сите политички сили треба да обезбедат услови за кредибилни избори на коишто народот ќе ја изрази својата слободна волја, каде партиските и државните активности ќе бидат јасно одвоени, каде судиите и администрацијата ќе можат да работат без политички мешање и каде Државната изборна комисија (ДИК) ќе може да продолжи со својата работа, а исто така балансираното медиумско известување ќе им овозможи на граѓаните да бидат соодветно информирани и да донесат одлуки“, додаде тој.
Жбогар, како и пред него еврокомесарот за соседска политика и пристапни преговори Јоханес Хан, порача дека Специјалното јавно обвинителство (СЈО) е клучен дел од политичкиот договор и дека мора да се направат напори кои на ова тело ќе му обезбедат кредибилитет при решавањето на сите случаи кои произлегоа од прислушување.
„СЈО е дел од договорот и мора да има напори на ова тело да му се обезбеди кредиблитет во решавањето на случаите од прислушувањето. Истовремено, Парламентот мора да утврди политичка одговорност за прислушувањето и содржините кои произлегоа од него“, додаде Жбогар. Хан, пак, на пресконференцијата по повод претставувањето на извештаите за напредокот на земјите кандидати исто така порача дека на СЈО треба да му се дозволи да ја врши својата работа.
„СЈО мора да ја изврши својата работа а потоа резултатите да бидат доставени до основните судови, кои ќе треба да спроведат судења и да донесат одлуки. Важно е сите да се однесуваат на значаен, одговорен и професионален начин. Дефинитивно состојбата не е лесна, за земјата и за одредени клучни лица во земјата, но тоа е еден незаменлив елемент од понатамошната нормализација на политичката состојба во земјата. Се надевам дека сите се свесни за сопствената одговорност, дека ќе ги преземат неопходните мерки и заемно ќе се почитуваат во вршењето на своите должности“, рече Хан.
Запрашан околу можноста за формирање на Специјален суд, тој додаде дека фокусот сега треба да биде ставен на спроведувањето на фер и транспарентни избори, а потоа новата владата ќе треба да го реши ова, како и низа останати прашања.
„Сé уште има време, СЈО треба да ја изврши својата работа и секако дека во моментот има потреба од проценка за тоа, но сега треба да се фокусираме на изборите, формирањето на новата влада и потоа да се насочиме кон следните чекори, а дел од Пржинскиот договор е целосното разрешување на аферата со прислушувањето“, порача еврокомесарот, додавајќи дека на неодамнешните позитивни чекори во поглед на Пржинскиот договор мора да се гледа како на шанса за конечно надминување на политичката криза./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.