Македонија
Новинарот на „Фокус“: Изворот кој ми ги даде личните карти е пратен од некој кој знае многу повеќе
Новинарот на неделникот „Фокус“, Љубиша Арсиќ во понеделник сведочеше во судот за случајот со фалсификувани лични карти во којшто обвинет е Захир Бекири – Чаушот и неговиот брат.
Не откри кој му ги дал фалсификуваните лични карти, случај за којшто овој неделник пишуваше во неколку продолженија, но се сомнева дека човекот бил пратен од „некого кој знае многу повеќе од него“.„Не сакам граѓаните, идни пријавувачи на кривични дела, да ги ставам во загрозена позиција и да ги одвратам од пријавување. Многу извори прво ги пријавуваат криминално-корупциските случаи во медиумите наместо во институциите. Не сакам да отворам простор за спинување на информацијата знаејќи ја медиумско-политичката спрега. Не сакам да ги изневерам моите колеги новинари и овој извор за мене останува анонимен“, изјави Арсиќ одговарајќи на прашањето на Јавната обвинителка, дали му е познат идентитетот на лицето што му ги дало личните карти.Изворот му ги предал личните карти на улица и го замолил да не го открива неговиот идентитет, иако новинарот не го ни познавал. Му нагласил дека има лица кои многу повеќе знаат од него, но чекаат погоден момент кога ќе го соопштат тоа. Арсиќ изрази сомнеж дека човекот е испратен „од некого што знае повеќе од него и што има повеќе информации од него“. Му предал вкупно 105 примероци од лични карти завиткани во бел лист хартија кој не бил целосно завиткан. Му кажал дека се фалсификувани и дека се изработуваат на две локации и дека немаат метална фолија. Според изворот, постоеле триесетина илјади такви лични карти коишто биле употребени на избори. Ова за новинарот биле иниции да започне новинарско истражување, но случајот најпрвин го пријавил во централата на Министерството за внатрешни работи, каде го примил Директорот на Бирото за јавна безбедност. „Тоа што за нас како редакција беше важно во случајот, имајќи во предвид дека имаме постојани контакти со анонимни и непознати извори, не ни беше важно да се занимавме со фалсификувањето, тоа е обврска на институциите, тргнавме кон истражување на еден поширок контекст. Кои се лицата на фотографиите, дали постојат, дали личните податоци се нивни и вистинити и да се обидеме да одговориме на дилемата дали навистина ваквите лични карти завршиле на избори. И по 7-8 месеци и за мене и за ‘Фокус’ и за јавноста остана непознато кој ги изработувал личните карти, каде, со каква цел, дали е нечија нарачка, дали некој плати, зошто сум избран јас и зошто е избран „Фокус“ како медиум“, рече Арсиќ. Судењето продолжи со сослушување на лице, чии лични карти биле злоупотребени.На минатото рочиште како сведок на Обвинителството беше сослушан Сашо Јовановски, началник на Одделението за финансиски криминал во Бирото за јавна безбедност при МВР.Сведокот потврди пред судот дека во компјутерите запленети од домот на Бекири биле пронајдени фајлови кои се совпаѓаат со податоците од 105 лични карти кои новинар на неделникот „Фокус“ ги пријавил во Министерството за внатрешни работи. Јовановски истакна дека на 54 лица им биле злоупотребени личните податоци од нивните лични карти.Захир заедно со својот брат Имер се сомничат дека стојат директно зад аферата со фалсификуваните лични карти.Според обвинението, Захир Бекири во својот дом имал работилница за изработка на фалсификувани документи, преса, секачи, амблеми, фалсификувани полномоштва од нотари./крај/мф/ффс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Посебен сообраќаен режим утре и задутре во Тетово поради предизборни митинзи
СВР Тетово информира дека поради одржување на митинзи на политичките партии во рамки на предизборната кампања во следните два дена (недела и понеделник) ќе има посебен сообраќаен режим во центарот на градот.
– Ќе се воведе посебен режим на сообраќајот и тоа по булевар „Илирија“од влезот на Тетово сè до плоштадот, односно кружниот тек со булевар „Илинденска”, при што нема да се дозволува паркирање на возилата низ булеварот. Исто така, за време на митинзите сообраќајот ќе биде пренасочен по другите улици, и тоа по улиците „ЈНА“, „Тодор Ципоски-Мерџан”, „Јане Сандански“ и улица „Никола Тесла“, се вели во соопштението на СВР Тетово.
Отттаму со апел возачите да бидат трпеливи и да ги почитуваат наредбите што ќе ги издаваат полициските службеници.
Македонија
Ковачевски: Имаме задача да не се откажеме од европскиот сон за подобра и просперитетна држава за идните генерации
„Нашата генерација има задача да не се откаже од европскиот сон на земјата и да направи сè за Македонија да стане рамноправна членка на Европската Унија“, порача претседателот на СДСМ, Димитар Ковачевски, на митингот на Коалицијата за европска иднина во Кичево.
Ковачевски истакна дека денеска кога чествуваме 121 година од смртта на македонскиот револуционер, идеолог и учител, Гоце Делчев, важно е да се потсетиме дека низ историјата нашиот народ не се откажувал дури ни пред најтешките предизвици. Порача дека 8 мај е нов историски крстопат, денот кога сите прогресивни и демократски сили во државата треба да одлучат државата одлучно да продолжи на патот кон Европската Унија.
„Само така ќе изградиме подобра и просперитетна држава за идните генерации. Држава со европски животен стандард, европски вредности, европски правила на игра“, рече Ковачевски.
Ако ВМРО ДПМНЕ и Силјановска се дограбат до власта, ќе стават рампа на патот на Македонија кон Брисел и ќе можеме да се збогуваме од ЕУ, истакна Ковачевски.
„Не смееме да ја повториме грешката од минатото и да дадеме преголема моќ во рацете на десничарска партија како ВМРО ДПМНЕ. Уште се свежи раните што ѝ ги нанесоа на државата за време на нивното 11-годишно владеење на Македонија. Сетете се на заробените медиуми, замолчените вработени во јавниот сектор, натепаните студенти во библиотеките и плоштадите. Сетете се на милионите потрошени за жални врби, лажен барок, евтин стиропор само за да се богатат поединци од ВМРО – ДПМНЕ“, истакна Ковачевски.
Лидерот на СДСМ пред граѓаните на Кичево најави повисоки плати и пензии, пакети за поддршка на учениците и студентите, одговорна социјална политика и одлучна борба против криминалот и корупцијата.
Македонија
Проданоски: Експресниот пат Градско-Прилеп ни од далеку не е готов, да ставиме крај на лагите на СДСМ на 8 мај
Тука сме на лице место за да ги разобличиме лагите кои што СДСМ се обидуваат да ги пласираат до јавноста, рече Дејан Проданоски, претседател на ОК на ВМРО-ДПМНЕ Прилеп.
– Овде во Дреновската клисура каде што сме на самиот старт на почетни градежни активности, а за кои што слушнавме дека во 90 % експресниот пат е завршен. Овие се истите лаги исто како оние на почетокот на нивниот мандат кога Фејсбук и Гугл чекаа на граница, истите лаги како фабриката за автомобили во Тетово. Но, македонските граѓани треба да видат и да знаат дека овде на ова место е сам старт на почеток на градежни активности, а не е видлив ниту крајот на она како што тие сакаат да го пласираат. Да не зборувам тука и за третата фаза од експресниот пат за која што има обезбедено средства и за која што можеше исто да биде завршена ако не беа платени пеналите кон компанијата на која што и се бараше рекет за да остане да го гради автопатот и се изгуби значително голем период од изградба на патот и барање на друга компанија, рече тој.
На лагите од СДСМ им нема крај, овие лаги мора да завршат, затоа на 8-ми мај ве повикувам сите да заокружите број 2 за да и ова автопатско решение биде завршено и биде ставено во функција на секој граѓанин на Република Македонија, додаде Проданоски.