Македонија
Официјализирање на албанскиот јазик и интеграции за коалиција со ДУИ

Партијата од албанскиот блок што освои најмногу пратенички мандати на предвремените парламентарни избори одржани на 11-ти декември, Демократска унија за интеграции ќе коалицира со онаа партија од македонскиот блок која ќе вети изполнување на петте ветувања што ДУИ ги даде пред електоратот.
„Демократската унија за интеграции има целосен легитимитет да ги претставува Албанците во Собранието и да преговара со кого сака за состав на нова влада. Во коалиција ќе влеземе само со онаа партија која ќе се согласи да ги исполниме петте ветувања што ги дадовме до албанското гласачко тело“, изјави Бујар Османи во емисијата „Клик Плус” на ТВ 21.
Инаку, ова е 11-та победа по ред по формирањето на партијата во 2002 година.
„Ќе преговараме со било и да е партнер од можните коалиции, само врз основа на петте ветувања од нашата платформа – официјализирање на албанскиот јазик, пропорционална распределба на Буџетот, решение за спорот околу името, интеграција на Македонија во НАТО и инфраструктурното поврзување на териториите населени во поголемиот дел со Албанци. Ова се условите кои ги има ДУИ, за да влезе во коалиција“, изјави Османи.
Ермира Мехмети, досегашната пратеничка на ДУИ деновиве изјави дека ДУИ е морален губитник на изборите поради тоа што не се противеле на политиките на ВМРО-ДПМНЕ, па според неа, ДУИ треба да се реформира и засега да остане во опозиција.
„На прстите од една рака можат да се избројат луѓето од ДУИ кои се за коалиција со ВМРО-ДПМНЕ“, изјави Мехмети.
Експерти сметаат дека по прогласот на ВМРО-ДПМНЕ и говорот на Никола Груевски, лидерот на партијата, пред партиските приврзаници на протестот пред ДИК, позициите на ДУИ во однос на продолжување на старата коалиција повеќе од сигурно е дека се малку поместени. Сметаат дека ДУИ тешко ќе може да ја оправда антизападната реторика на Груевски, ако се знае дека интеграциите се клучен дел од платформата на ДУИ./крај/мф/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Стабилна е здравствената состојба на осумтемина македонски пациенти“: Сиљановска-Давкова ги посети во Софија

Претседателката Гордана Сиљановска-Давкова објави дека ја посетила болницата „Пирогов“ во Софија каде што се згрижени повредените во трагичниот пожар во Кочани.
„Со чувство на длабока и искрена грижа, најпрво ја посетив болницата „Пирогов“ во Софија каде што се згрижени и се лекуваат македонските граѓани повредени во трагичниот пожар во Кочани.
Во разговорот со министерот за здравство, проф. д-р Силви Кирилов, заменик-директорот на болницата, проф. д-р Николај Габровски и раководителката на Одделот за изгореници и пластична хирургија, доц. д-р Маја Аргирова, бев информирана дека здравствената состојба на осумтемина македонски пациенти е стабилна, се наоѓаат под постојан надзор од страна на врвни, искусни лекари и дека процесот на закрепнување бележи напредок.
Во присуство на лекар Македонец, ми беше овозможен подолг разговор со најблиските роднини на македонските пациенти. Тие најпофално се изразија за болничкиот персонал и манифестираа радост за видно подобрената состојба на нивните најмили“, информира претседателката.
Таа појасни дека се сретнала и со дел од бугарските медицински тимови коишто директно учествуваа во укажувањето на итна медицинска помош и им изразила особена благодарност за нивната пожртвуваност, човечност и професионалност.
„Нивната благородна мисија е вистинско олицетворение на медицинската етика, солидарноста и хуманоста, вредности коишто ќе останат темел на заемна почит и искрено пријателство меѓу двата блиски народа, бугарскиот и македонскиот“, објави Сиљановска-Давкова.
Македонија
Можно зголемување на водостојот на реките во западните делови од земјата, најави ЦУК

Водостоите на реките низ земјава се во опаѓање. Водостојот на река Вардар исто така бележи намалување по целото течение на реката и тоа се очекува да продолжи до крајот на денот, соопшти ЦУК.
„Во доцните вечерни часови и за време на претстојната ноќ се очекуваат нови врнежи од дожд претежно во западните делови на земјата каде се прогнозираат количини на врнежи од 15-20 l/m2. Земјата полека се заситува со влага од претходните врнежи изминативе денови така што можна е реакција на реките во западниот дел на земјата и извесно зголемување на нивниот водостојот. Зголемување на водостојот доцна во ноќта и утре изутрина може да има на река Треска, река Црна, на водотеците од горниот дел од сливот на река Вардар, како и на реките кои доаѓаат од планинскиот масив Солунска Глава“.
Според прогнозите можни се и краткотрајни врнежи со умерен интензитет кои што можат да доведат до брзо зголемување на водостојот на помалите реки и суводолици во западниот дел на земјата, односно на малите реки и суводолиците кои доаѓаат од Шар Планина и од планината Јакупица (масивот Солунска Глава).
Пообилни врнежи можни се и во делови од градските средини како Тетово и западниот дел на Скопје каде што предупредуваме на внимание.
Во источниот дел на земјата во текот на денешниот ден не се очекуваат поголеми зголемувања на водостоите.
ЦУК предупредува на внимателно движење покрај реките и суводолиците во текот на вечерните часови и ноќта.
Македонија
Мицкоски и Филипче ги поделија сферите на интерес и се договорија да ја задушат правдата, велат од Алијанса за Албанците

Премиерот Христијан Мицкоски и лидерот на СДСМ, Венко Филипче во изјавите по денешната скандалозна средба ги потврдија сите наши сомнежи и ги открија своите планови, велат од Алијанса за Албанците.
„Тие се согласија да формираат работни групи во три области кои се поврзани, се вкрстуваат или од интерес за двајцата лидери. Ќе ја подготват реформата во здравството, сфера на интерес на Венко Филипче каде што ќе се заобиколи актуелниот министер Арбен Таравари, во енергетиката, сфера на интерес на Христијан Мицкоски, сопственикот на хидроцентралите и на крајот, „правдата“ каде Филипче и Мицкоски имаат заеднички интерес да се спасат меѓусебно од одговорноста за Кочани, Модуларната Болница во Тетово, Беса Транс и Дурмо Турс и другите трагедии и скандали кои се случија во земјава“, истакнуваат од оваа партија.
Овој договор, како што велат е целосно игнорирачки за Албанците, а воопшто не ги третираат ни нивните албански „партнери“ во Владата.
Овој договор, според Алијанса за Албанците е и против граѓаните, по секоја цена да ја сокријат вистината од нив, да го заробат системот, да инсталираат диктатура како што одамна ја заробија и македонската опозиција и да го уништат секое досегашно достигнување.
По оваа средба, што ќе биде со повторното судење за трагедијата со Модуларната болница во Тетово, кога најодговорниот човек за таа болница ќе го води реформскиот процес во име на „правдата“, прашуваат од оваа партија.