Одделението за превенција при СВР Скопје и Републичкиот совет за безбедност на сообраќајот на патиштата денеска на подрачјето на ПС ОН Центар продолжија со реализацијата на активностите во рамките на превентивната кампања „Носи кацига, вози внимателно“, чија основна цел е внимателното и одговорно учество во сообраќајот со цел зголемување на безбедноста.

При реализацијата на кампањата, што е дел од оперативниот план „Безбедно лето 2022“, беа реализирани средби и едукативни разговори со возачите на мотори и на електрични тротинети, а беа делени и летоци со едукативни содржини, соопшти МВР.

Основните пораки до учесниците во сообраќајот се насочени кон нивно запознавање со законската регулатива од оваа област на сообраќајот, почитување на сообраќајните правила и прописи, а во насока на општо зголемување на сообраќајната култура и безбедност.

Денеска, во спомен на осумтемина бранители и припадници на Армијата, кои животот го загубија кај месноста Љуботенски Бачила, министерката за одбрана, Славјанка Петровска, и началникот на Генералштабот, генералот Васко Ѓурчиновски, положија венец свежо цвеќе на спомен-обележјето на загинатите бранители кај Љуботенски Бачила.

Во чест на загинатите, а како дел од низата одбележувања на овој настан, Петровска како предводник на владината делегација, во чиј состав беше и советникот за одбрана на претседателот на Владата, Драган Василевски, положија венец свежо цвеќе и пред спомен-плочата на загинатите бранители во касарната „Илинден“ во Скопје.

На овој ден, пред 21 година, на патот кај месноста Љуботенски Бачила животот го загубија Томе Бадаровски, Гоце Чанкуловски, Бранко Јанев, Томислав Настевски, Марјанчо Бошевски, Ивица Златевски, Томе Димовски и Раде Јанковски, припадници на резервниот состав на Армијата.

Нема хоспитализиран пациент суспектен за мајмунски сипаници, информираат од Клиниката за инфективни болести.

„Во врска со пациентот што се споменува во медиумите, според информациите од кичевската болница, станува збор за суспектен пациент, кој е во добра здравствена состојба и со уредни лабораториски резултати, кај кого е дадена препорака за тестирање“, се додава во информацијата од Клиниката за инфективни болести.

Во моментот, појаснуваат од таму, се организира епидемиолошки тим, кој ќе спроведе епидемиолошка анкета.

„До овој момент не е доставен материјал за тестирање во Институтот за јавно здравје и во државата нема потврден случај на мајмунски сипаници“, е нагласено во соопштението.