Министерот за економија, Крешник Бектеши, смета дека работното време на угостителските објекти ќе биде продолжено до 23 часот.

„Продолжување на работното време, најверојатно, ќе има од 21 јануари, а до кога ќе биде продолжението, ќе зависи од предлогот што ќе го даде Комисијата за заразни болести. Имајќи ја предвид ситуацијата, јас мислам дека би требало да биде до 23 часот. Тоа е моето видување“, рече Бектеши.

Според неговите сознанија, вели дека не се работи на изготвување нови протоколи за работењето на угостителските објекти.

„Постојните мерки се со важност до 21 овој месец. Во согласност со сите податоци што ги имаме ние како Влада и во склоп на кризниот штаб, се предвидува да се продолжи работното време. Има неколку опции, мислам дека на 21 овој месец, кога ќе имаме и кризен штаб, навремено ќе ги информираме сите угостителски објекти. Но, најверојатно, ќе има продолжување на работното време на угостителските објекти“, повтори Бектеши.

Србија ќе ни отстапи 8.000 вакцини од „Фајзер“, a потоа можеби и ковид-вакцини од другите производители.

Премиерот Зоран Заев соопшти дека ја прифатил понудената помош од Србија преку претседателот Александар Вучиќ.

„Како што знаете, во последната недела бараме поддршка и од други земји да ни дадат помош за да можеме што побргу да почнеме додека не стигнат првите 5.850 дози во февруари. Сакам да ја споделам оваа среќна вест со граѓаните, понудената помош од Република Србија преку претседателот Вучиќ ја прифативме. Утрово разговаравме со претседателот Вучиќ и тие прифатија да ни помогнат. Деталите ќе ги утврдиме во текот на денот. Знам дека она што може да го потврдат е 8.000 вакцини од ‘Фајзер’, а другите имаат договори што треба да ги проверат, клаузули дали може тоа да го направат“, изјави Заев пред Граѓанскиот суд.

Српскиот претседател Вучиќ понудил вакцините да се доделат како донација, но Заев инсистирал тие да бидат платени по што се договориле Македонија да ги добие вакцините по нивната набавна цена.

Во минатите недели Бугарија и Грција сами се пријавија да ни отстапат дел од ковид-вакцините со кои тие ќе располагаат, но сè уште нема ни трага ни глас од нивната помош за Македонија.

Државниот студентски дом ја информира јавноста дека благодарение на донација, во текот на вчерашниот ден (14 јануари) обезбедена е доволна количина на екстра лесно масло за затоплување на студентите сместени во студентскиот дом „Кузман Јосифовски Питу“ во Скопје.

Со тоа е надминат проблемот, кој, како што информираат надлежните, настанал поради технички причини.

Директорот на Државниот студенски дом, Виктор Велевски, во соопштението изразува благодарност до компанијата Gulf Oil, која го обезбедила маслото за греење.