Една година по обелоденувањето на скандалот „Јавна соба“ за групата на социјалната мрежа „Телеграм“, каде илјадници членови споделуваа експлицитни фотографии од девојки од Македонија, вклучително и на малолетнички, истата повторно е во центарот на вниманието.

„Јавна соба“ повторно е активна и според тековните информации овој пат не се работи за една група, туку за повеќе групи.

Во овие групи на „Телеграм“ членуваат и по над 5 илјади членови – сите користат прекари, а нивните телефонски броеви не можат да се видат.

Дел од членовите користат имиња на министри и бизнисмени, но невозможно е да се утврди дали истите се автентични доколку ги немате во својот именик.

Она што може да се види се ликовите на девојките чии фотографии се споделуваат. Дел од нив фотографиите ги споделувале со нивните партнери, дел на социјалната мрежа „Инстаграм“, но сепак, клучното е дека тие не дале согласност нивните имиња, презимиња, ликови, па дури и телефонски броеви да бидат споделувани со илјадници други луѓе.

Аферата „Јавна соба“ ја отвори порталот „А1он“ минатата година, во јануари.

Креаторот на групата во таа пригода изјави дека немал намера групата да се претвори во размена на порнографски материјали, туку случајот сам излегол од контрола.

Тој неколку дена подоцна самиот се пријави во полициска станица. Против него беше поднесена кривична пријава, а тогашниот технички министер за внатрешни работи Наќе Чулев изјави дека имаат релевантни сознанија за лицата кои членувале во групата и разменувале фотографии.

Во февруари лани, пак, беше обелоденето дека социјалната мрежа „Телеграм“ не дава информации за членовите на порнографската група „Јавна соба“, а техничкиот министер Чулев изјави дека седиштето на „Телеграм“ во Лондон ја затворило групата и ја прекинало понатамошната соработка.

Во изминатите 24 часа во ковид-центрите во Скопје се хоспитализрани 19 нови пациенти поради компликации од коронавирусот, информираат од Министерството за здравство.

Од таму додаваат дека вкупно 262 лица сомнителни и потврдени за Ковид-19 се лекуваат на инфективните оддели во главниот град.

Во последното деноноќие, на интерните клиники имало 6 приеми.

„Во ковид-центарот во ГОБ ‘8 Септември’ имало 4 нови приеми на пациенти, а на Инфективната клиника 10 во текот на вчерашниот ден. Во изминатите 24 часа дома се пуштени 22 оздравени пациенти“, се наведува во соопштението.

Во моментов на Кожната клиника во ковид-центарот се лекуваат 19 пациенти, на Клиниката за неврологија 16 болни, а на Институтот за ТБЦ се примени вкупно 22 пациенти со симтоми на коронавирусот, во ковид-центарот на Клиниката за нефрологија се сместени 16 пациенти. На Клиниката за гастроентерохепатологија лежат 12 пациенти.

Во ГОБ „8 Септември“ има вкупно 81 болен, а на Клиниката за инфективни болести лежат 88 пациенти, додека во Иститутот за белодробни заболувања кај деца (Козле) има 8 пациенти.

Од вкупно 262 пациенти кои лекуваат на инфективните оддели во болниците во главниот град, голем дел се на кислородна поддршка.

Бројот на приеми во изминативе денови е стабилен и утрово до 8 часот имало 140 слободни места, а се очекува во текот на денот по направените исписи на оздравени пациенти да се ослободат и дополнителни места.

Текот на наставата во второто полугодие и реформските процеси во образованието беше тема на разговорот со Здружението на директори од основни и средни училишта, кој денеска го оствари министерката за образование, Мила Царовска.

Како што информираат од ресорното министерство, на средбата директорите дале безрезервна поддршка на реформите и напоменале дека целосно и посветено ќе се вклучат во целиот процес на имплементација.

Министерката Царовска рекла дека со реформата за првпат учениците се ставаат во фокусот на образованието, а наставниците се клучната алка во наставата.

Таа посочила дека училиштата треба да станат интересни места каде ќе се поттикне љубопитноста и критичкото и креативното размислување на децата и додала дека токму тоа се нуди со оваа реформа.