По вчерашната јавна презентација на проектот „Гранд Скопје“, предвиден на парцелата 1.1 спроти хотелот „Холидеј ин“, со свои реакции до медиумите и поддршка на проектот се јавија архитектите Драгољуб Доновски и Веселинка Герасимова-Петровска и шумарскиот инженер Ѓорѓи Самарџиев.

Архитект Драгољуб Доновски, кој има голема референтна листа на проектирани и изведени објекти од станбената и деловно-комерцијалната архитектура, вели дека, конечно, на повидок е еден нов лик на централниот градски простор во Скопје.

Неговата изјава ви ја претставуваме во целост: „Нова престижна модерна архитектура од форматот на Заха Хадид (Радиус). Браво. Доста беше. 60 години го гледаме просторот со привремен паркинг-простор. Никој ништо не презема да се облагороди. И, конечно, се појавија инвеститори. Кои и да се. Браво за нив и среќа за сите нас (мислам на нас, оние нечипирани и непартиски војничиња). Иако предметната локација нудела многу повеќе м2 за градба, сенсот на инвеститорот да направи нешто убаво, а не некаков дебармаалски злостор, е за поздравување. Балансирани површини за градба, зеленило, подземни паркирања во изобилство и што сè не. Вклопени идеално во блиската околина (Македонска радио-телевизија е 22 ката + антени). Браво за решителноста на инвеститорот за ваквиот чекор. Конечно, нов акцент во просторот. Ако ‘Воинот на коњ’ беше комплетно промашување, еве го правиот нов препознатлив акцент на идното Скопје, нов имиџ, нов downtown. Поздрави и многу успех во реализацијата на проектот. Сè тече, сè се менува, само некои сакаат Скопје да чмае. Доста е!“

Во врска со предвиденото хортикултурно уредување, кое инвеститорот најави дека ќе опфаќа партерно зеленило, високо зеленило – дрвореди, зелени градини на покриви, но и првпат вистински зелени вертикални градини, и тоа на вкупна површина од 6.520 м2, во која не се вкалкулирани вертикалните градини, се јави и шумарскиот инженер и пејзажен дизајнер Ѓорѓи Самарџиев.

„Доколку идниот урбан проект ‘Гранд’ биде изграден во согласност со презентираните визуализации, од аспект на хортикултурата, ќе претставува своевиден урбан бренд, современо моќно здание со интегрирано зеленило. Драгоцено парче во зелениот мозаик на градот“, вели тој.

И архитектот Веселинка Герасимова-Петровска го изрази својот став во врска со јавниот повик „Осмислен простор наместо висококатници кај ‘Холидеј ин’“. Таа вели дека концептот е токму тоа, односно осмислен, а нејзиното обраќање го пренесуваме во целост:

„Во врска со најновите случувања и јавниот повик ‘Осмислен простор наместо висококатници кај ‘Холидеј ин’“, би сакала да го изнесам мојот став во контекст на идеен проект и визуализацијата презентирана од страна на инвеститорот на предметната локација. Имено, како архитект со 26-годишно искуство, учесник во изработка на проектна документација во тим и самостојно, мислам дека понуденото решение од страна на проектантот е токму ”Осмислување на просторот кај ‘Холидеј Ин”, и тој како концепт апсолутно е соодветен за локацијата во строгиот центар на градот. Доблеста на проектантот да создаде простор за препознавање, притоа водејќи сметка да не се искористат максималните параметри од донесениот ДУП за градската четврт Ц08 Ново Маало и притоа да создаде еколошки центар во строгиот центар на градот е за поздравување и тој го поддржувам“.

Инаку, вчера, на онлајн прес-конференција инвеститорот „МГ фешн“ го презентира проектот „Гранд Скопје“, комплексот предвиден да се гради на парцелата 1.1 спроти хотелот „Холидеј ин“. Како што истакнаа од „МГ фешн“, целта на прес-конференцијата беше точно, вистинито и транспарентно да се информира јавноста за почнувањето на градба на комплексот како одговор на големиот број оспорувања во јавноста, но и визуелните прикази што циркулираа, а воопшто не кореспондираа со неговата вистинска слика и вредност.

(ПР текст)

Успешно се дигитализирани услугите за нострификација на диплома за високо образование, за аплицирање за стипендија, а дигитализирано е и аплицирањето за финансирање на проекти за реновирање на училишни објекти, информираат од Министерството заздравство.

Граѓаните, учениците и студентите, локалните самоуправи веќе нема потреба да доаѓаат во министерството туку тоа можат да го направат електронски. Со тоа во период на пандемија се влијае и на зачувување на јавното здравје.

„Имаме изјава од граѓанин којшто за еден ден ја завршил нострификацијата на својата диплома од странство, за што порано би му требале веројатно шест месеци. Ова укажува дека со дигитализација не само што се поквалитетни услугите, туку се и екстремно брзи. Во нашата администрација проблем е човечкиот фактор, а со дигитализацијата се надминува и нема застој во остварувањето на права“, посочи министерката, Мила Царовска.

Таа сепак нагласи дека граѓаните уште не веруваат во дигиталните услуги, па голем дел од студентите и натаму сакаат да дојдат во министерството и да ги достават документите за стипендии, да се сигурни дека имаат архивско бројче.

„Треба да работиме на јавната свест дека дигиталните услуги се достапни и граѓаните преку нив побрзо и поефикасно можат да ги остварат своите права“, рече Царовска.

Во изминатите 24 часа во ковид-центрите во болниците во земјата е пријавено дека се лекуваат вкупно 999 пациенти позитивни и суспектни на коронавирусот.

Според Министерството за здравство, во болницата во Битола се хоспитализирани 138 пациенти позитивни и суспектни на Ковид-19. Во болницата во Штип се хоспитализирани 91 пациент.

На инфективното одделение во Тетово има 41 пациент, во Велес се лекуваат 94 болни, а во Куманово 92 пациенти позитивни и суспектни на Ковид-19.

Во ковид-центарот во Охрид се хоспитализирани 105 пациенти, во Прилеп – 123, во ковид-центарот во Гостивар – 46, а во Струга – 25 болни.

Во болницата во Струмица се хоспитализирани 98 пациенти, во Кочани – 28, во Кичево – 31, во Кавадарци – 61, а во Гевгелија – 26 лица позитивни и суспектни на коронавирусот.

Вкупната бројка на пациенти позитивни и суспектни на коронавирусот што се лекуваат на инфективните оддели во главниот град и во болниците во земјата е 1.687 и има околу 340 празни болнички кревети во ковид-центрите, велат од Министерството.

Информираат дека во текот на денот се прават и исписи на оздравени пациенти, со што ќе се ослободат дополнителни легла.

Додаваат дека сите одделенија на клиничките болници располагаат со болнички места до кои има довод на кислород. Министерството има увид во состојбата со капацитети и доколку има потреба, одделенијата ќе бидат дополнително проширени.