Општество
Силјан Мицевски прогласен за Личност на југоисточна Европа
На свечена церемонија во рамките на фестивалот „SEE A Paris & Berlin“ кој се одржа на еден од најстарите универзитети во Европа, Универзитетот Хумболт во Берлин, истакнатиот бизнисмен, претседател на градежната компанија „Пелистер“, поранешен градоначалник на Битола, актуелен почесен конзул на Република Србија и во Република Македонија, Силјан Мицевски беше награден со престижното признание Личност на Југоисточна Европа.
Признанието го добива како поддржувач на културата и спортот во областа на Југоисточна Европа, а наградата му ја врачи ректорката на овој престижен европски универзитет д-р Сабине Кунтс.
Одборот на фестивалот за Југоисточна Европа секоја година ова признание го доделува на исклучителни личности од регионот на Југоисточна Европа.Од одборот велат дека признанието „ЈИЕ Личност 2016“ се доделува на Мицевски за неговиот долгорочен придонес и ангажман во регионот на Југоисточна Европа како влијателен бизнисмен, поранешен и актуелен вршител на повеќе значајни општествени должности и функции
Обраќајќи се до ректор на Универзитетот Хумболт, претседателот на фестивалот на Југоисточна Европа во Берлин, до директорот на фестивалот Харалд Зиблер и сите останати на церемонијата, Мицевски истакна дека признанието за него претсавува особена чест.
„Ми претставува голема чест што сум прогласен за личност на Југоисточна Европа за оваа година во оваа престижна свечена сала на Хумболт универзитетот, еден од најугледните универзитети во светот. Целиот мој творечки живот во областа на економијата, политичките ангажмани, а од неодамна и во дипломатијата, го посветив на духовното, културното и економското зближување на сите 12 земји во Југоисточна Европа. Покрај мојата родна Македонија, сиве овие земји ги чувствувам како мои земји, како што велеше големиот визионер Конрад Аденауер, за нашата заедничка куќа Европа. Ви посакувам убав фестивал во овој прекрасен град Берлин којшто со своите архитектонски и културни вредности станува нов центар на Европа и светот“, рече Мицевски на доделувањето на наградата за која нагласи дека истата не е само потврда и афирмација на сѐ она што правел досега со уште едно меѓународно признание, туку и поттик за натамошен ангажман.
Инаку, наградениот Силјан Мицевски е познат македонски стопанственик, спортист, поддржувач на културата, уметноста и спортот, донатор, актуелен почесен конзул на Република Србија во Република Македонија и поранешен градоначалник на Општината Битола. Мицевски е магистер на економски науки и генерален менаџер на Градежното претпријатие „Пелистер“ – Битола од 1968 година, кое успешно работи на голем број проекти во Македонија и надвор од неа, односно во Бугарија, Германија, Русија, Црна Гора итн, при што вработува над 1.000 работници.
Неговата пасија кон спортот, посебно кон ракометот, е присутна до ден денес. Имено, тој бил активен ракометар, меѓународен судија, потоа претседател на РК Пелистер Битола, кога клубот под негово водство ги има освоено најголемите успеси на националните елитни ракометни купови. Тој исто така беше и долгогодишен член на Управата на Ракометниот Сојуз на Југославија и на Ракометниот Сојуз на Македонија.Силјан Мицевски од 1996 година беше избран за прв градоначалник Битола на демократски избори во Република Македонија, со мандат до 2000 година. Од 2007 година ја извршува функцијата на почесен конзул на Србија во Македонија, при што континуирано дава голем придонес во развојот на добрососедските односи на полето на економијата, науката, хуманизмот, културата и спортот.
Воедно тој е добитник на голем број награди и признанија, меѓу кои: Наградата „4-ти Ноември“ на градот Битола во 1979 и 1996 година, потоа наградата во „Златната категорија – Париз 2003 година при WQC – интернационална Ѕвезда Награда“, која му е доделена во 2003-та година на 20-та Интернационална WQC конвенција во Европа во конкуренција од 166 земји од светот итн./крај/мф/аш
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Годишен извештај на Народниот правобранител: Помалку претставки од граѓаните за работата на јавните обвинителства
Во извештајната 2023 година, во областа која се однесува на работата и постапувањето на обвинителствата во Република Северна Македонија поднесени се 63 претставки што е за 24 помалку во однос на 2022 година, се констатира во Годишниот извештај за степенот на обезбедувањето почитување, унапредување и заштита на човековите слободи и права во 2023 година што го објавува Народниот правобранител на Република Северна Македонија.
Согласно објавените податоци, бројот на претставки на граѓаните на годишно ниво се намалил за повеќе од 38%, што претставува резултат на заложбите на Јавното обвинителство за зголемување на ефикасноста на постапките и континуираните напори за подобрување на довербата на граѓаните во работата на јавните обвинителства.
Во најголем број од претставките граѓаните бараа интервенција во врска со постапки пред основните јавни обвинителства (51), потоа пред Основното јавно обвинителството за организиран криминал и корупција (4), постапка пред Јавното обвинителство на РСМ (3), пред вишите јавни обвинителства (2), друго (2) и една претставка се однесуваше за постапка пред Совет на јавни обвинители. Ваквиот сооднос е очекуван со оглед на обемот на предметна работа и фактот што токму јавните обвинителства со основна надлежност го прават првиот директен контакт на граѓаните со институцијата.
Доколку се има предвид вкупниот обем на работа на јавните обвинителства кои активно постапуваат по поднесени кривични пријави за над 40.000 сторители на кривични дела во текот на годината, поднесените 63 претставки до Народниот правобранител претставуваат околу 0,1% од таа бројка. Притоа, граѓаните во посочените предмети изразувале незадоволство поради непостапување по поднесена пријава на кривично дело, одолжување на постапката или поради незадоволство од донесена одлука. Од тие причини Народниот правобранител, меѓу останатите препораки во извештајот, во делот на Јавното обвинителство препорачува основните јавни обвинителства да ги доставуваат јавнообвинителските одлуки до странките и да им се овозможи правото да ги обжалат до повисоките јавни обвинителства, да постапуваат поажурно и навремено да преземаат дејствија, да го почитуваат рокот од 3 месеци доколку не донесат јавнообвинителска одлука да го известуваат повисокиот јавен обвинител и пријавителот, за да нема сомневање и страв дека гонењето ќе застари.
Сите овие забелешки Јавното обвинителство ги зема предвид, детално ги анализира и ќе продолжи да презема активности за дополнително зголемување на ефикасноста, на транспарентноста и на отчетноста за постапките што ги води. Ваквите заложби на Јавното обвинителство се веќе воспоставен начин на работа при што уште во извештајот за 2022 година омбудсманот констатираше дека за разлика од претходните години, сега јавните обвинителства, особено издвојувајќи ги Основното јавно обвинителство Скопје и Основно јавно обвинителство за гонење на организиран криминал и корупција, постапуваат по барањата на Народниот правобранител, даваат суштински и целосни одговори за бараните информации од постапките, се вели во соопштението од Јавното обвинителство.
Македонија
Денеска со зајдисонце за муслиманите започнува месецот Рамазан
Денеска со зајдисонце за муслиманите започнува месецот Рамазан, при што се поттикнуваат добри дела, молитви и читање Куран чие објавување започна токму во месецот Рамазан пред повеќе од 1.400 години.
Рамазан е деветтиот месец од муслиманскиот лунарен календар, благословен и свет месец во кој верниците од исламска вероисповед ширум светот постат во текот на дневните часови.
Целта е да се излезе од Рамазан подобар, поздрав, со простени гревови.
Првиот ден на постот е во понеделник на 11 март, а последниот на 9 април.
Рамазан е месец на прочистување на духот, умот и телото во кој муслиманите се откажуваат од храна, пијалок и други телесни задоволства, не прават неморални дела и избегнуваат гнев.
Добротворноста е многу важен дел од исламот и уште поважно е за време на Рамазан кога муслиманите се потсетуваат на великодушноста и ги зголемуваат своите добротворни активности.
Секоја година, Рамазан започнува 10 до 12 дена порано бидејќи исламскиот календар е всушност лунарен хиџри календар каде месеците имаат 29 или 30 дена.
Бидејќи лунарната година е пократка од сончевата година за 11 дена, во 2030 година ќе има два Рамазани – првиот ќе започне на 5 јануари, а вториот на 26 декември.
Постот завршува со Бајрам.
Македонија
Народната банка со поддршка за борбата против семејното насилство
Вработените во Народната банка организираа хуманитарна акција, преку која изразија поддршка за борбата против семејното насилство. Донацијата на вработените за „Кризниот центар за згрижување на жени жртви на семејно насилство-Надеж“, кој 20 години нуди поддршка и помош на жените кои поминуваат низ тешки животни искуства, ја врачија гувернерката на Народната банка, Анита Ангеловска-Бежоска, вицегувернерката Ана Митреска и претставници на Синдикатот на вработените во Народната банка.
При посетата на Кризниот центар, тимот на Народната банка се запозна со предизвиците со кои се соочува здружението и активностите кои ги преземаат за помош и поддршка на жените жртви на насилство. На средбата беше истакната потребата од понатамошно јакнење на свеста на сите општествени чинители за предизвиците со кои се соочуваат овие жени и долгиот процес и улогата на општеството во нивната рехабилитација.
„Потребата од натамошно подобрување на состојбите треба да е и причина да размислиме што и каде може да се унапреди за да се направат промени. Треба да посветиме должно внимание и да упатиме гласни пораки дека со економско зајакнување, жените жртви на семејно насилство многу полесно ќе го прекинат кругот на насилство и помалку ќе бидат жртви. Потребна е многу поголема сензибилност во однос на пристапот до работа на оваа ранлива категорија на жени. Тоа подразбира креирање мерки за нивно вработување, врз основа на реалните потреби на жените, или нивна стручна преквалификација, доквалификација што ќе придонесе за нивно интегрирање и задржување на пазарот на трудот“, истакна гувернерката Ангеловска-Бежоска, при посетата на Здружението „Кризен центар за згрижување на жени жртви на семејно насилство-Надеж“.