Македонија
Почнува реализација на проектот ’Предложете сообраќајна контрола’ на веб-страницата на МВР

Проектот, кој е дел до серијата слични зафати и има цел да ги подобри состојбите во сообраќајот, односно зголемување на безбедноста и поефикасно откривање и санкционирање на непочитувањето на сообраќајните правила и прописи, беше промовиран во понеделникот од министерката за внатрешни работи Гордана Јанкулоска.
„Факт е дека нема граѓанин кој не е засегнат од состојбите во сообраќајот и дека се зголемува граѓанскиот активизам, односно сугестиите, мислењата и забелешките за одредени проблеми. Затоа со проектот предвидовме граѓаните да можат на интернет страната на Министерството да испратат некаква информација или забелешка за одредени неправилности на одредени улици на кои честопати биле сведоци“, истакна Јанкулоска.
„Потребно граѓаните само е да ни ја наведат локацијата и временскиот период во кој најчесто ги забележале овие појави без разлика дали станува збор за брзо возење, некакви трки, непрописно паркирање или други непочитувања на сообраќајната сигнализација. Нивната забелешка веднаш ќе биде проследена до Секторот за сообраќај од каде што во најкус можен рок ќе биде изготвен план за вршење на контрола во однос на информацијата доставена од граѓаните. По завршувањето на контролата наша ќе биде обврската повратно да ги известиме граѓаните за преземените мерки, констатираната состојба и изречените санкции“, додаде министерката за внатрешни работи .
Останува да се види, рече Јанкулоска, дали со тоа ќе се зголеми бројот на регистрирани прекршоци и бројот на казни, но сигурно е дека тоа ќе значи поголема внимателност и поголемо почитување на сообраќајните правила и прописи. Притоа министерката презентираше дел од статистичките показатели по однос на прекршочните сообраќајни санкции.
Според овие показатели, во текот на 2014 годна е регистриран зголемен број прекршоци за повеќе од 4 отсто. Во првите шест месеци регистрирани се 73.152 прекршока на патиштата низ земјава или приближно 400 прекршока дневно низ целата земја. Најголем дел од нив се направени во главниот град во Скопје, односно 15.696 или околу 86 секој ден.
Сепак, рече уште Јанкулоска, треба да се истакне дека токму во Скопје бројот е во опаѓање во однос на првото полугодие од минатата 2013 година, и тоа за повеќе од 20 отсто. Најголем пораст на регистрираните прекршоци е забележан од автопатната полиција. Зголемувањето е за над 19 проценти, а биле забележани околу 77 прекршоци секој ден. Што се однесува до видовите на прекршоци кои најчесто се регистрирани, првите пет се: „непрописно запирање и паркирање на возила“ – 9.301; „употреба на нерегистрирано возила“ – 8.715; „брзо возење“ – 7955; „управување без возачка дозвола“ – 7,346 и „возење под дејство на алкохол“ – 4.365 прекршоци.
Како што посочи министерката за внатрешни работи, станува збор за првиот проект од повеќето посветени на подобрување на состојбите во сообраќајот. Во соработка со локалната самоуправа и Републичкиот совет за безбедноста на сообраќајот на патиштата предвидени се проектите – “Зони на смирен сообраќај“, и „Дали возам безбедно“. За подигнување на довербата предвидено е и снимање на местото каде се врши контролата, а во скорешно време се планира да се поедностави и процедурата за добивање записници од незгодите по електронски пат./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Заврши распитот на Папазов, ќе чека одлука на Обвинителството за неговиот натамошен статус

Заврши распитот на кочанскиот градоначалник, Љупчо Папазов, кој претходно денес поднесе оставка поради трагедијата во која загинаа 59 млади луѓе во нелегалната дискотека на концертот на групата ДНК.
„Извршен е распит на градоначалникот кој даде определени појаснувања и сознанија. Таквиот исказ се споредува со доказниот материјал и надлежностите на општината, по што ќе биде донесена одлука за неговиот натамошен статус во постапката“, информираа од Обвинителството.
Во моментов се врши распит и на други лица.
Македонија
Таравари: Ве молам не објавувајте фотографии од повредените, тоа може да влијае на нивниот процес на закрепнување

Министерот за здравство, Арбен Таравари, упати апел до медиумите да не објавуваат фотогрфаии и снимки од повредените во нивните најранливи моменти.
„Во овие тешки моменти, наш најголем приоритет е грижата за повредените и поддршката за нивните семејства. Длабоко ја цениме вашата посветеност во информирањето на јавноста и ви благодариме за покажаната солидарност и одговорност. Сепак, во духот на емпатијата и етичките стандарди, ве молам за почитување на приватноста и достоинството на жртвите. Објавувањето снимки и фотографии од повредените во нивните најранливи моменти може да предизвика дополнителна болка, не само за нив, туку и за нивните семејства, и да влијае на нивниот процес на закрепнување“, напиша Таравари.
Тој упати искрен апел за одговорно известување, кое, како што рече, ќе стави акцент на поддршката и помошта за оние на кои им е најпотребна.
Македонија
На клиниките во земјава се распоредени 98 пациенти, повредени лица се пренесни и во Бугарија, Србија, Словенија, Австрија, Литванија

Министерството за здравство ја информира јавноста дека медицинските тимови на здравствените установи и денеска се целосно ангажирани во обезбедување соодветна медицинска нега за сите пациенти. Состојбата на пациентите се следи внимателно, а пlнатамошните медицински постапки се спроведуваат врз основа на конзилијарни одлуки.
Во текот на денешниот ден, пациентите се распределени по здравствените установи низ земјата, и тоа:
Клинички центар – 52 пациенти
ГОБ „8 Септември“ – 17 пациенти
Универзитетска клиника „Св. Наум Охридски“ – 12 пациенти
Клиника за токсикологија – 10 пациенти
Аџибадем Систина – 7 пациенти
Покрај обезбедувањето медицинска нега во земјата, дел од пациентите се транспортирани во здравствени установи во странство, благодарение на меѓународната поддршка и соработката со партнерските земји:
Литванија – 4 пациенти
Австрија – 2 пациенти
Словенија – 2 пациенти
Република Србија – 12 пациенти
Република Бугарија – 1 пациент
Во текот на ноќта и утрешниот ден се очекува медицински транспорт од Австрија, Грција и Хрватска, со авиони и хеликоптери за натамошен трансфер на пациенти.
Министерството за здравство информира дека сите пациенти кои се префрлени во странство се во стабилна состојба и под континуирана медицинска нега.
Дополнително, во соработка со ЈЗУ Психијатриска болница-Скопје и Клиниката за психијатрија се формирани мобилни тимови составени од психијатри и психолози, кои обезбедуваат психолошка поддршка за пациентите и нивните семејства.
За сите кои имаат потреба од психолошко советување или помош, достапна е телефонската линија 078 378 754, каде што стручни лица обезбедуваат поддршка.
Министерството за здравство останува во постојана комуникација со сите надлежни институции и меѓународни партнери за натамошна координација и поддршка.