Политика
СДСМ: Јанкулоска воведува своите правила во МВР
Министерката за внатрешни работи Гордана Јанкулоска ги прекршила Уставот и правата и самоволно вовела правило според коешто во Министерството за внатрешни работи (МВР) никој не може да напредува, доколку за тоа не добие дозвола од неговиот раководителот, рече во неделата на прес-конференција Фросина Ременски, претседателка на Комисијата за внатрешни работи во опозициската СДСМ и додаде дека тоа води кон дополнителна партизација на ресорот.
Ременски информираше дека министерката Јанкулоска со телеграма бр. 07-52201/1 им укажува на претседателите на Комисиите за распоредување и унапредување на овластените службени лица и полициските службеници во МВР, дека на интерните огласи на Министерството, вработениот заедно со пријавата за аплицирање мора да достави и писмена согласност за распоредување или унапредување од раководителот на организациската единица каде работи
„Ова претставува директно кршење на правата на вработените во МВР и ограничување на законски и уставно гарантираното право на еднаквост и достапност на секое работно место. Замислете ситуацијата кога работникот ќе побара писмена согласност од својот раководител, за да се пријави на интерен оглас за огласеното работното место на неговиот раководителот“, рече Ременски.
Според неа субјективните чувства на раководителите, налозите од оние кои ги поставиле за раководители и дискреционото право што им се дава да одлучуваат за правата на работниците, во таков случај би станале одлучувачки фактори при давањето писмена согласност на работникот да се јави на интерен оглас.
„Ако се знае дека унапредувањето и распоредувањето е поврзано и со висината на платата од работното место, тогаш се ограничува и правото на работникот да оствари финансиски можности што би му ја дало унапредувањето. Воведувањето на овој нов, измислен, услов со којшто директно се кршат правата на вработените во МВР, дополнително ќе придонесе за партизација, за дискриминација, ургенции и корупција во МВР“, смета претседателка на Комисијата за внатрешни работи во најголемата опозициска партија.
Социјалдемократите сметаат и дека со посочената телеграма министерката Јанкулоска се ставила над законите и Уставот и вовеле нов услов кој воопшто, како што истакна Ременски, не е предвиден во постојниот Правилник за системот на кариера на овластените службени лица на МВР, Колективниот договор на МВР и Законот за внатрешни работи.
„Станува збор за произволно толкување на сиве овие акти од страна на Јанкулоска. Гордана Јанкулоска по којзнае кој пат покажа дека не ги почитува Уставот и законите, па дури и подзаконските акти коишто самата ги носи“, заклучи Ременски.
Го критикуваше и „отсуството на грижата за правата на вработените во МВР“ од страна на Македонскиот полициски синдикат, којшто е должен да реагира при кршење на правата од Колективниот договор на МВР, Правилникот за системот на кариера на овластените службени лица во МВР и Законот за внатрешни работи при што најави дека партиската комисија што самата ја предводи до Уставниот суд ќе поднесе иницијатива за преиспитување на уставноста и законитоста на телеграмата на Јанкулоска и Правилникот за системот на кариера на овластените службени лица во МВР во делот на уставно гарантираните права на жалба, на еднакви услови и достапност на секое работно место.
На новинарско барање, Ременски ја коментираше најавата на министерката Јанкулоска за распишување конкурс за вработување на 400 нови полицајци, при што на министерката и на премиерот им порача дека во Бирото за вработување подолго време без работа чекаат близу 400-ини дипломирани криминалисти
„Тие завршија високо стручно образование по европски стандарди за полициско образование и во којшто прием учествуваше и самото Министерство за внатрешни работи. Со тоа ќе заштедат и средства во Буџетот и време за обука на новите кадети за МВР, меѓутоа ќе се намалат и можностите за корумпирање на Комисијата за прием, а меѓу другото и партиските општински комитети на ВМРО-ДПМНЕ ќе заштедат хартија во давањето препораки за јавување на нивни активисти на оглас“, порача Ременски./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски од Чаир: На Македонија ѝ треба обединување и единство, а не поделби, владата на ВМРО-ДПМНЕ ќе вложи 1 милијарда евра за проекти во сите општини
Се чувствува победничка атмосфера и енергија, тоа е важно за сите нас и ни дава мотив да продолжиме посилно да се бориме. Овие денови кои ни преостануваат треба максимално да се мобилизираме, а најновите анкети кои ги добив утрово велат дека ќе биде голема победата и на 24 април и на 8 мај, изјави претседателот на ВМРО-ДПМНЕ, Христијан Мицкоски на митингот во Чаир.
Мицкоски истакна дека сега во Македонија имаме политичка гарнитура која повеќе од две децении е на власт, тоа се ДУИ чија суштина се поделби и грабеж на народот.
– Кога ќе анализирате која е суштината на ДУИ, Али Ахмети и Артан Груби, Бујар Османи, Талат Џафери и останатите, кај нив нема ништо посебно тие само го делат народот по етничка основа и така опстојуваат. Дали некој може да се сети некоја добра работа која Али Ахмети и Артан Груби ја имаат направено, но можам да кажам десетици лоши работи, рече Мицкоски.
Мицкоски нагласи дека сега ДУИ сериозно ќе бидат изненадени на овие избори, а им се познава нервозата затоа што после 8 мај треба да одговараат за сето она што му го направија на народот, за целиот грабеж.
Мицкоски се осврна на проектите кои ги планира идната влада од ВМРО-ДПМНЕ и посочи дека се планира да се инвестира 250 милиони евра секоја година во општините, 1 милијарда во 4 годишен мандат.
– Во Чаир ќе има висока сума, еден од проектите е проширување на булеварското решение на влезот од Бит Пазар кон Чаир и тоа мора да се направи и го повикувам градоначалникот да се пријави со повеќе проекти. Тоа ќе додаде вредност во квалитетот на живеење. На Македонија и треба обединување и единство не поделба, потенцираше Мицкоски.
Мицкоски додаде дека идната влада на ВМРО-ДПМНЕ планира да отвори нови 55.000 работни места, да функционира со владеење на правото на целата територија и нема да има територии каде ќе владејат шерифи.
Да обезбедиме пристојни услови за поголем инвестициски бран и од странство и од домашни инвеститори за да може децата да останат тука. Мораме и тие кои си отидоа да ги вратиме назад. Да обезбедиме надеж. Ве повикувам на 24 април сите да се обединиме околу број 2 и да гласаме за Гордана Силјановска Давкова, а потоа да се обединиме и заедно на 8 мај да испишеме историја за коалицијата Твоја Македонија предводена од ВМРО-ДПМНЕ, изјави Мицкоски.
Македонија
Доц. д-р Бобан Карапејовски: Ќе обезбедиме вработување на најдобрите 200 студенти, како и стипендии од 500 евра месечно
Носителот на листата на кандидати за пратеници во ИЕ 1, Бобан Карапејовски на денешната прес конференција рече дека во програмата на Движењето ЗНАМ – За наша Македонија за парламентарните избори, наречена „Проглас за достоинствена Македонија“ еден од приоритетите се образованието и науката, кои се суштински за градењето силна и просперитетна држава.
„Во Прогласот за достоинствена Македонија на Движењето ЗНАМ – За наша Македонија, предвидовме два сегменти: зголемување на достоинството на вработените во образованието и во науката и поставување нов систем, со кој овој сектор ќе се врати во фокусот и ќе помогне во создавањето функционално писмен и високообучен кадар, како и продлабочување на
научните истражувања“, рече Карапејовски и додаде: „Во однос на првиот постулат, достоинството на вработените во образовниот сектор, е предвидено платите на наставниците и на професорите да се зголемат до 100 % од актуелните. И, тоа е најмалку што можеме да направиме за да му го вратиме угледот на учителот и да ги привлечеме најдобрите да бидат
даскали на нашите деца“.
Тој потенцира дека за најдобрите студенти ќе се обезбедат стипендии во износ од 500 евра месечно, а за најдобрите двесте студенти вработување во научните и во институциите на системот.
„Партиските вработувања мора да запрат! Не смее партиската книшка да биде услов за вработување. На универзитетите и во државните институции треба да работат најдобрите за најдоброто за сите нас. Ни треба научен подмладок веднаш, како и
ревизија на условите и зголемување на квалитетот на акредитираните универзитети, кои се множат на секој чекор, а не даваат квалитет“, рече тој.
Карапејовски рече дека наставните програми и планови ќе се усогласат со модерните технологии и достигнувања и појасни дека ќе се изгради систем што ќе поттикнува креативно, аналитичко и логичко размислување кај учениците, но и ќе поттикнува креативност во областа на бизнисот и на финансиската едукација. Учебниците ќе бидат усогласени со новите наставни планови и програми и напишани од најдобрите автори, навреме доставени до учениците.
Тој исто така рече дека издвојувањата од буџетот за науката ќе се зголемат, а ќе има и посебни стимулации за оние што успеваат да објавуваат во најпрестижните списанија и да соработуваат со колегите од најдобрите светски универзитети, како и посебни субвенции за таканаречните национални дисциплини.
Македонија
Пендаровски: Ги знам нивните лажни анкети, ги знам и реалните анкети и реално ви кажувам дека на 8 мај победуваме!
На само неколку дена пред првиот круг на гласање, од Скопје кандидатот за претседател Стево Пендаровски искажа верување дека по повеќе од три децении независност, македонските граѓани многу добро знаат да препознаат чија програма е реална, а која е во расчекор со времето во кое живееме.
„Овој претседател и оваа политичка гарнитура никогаш не давале лажни надежи и ветувања за брза реализација на стратешките цели на државата. И денес пред вас, не велам дека Македонија за само неколку години ќе биде најразвиената држава во Европа, не ветувам дека целиот тој процес ќе трае само неколку месеци, но, говорам и повторувам секаде дека најголемиот ризик е ако на изборите им дадеме шанса на оние за кои претходно веќе видовме како владеат со луѓето цели 11 години“, истакна Пендаровски.
Пендаровски денеска повика на масовна излезност на 24 април и на 8 мај, за како што рече, да не се враќаме во режим.
„Ги знам нивните лажни анкети, ги знам и реалните анкети и реално ви кажувам дека победуваме на 8 мај. Со заокружување на бројот 1 продолжуваме кон Европа и кон развиениот свет и дефинитивно не се враќаме назад во режим и заробена држава“, рече Пендаровски.